Category Archives: குர்ஆன் விளக்கம்

78:18 மூமின்களுக்கு சிரித்த நிலையில் காட்சியளிக்கும் இறைவன்

மூமின்களுக்கு சிரித்த நிலையில் காட்சியளிக்கும் இறைவன்

    ‘நிச்சயமாக தீர்ப்பு வழங்கும் (கியாமத்) நாள் நேரங் குறிக்கப்பட்டதாக இருக்கிறது. சூர் ஊதப்படும் அந்நாளில் நீங்கள் கூட்டம் கூட்டமாக வருவீர்கள்’. (அல்குர்ஆன் 78:17,18)

    நியாயத் தீர்ப்பு நாளில் மக்களின் நிலை எவ்வாறு இருக்கும் என்பதை இதுவரை அறிந்தோம். இறைவன் அந்நாளில் விசாரிக்கும் முறை எவ்வாறு இருக்கும்? இதை இனி அறிந்து கொள்வோம்.

விசாரணை மன்றம்

    மக்களெல்லாம் வெட்ட வெளியில் ஒன்று கூட்டப்பட்டதும் அவர்களை விசாரிக்க இறைவன் அங்கே வருவான். வானவர்கள் அணியணியாக வருவார்கள். இறைவனது அர்ஷை எட்டு வானர்கள் சுமந்து வருவார்கள் என்று திருக்குர்ஆன் கூறுகிறது.

    ‘இப்பூமி தூள் தூளாக்கப்பட்டதும் உமது இறைவன் வருவான். வானவர்களும் அணியணியாக வருவார்கள்’ (அல்குர்ஆன் 89:21,22)

    சூரில் ஒரே ஒரு முறை ஊதப்பட்டதும், இப்பூமியும் மலைகளும் தூக்கப்பட்டு ஒரேயடியாகத் தகர்க்கப்படும் போது அந்நாளில் தான் அந்த (மாபெரும்) நிகழ்ச்சி நடைபெறும். வானம் பிளந்து விடும். அந்நாளில் அது பலவீனப்பட்டதாக இருக்கும். வானவர்கள் வானத்தின் கோடியில் இருப்பார்கள். அந்நாளில் உமது இறைவனின் அர்ஷை தங்களுக்கு மேல் எட்டு வானவர்கள் சுமந்து கொள்வார்கள். (அல்குர்ஆன் 69:13-17)

    இறைவனின் வருகை எவ்வாறு என்பதை நம்மால் கற்பனை செய்ய இயலாவிட்டாலும் அல்லாஹ் அவ்வாறு கூறுவதால் அப்படியே நம்ப வேண்டும். அவனுக்கே உரிய முறையில் அவன் வருவான் என்றே நம்ப வேண்டும். சுயமாகக் கூறப்படும் எவரது விளக்கத்தையும் நாம் ஏற்கக் கூடாது. எட்டு வானவர்கள் அவனது அர்ஷைச் சுமக்க, ஏனைய வானவர்கள் புடைசூழ வல்ல இறைவன் விசாரணை நடத்துவதற்காக மஹ்ஷர் மைதானத்துக்கு வருவான் என்று நம்புவதே சரியானதாகும்.

    அர்ஷில் வீற்றிருக்கும் நிலையில் வல்ல இறைவன் வருவது உவமையாகக் கூறப்பட்டதன்று, நேரடியான பொருளிலேயே கூறப்பட்டது என்பதற்கு மேலும் சில சான்றுகள் உள்ளன.

    ‘அந்நாளில் சில முகங்கள் செழிப்புடனும் தம் இறைவனைப் பார்த்துக் கொண்டுமிருக்கும்’ (அல்குர்ஆன் 75:22,23)

    நபி (ஸல்) அவர்கள் பவுர்ணமி இரவில் நிலவைப் பார்த்தார்கள். அந்த முழு நிலவை நீங்கள் காண்பது போல் உங்கள் இறைவனையும் நிச்சயமாகக் காண்பீர்கள் என்று அப்போது கூறினார்கள். (அறிவப்பவர்: ஜரீர் (ரலி), நூல்கள்: புகாரி, முஸ்லிம்)

    ‘நிச்சயமாக அல்லாஹ் மூமின்களுக்கு சிரித்த நிலையில் காட்சியளிப்பான். (இது மஹ்ஷர் வெளியில் நடக்கும்)’ என்று நபி (ஸல்) கூறினார்கள். (அறிவிப்பவர்: ஜாபிர் (ரலி), நூல்: முஸ்லிம்)

    மூமின்கள் இறைவனைக் காண்பார்கள் என்பது எவ்வளவு நிச்சயமோ அதே அளவு இறைவனின் வருகையும் நிச்சயமானதாகும்.

    சந்திரனைப் பார்ப்பது போல நீங்கள் பார்ப்பீர்கள் என்று கூறிய நபி (ஸல்) அவர்கள் (மற்றொரு அறிவிப்பில்) உயரத்தில் இருக்கும் சந்திரனைக் காண்பதை விட்டும் ஒருவர் மற்றவரைத் தடுக்க முடியாதது போல இறைவனைக் காண்பதையும் ஒருவர் மற்றவருக்குத் தடுக்க முடியாது என்று விளக்கினார்கள்.

    மக்கள் நெரிசல் காரணமாக யாரும் யாருக்கும் இறைவனின் திருக்காட்சியைத் தடுக்க முடியாது. அவ்வளவு உயரத்தில் இறைவன் காட்சி தருவான் என்பது நபியவர்களின் இந்த உவமையிலிருந்து தெரியவரும். மற்றொரு ஹதீஸ் இதைத் தெளிவாகவும் விளக்குகின்றது.

    இறைவனின் அர்ஷைச் சுமந்துள்ள வானவர்களில் ஒரு வானவர் பற்றிக் கூற எனக்கு அனுமதியளிக் கப்பட்டது. அவ்வானவரின் காதுக்கும் தோள் புஜத்துக்கும் இடையே எழுநூறு ஆண்டுகள் நடக்கும் தொலைவு இருக்கும் என்று நபி (ஸல்) கூறினார்கள். (அறிவிப்பவர்: ஜாபிர் பின் அப்துல்லாஹ் (ரலி), நூல்: அபூதாவூது)

    காதுக்கும் தோள்புஜத்துக்கும் இடையே இவ்வளவு தொலைவு என்றால் அவ்வானவர்களின் பிரம்மாண்டத் தோற்றத்தை நீங்களே முடிவு செய்து கொள்ளலாம். இத்தகைய பிரமாண்டமான தோற்றம் கொண்ட வானவர்கள் வல்ல இறைவனின் அர்ஷைச் சுமந்து வரும் போது அனைவரும் காணக்கூடிய அளவுக்கு இறைவன் இருப்பான் என்பதை அறியலாம்.

    இறைவனைத் தரிசித்தல், வானவர்களின் பிரமாண்டமான தோற்றம் ஆகியவற்றைச் சிந்தித்தால் இறைவனின் வருகை என்பது அதன் நேரடிப் பொருளிலேயே பயன்படுத்தப்பட்டுள்ளது என்று அறியலாம்.

    இறைவன் வருவதற்கு முன் மக்கள் அனைவரையும் ஒருவானவர் விசாரணை நடைபெறும் இடத்திற்கு அழைப்பார். அவரை மக்கள் அனைவரும் தொடர்வார்கள். அங்கே குறுக்கு வழி ஏதும் இராது. நடந்து செல்லும் காலடி ஓசை தவிர வேறு எந்த ஓசையுமின்றி வாய்பொத்தி அவ்வானவரை மக்கள் தொடர்ந்து செல்வார்கள்.

    அந்நாளில் அவர்கள் அழைப்பாளரை பின் பற்றிச் செல்வார்கள். அதில் எத்தகைய கோணலும் இருக்காது. மேலும் ரஹ்மானுக்கு (அஞ்சி அவனுக்கு) முன் அனைத்து சப்தங்களும் அடங்கி விடும். காலடி ஓசை தவிர வேறு ஓசை எதனையும் நீர் கேட்க மாட்டீர்! (அல்குர்ஆன் 20:108)

    எனவே நபியே அவர்களை அலட்சியப்படுத்தி விடுவீராக. அவர்கள் வெறுக்கக் கூடிய ஒன்றுக்காக (விசாரணைக்காக) அழைப்பாளர் அழைக்கும் நாளில் அவர்களின் பார்வைகள் தாழ்ந்திருக்கும். பரவிச் செல்லும் வெட்டுக்கிளிகளைப் போல் புதைகுழிகளிலிருந்து அவர்கள் வெளிப்படுவார்கள். அழைப்பாளரிடம் விரைந்து வருவார்கள். இது மிகவும் கஷ்டமான நாள் என்று அக்காபிர்கள் கூறுவார்கள். (அல்குர்ஆன் 54:6-8)

    பலியாடுகள் போல் அழைப்பாளரைத் தொடர்ந்து அவர்கள் மைதானத்தை அடைந்ததும் வல்ல இறைவன் வருவான், அவர்களை விசாரிப்பான். இறைவன் எவ்வாறு அவர்களை விசாரிப்பான் என்ற விபரங்களையும் அறிந்து கொள்வோம்.

78:18 மறுமையில் தலைகீழாக நடந்து வரும் காபிர்கள்

மறுமையில் தலைகீழாக நடந்து வரும் காபிர்கள்

    ‘நிச்சயமாக தீர்ப்பு வழங்கும் (கியாமத்) நாள் நேரங் குறிக்கப்பட்டதாக இருக்கிறது. சூர் ஊதப்படும் அந்நாளில் நீங்கள் கூட்டம் கூட்டமாக வருவீர்கள்’. (அல்குர்ஆன் 78:17,18)

தலைகீழாக நடந்து வருவர்

    நம்பிக்கை கொள்ளாத மக்கள் எழுப்பப்பட்டதும் கால்களால் நடக்காமல் தலையால் நடந்து வருவார்கள். அவர்கள் நரகத்திற்குச் செல்வார்கள் என்பதை முன் கூட்டியே இது அறிவிப்புக் கொடுக்கும் வகையில் அமையும்.

    ‘அவர்களைக் குருடர்களாகவும், செவிடர்களாகவும், ஊமைகளாகவும் முகம் குப்புற (நடப்பவர்களாக) எழுப்புவோம்’. (அல்குர்ஆன் 17:97)

    ‘அல்லாஹ்வின் தூதரே! கியாமத் நாளில் எவ்வாறு முகம் குப்புற எழுப்பப்படுவான்’ என்று ஒரு மனிதர் நபி (ஸல்) அவர்களிடம் கேட்டார். அதற்கு நபி (ஸல்) அவர்கள் இவ்வுலகில் அவனை இருகால்களால் நடக்க வைத்தவன் கியாமத் நாளில் அவனை முகம் குப்புற நடக்கச் செய்ய சக்தி உள்ளவன் இல்லையா? என்று கேட்டார்கள். (அறிவிப்பவர்: அனஸ் (ரலி), நூல்கள்: புகாரி, முஸ்லிம்)

    சிலர் நடந்தவர்களாகவும், சிலர் வாகனத்தில் ஏறியவர்களாகவும், சிலர் முகம் குப்புறவும் மறுமை நாளில் மக்கள் எழுப்பப்படுவார்கள் என்று நபி (ஸல்) கூறினார்கள். (அறிவிப்பவர்: அபூஹுரைரா (ரலி), நூல்கள்: திர்மிதி)

    வாகனத்தில் வருவோர் பலவாறாக வருவார்கள் என்பதை பின்வரும் ஹதீஸ் விளக்குகின்றது.

    ‘ஒரு ஒட்டகத்தில் இருவர், ஒரு ஒட்டகத்தில் மூவர், ஒரு ஒட்டகத்தில் நால்வர், ஒரு ஒட்டகத்தில் பதின்மர் என்று (பலவாறாக) வருவார்கள்’ என்பது நபிமொழி. அறிவிப்பவர்: அபூஹுரைரா (ரலி)

    நீலக்கண்களுடன் நிற்பார்கள்

    குருடர்களாக எழுப்பப்படுவோரின் கண்கள் நீலம் படர்ந்ததாகவும், கண்கள் மேல் நோக்கியதாகவும் மறுமையில் நிற்பார்கள்.

    (இரண்டாவது) சூர் ஊதப்படும் அந்நாளில் குற்றவாளிகளை நீலம் பூத்த கண்களைக் கொண்டவர்களாக நாம் ஒன்று திரட்டுவோம். (அல்குர்ஆன் 20:102)

    அவர்களுக்கு (தண்டனையை) இறைவன் தாமதப்படுத்துவது கண்கள் விறைத்து விடக்கூடிய அந்த நாளுக்காகத் தான். (அல்குர்ஆன் 14:42)

    வாக்களிக்கப்பட்ட உண்மை நெருங்கி விட்டது. அப்போது காபிர்களின் கண்கள் நிலை குத்தி நின்று விடும். (அல்குர்ஆன் 21:97)

யாரும் யாருடனும் பேச முடியாது

    மண்ணறைகளிலிருந்து எழுப்பப்பட்டவுடன் தாங்கள் தங்கினோம் என்று பேசிக் கொள்வதைத் தவிர எவரும் எவருடனும் பேசிக் கொள்ள மாட்டார்கள்.

    நீங்கள் பத்து நாட்களுக்கு மேல் தங்கியதில்லை என்று அவர்கள் தங்களுக்கிடையே இரகசியமாக பேசிக் கொள்வார்கள். (அல்குர்ஆன் 20:103)

    அந்த நாளில் நாம் அவர்களின் வாய்களின் மீது முத்திரையிட்டு விடுவோம். அன்றியும் அவர்கள் செய்வதை பற்றி அவர்களின் கைகள் நம்மிடம் பேசும். அவர்களின் கால்களும் சாட்சி கூறும். (அல்குர்ஆன் 86:65)

    அந்த நாள் வரும் போது அவனுடைய அனுமதியின்றி எவரும் பேச இயலாது. (அல்குர்ஆன் 11:105)

    இது அவர்கள் பேச முடியாத நாள். ஏதேனும் சமாதானம் கூறவும் அவர்கள் அனுமதிக்கப்பட மாட்டார்கள். (அல்குர்ஆன் 77:35)

    அனைத்து சப்தங்களும் (அந்நாளில்) ஒடுங்கிவிடும். காலடிச் சப்தத்தைத் தவிர வேறு எதனையும் நீர் செவியுற மாட்டீர். (அல்குர்ஆன் 20:108)

    இவ்வளவு பயங்கரமான அந்த நாளின் விசாரணை எத்தகையதாக இருக்கும் என்பதை பின் வரும் வசனங்களும், நபி மொழிகளும் விளக்கமாகக் கூறுகின்றன.
 

உறவு, நட்பு ஆகியவை மறந்து விடும்

    இவ்வுலகில் மனிதர்களிடையே நிலவி வந்த நட்பும், உறவும் முற்றாக விடைபெற்று விடும். ஒவ்வொரு மனிதனும் தன்னைப் பற்றி மட்டுமே நினைக்கக் கூடிய நாள்!

    அந்த நாளில் மனிதன் தன் சகோதரனை விட்டும், தன் தாயை விட்டும், தன் தந்தையை விட்டும், தன் மனைவியை விட்டும், தன் மக்களை விட்டும் ஓடுவான். அன்றைய தினம் ஒவ்வொரு மனிதனுக்கும் அவனவன் நிலையைப் பற்றி எண்ணவே சரியாயிருக்கும். (அல்குர்ஆன் 80:34-37)

    நம்பிக்கை கொண்டோரே! பேரங்களும், நட்புறவுகளும், பரிந்துரைகளும் பயன் தாரத அந்த நாள் வருவதற்கு முன்னர் நாம் உங்களுக்கு அளித்தவற்றிலிருந்து செலவிடுங்கள். (அல்குர்ஆன் 2:254)

    ஆகவே எங்களுக்காக (இன்று) பரிந்து பேசுவோரும், உற்ற நண்பரும் இல்லை. (அல்குர்ஆன் 26:100,101)

    இன்றைய தினம் அவனுக்கு எந்த நண்பரும் இல்லை. (அல்குர்ஆன் 69:35)

    ஒரு நண்பன் மற்றொரு நண்பனைப் பார்ப்பான் (ஆனாலும்) ஒருவரை ஒருவர் விசாரித்துக் கொள்ள மாட்டார்கள். குற்றம் புரிந்தவன் அந்த நாளின் வேதனையிலிருந்து தப்புவதற்காக தன் மக்களையும், மனைவியையும், சகோதரனையும் அவனை அரவணைத்துக் கொண்டிருந்த சுற்றத்தாரையும், இன்னும் பூமியில் உள்ள அனைவரையும் ஈடாகக் கொடுத்து (தான் மட்டும்) தப்பித்துக் கொள்ள விரும்புவான். (அல்குர்ஆன் 70:10-14)

    யாரும் யாரைப் பற்றியும் நினைத்துப் பார்க்க முடியாத அளவு கொடூரமானதாக அந்த நாள் இருக்கும்.

விசாரணை மன்றம்

    இந்த பூமி அழிக்கப்பட்டு இன்னொரு பூமி உருவாக்கப்படும் என்பதை முன்னரே நாம் குறிப்பிட்டோம். அந்த பூமியில் தான் விசாரணை நடக்கும். அந்த பூமியின் அமைப்பு பற்றி நபி (ஸல்) அவர்கள் பின்வருமாறு விளக்கம் தருகிறார்கள்.

    ‘சலிக்கப்பட்ட தூய்மைபடுத்தப்பட்ட மாவினால் செய்த ரொட்டியைப் போல் இலேசான வெண்மை நிறம் கொண்ட பூமியில் மக்கள் கியாமத் நாளில் ஒன்று திரட்டப்படுவார்கள்’ என்று நபி (ஸல்) கூறினார்கள். (அறிவிப்பாளர்: ஸஹ்ல் பின் ஸஃது (ரலி), நூல்கள்: புகாரி, முஸ்லிம்)

    ‘பயணத்தின் போது உங்களில் ஒருவர் தமது ரொட்டியை தம் கையில் பிடித்திருப்பது போல் இறைவன் மறுமை நாளில் இப்பூமியை ஒரு ரொட்டியைப் போல் தன் கைக்குள் அடக்குவான்’ என்று நபி (ஸல்) கூறினார்கள். (அறிவிப்பாளர்: அபூஸயீத் அல்குத்ரீ (ரலி), நூல்கள்: புகாரி, முஸ்லிம்)

    ‘இன்னும் இந்தப் பூமி முழுவதும் கியாமத் நாளில் அவனுடைய ஒரு பிடிதான்’ (அல்குர்ஆன் 39:67)

ஒரு மைல் தொலைவில் சூரியன்

    இறைவனின் கைப்பிடியில் ரொட்டி போன்றிருக்கும் பூமியின் மேல் சூரியன் நிறுத்தப்படும். பல கோடி மைல்களுக்கப்பால் இப்போது சூரியன் இருப்பது போன்று தூரத்தில் நிறுத்தப்படாது. மாறாக ஒரு மைல் தொலைவு உயரத்தில் சூரியன் கொண்டு வரப்பட்டு நிறுத்தப்படும்.

    சூரியன் கியாமத் நாளில் மனிதர்களிடமிருந்து ஒரு மைல் உயரத்தில் நெருக்கமாக நிறுத்தப்படும். மக்கள் தம்தம் செயல்களுக்கேற்ப வியர்வையில் நிற்பார்கள். சிலருக்கு வியர்வை கரண்டைக்கால்கள் வரை இருக்கும். மற்றும் சிலருக்கு முட்டுக் கால்கள் வரையிலும், இன்னும் சிலருக்கு வாய் வரையிலும் இருக்கும் என்பது நபிமொழி. (அறிவிப்பவர்: மிக்தாத் (ரலி), நூல்கள்: முஸ்லிம்)

    கியாமத் நாளில் மக்களின் வியர்வை பூமியில் எழுபது முழம் வரை இறங்கும். அவர்களின் காதுகளை அடையும் அளவுக்கு கடிவாளம் இடப்பட்டது போல் இருக்கும் என்பதும் நபிமொழி. (அறிவிப்பவர்: அபூஹுரைரா (ரலி), நூல்கள்: புகாரி, முஸ்லிம்)

78:18 மறுமையில் பிறந்த மேனியுடன் எழுப்பப்படுவார்கள்

மறுமையில் பிறந்த மேனியுடன் எழுப்பப்படுவார்கள்

    ‘நிச்சயமாக தீர்ப்பு வழங்கும் (கியாமத்) நாள் நேரங் குறிக்கப்பட்டதாக இருக்கிறது. சூர் ஊதப்படும் அந்நாளில் நீங்கள் கூட்டம் கூட்டமாக வருவீர்கள்’. (அல்குர்ஆன் 78:17,18)

இரண்டாம் சூர் ஊதப்பட்டவுடன் மனிதர்கள் எவ்வாறு உயிர்பிக்கப்படுவார்கள்? அதைத் தொடர்ந்து நடைபெறுவது என்னவென்பதை இனி காண்போம்.

    பூமியைப் பிளந்து வெளியேறுவர்

    இரண்டாவது சூர் ஊதப்பட்டவுடன் எல்லா மனிதர்களும் பூமியைக் கிழித்துக் கொண்டு வெளிப்படுவார்கள்.

‘பூமி பிளந்து அவர்கள் வேகமாக வரும் நாள் அது தான். யாவரையும் ஒன்று சேர்க்கும் நாள்! இது நமக்கு மிக எளிதானதேயாகும்’. (அல்குர்ஆன் 50:44)

    ‘இலக்குகளை நோக்கி செல்வது போல் அவர்கள் மண்ணறைகளிலிருந்து வெளியேறுவார்கள்’. (அல்குர்ஆன் 70:43)

    அழிவு நாளின் போது அழிக்கப்பட்டவர்கள் உள்ளிட்ட அனைத்து மனிதர்களும் பூமிக்குள்ளிருந்தே உயிருடன் வெளிப்படுவார்கள். ஏதோ ஒரு இலக்கை நோக்கிச் செல்வது போல் வேகமாக விரைவார்கள் என்பதை இவ்வசனங்கள் கூறுகின்றன.

    மண்ணறைகளில் தங்கிய காலத்தை உணரமாட்டார்கள்

    பல்லாயிரம் ஆண்டுகள் மண்ணறைகளில் புதைந்து கிடந்தவர்கள் உட்பட எவருமே தாம் மண்ணறைகளில் தங்கியிருந்த கால அளவை உணரமாட்டார்கள். ஏதோ சற்று நேரம் உறங்கி விட்டு எழுந்திருப்பதாகவே அனைவரும் உணர்வார்கள். இதைப் பின்வரும் வசனங்கள் விளக்குகின்றன.

    ‘இவர்களுக்கு வாக்களிக்கப்பட்டதை இவர்கள் பார்க்கும் நாளில் பகலில் சிறிது நேரம் தவிர (மண்ணறைகளில்) இருக்க வில்லை என்பது போல் அவர்களுக்குத் தோன்றும்’. (அல்குர்ஆன் 46:35)

    ‘நிச்சயமாக அதை அவர்கள் காணும் நாளில் காலையிலோ, மாலையிலோ சொற்ப நேரமே தங்கியிருந்ததாக அவர்களுக்குத் தோன்றும்’. (அல்குர்ஆன் 79:46)

    ‘அன்றியும் அந்த நாள் வரும்போது சற்று நேரமே தங்கியிருந்ததாக குற்றவாளிகள் சத்தியம் செய்து கூறுவார்கள்’. (அல்குர்ஆன் 30:55)

    எங்களுக்கு ஏற்பட்ட துக்கமே (எங்கள் உறங்குமிடங்களிலிருந்து) எங்களை எழுப்பியவர்கள் யார்?’ (அல்குர்ஆன் 36:52) இதை 10:45, 17:62 வசனங்களும் கூறுகின்றன. கப்ருகளில் வேதனை செய்யப்பட்டதும், பல்லாண்டு மண்ணறைகளில் கழித்ததும் அவர்களுக்குத் தெரியாது. உறங்கிய போது ஏற்பட்ட கனவாகவே அதை அவர்கள் நினைத்துக் கொள்வார்கள். எங்கள் உறக்கத்திலிருந்து எழுப்பியவர் யார் என்று அவர்கள் கேட்பது இதனால்தான்.

    இந்த உணர்வுடன் எழுவோர் குற்றவாளிகள் தாம், நல்லடியார்கள் உலகில் வாழும் போதே மறுமை நாளை நம்பியவர்கள் இந்த நிகழ்ச்சிகள் ஏற்படும் என்பதை குர்ஆனிலிருந்து படித்து அறிந்த மக்கள் இவ்வாறு எண்ண மாட்டார்கள். 30:55 வசனத்தில் ‘குற்றவாளிகள்’ என்று கூறப்படுவதிலிருந்து இதை அறியலாம். 30:56 வசனத்தில் நல்லடியார்கள் இவ்வாறு எண்ண மாட்டார்கள் என்பதைத் தெளிவாகவும் இறைவன் கூறுகிறான்.

    ‘ஆனால் எவர்களுக்கு கல்வியும் ஈமானும் கொடுக்கப்பட்டனவோ அவர்கள் ‘அல்லாஹ்வின் பதிவேட்டில் உள்ளபடி திரும்ப உயிர் கொடுத்து எழுப்பப்படும் நாள் வரையில் (மண்ணறையில்) தங்கியிருந்தீர்கள். உயிர் பெற்று எழும் நாள் இது தான். இதனை அறியாதவர்களாகவே நீங்கள் இருந்தீர்கள் என்று கூறுவார்கள்’. (அல்குர்ஆன் 30:56)

    பிறந்த மேனியாக எழுப்பப்படுவார்கள்

    நபிமார்கள், நல்லவர்கள், ஆண்கள், பெண்கள் மற்றும் அனைவருமே நிர்வாணமாக எழுப்பப்படுவார்கள். எவருமே ஆடை யணிந்திருக்க மாட்டார்கள். மேலும் இவ்வுலகில் கத்னா செய்திருந்தவர்கள் உட்பட அனைவரும் கத்னா செய்யப்படாதவர்களாகவே எழுப்பப்படுவார்கள்.

    ‘நிச்சயமாக நீங்கள் நிர்வாணமாகவும், செருப்பணியாமலும், கத்னா செய்யப்படாமலும் எழுப்பப்படுவீர்கள்’ என்று நபி (ஸல்) கூறிவிட்டு 21:104 வசனத்தை ஓதிக்காட்டினார்கள். (அறிவிப்பவர்: இப்னு அப்பாஸ் (ரலி), நூல்கள்: புகாரி, முஸ்லிம்)

    ‘கியாமத் நாளில் மக்கள் செருப்பணியாமலும், நிர்வாணமாகவும், கத்னா செய்யப்படாமலும் எழுப்பப்படுவீர்கள்’ என்று நபி (ஸல்) கூறிய போது ‘அல்லாஹ்வின் திருத்தூதரே! ஆண்களும் பெண்களும் திரண்டிருக்கும் போது சிலர் சிலரைப் பார்ப்பார்களே? என்று நான் கேட்டேன். அதற்கு நபி (ஸல்) அவர்கள் ‘ஆயிஷாவே! சிலர் சிலரைப் பார்த்துக் கொண்டிருப்பதை விட நிலமை மிகவும் கடுமையானதாக இருக்கும்’ என்று விடையளித்தார்கள். (அறிவிப்பவர்: ஆயிஷா (ரலி), நூல்கள்: புகாரி, முஸ்லிம்)

    சிலர் குருடர்களாகவும், ஊமையர்களாகவும் எழுப்பப்படுவர்

    எவ்வாறு பிறந்தார்களோ அவ்வாறே மறுமையில் எழுப்பப்படுவார்கள் என்றாலும் உலகில் வாழும் போது பார்வை, செவி, பேசும் திறனுடன் இருந்து தவறான வழியில் சென்றவர்கள் குருடர்களாகவும் ஊமையர்களாகவும் செவிடர்களாகவும் எழுப்பப்படுவார்கள்.

    ‘யார் வழிகெட்டு விட்டார்களோ அவர்களுக்கு அவனையன்றி உதவிசெய்வோர் எவரையும் நீர் காண மாட்டீர்! மேலும் அவர்களைக் குருடர்களாகவும், ஊமைகளாகவும், செவிடர்களாகவும் முகம் குப்புற (நடப்பவர்களாக) கியாமத் நாளில் எழுப்புவோம்’. (அல்குர்ஆன் 17:97)

    ‘எவன் என்னுடைய போதனையைப் புறக்கணிக்கின்றானோ அவனுக்கு நிச்சயமாக நெருக்கடியான வாழ்க்கையே இருக்கிறது. மேலும் நாம் அவனைக் கியாமத் நாளில் குருடனாகவே எழுப்புவோம். (அப்போது அவன்) என் இறைவனே! நான் பார்வையுடையவனாக இருந்தேனே! என்னை ஏன் குருடனாக எழுப்பினாய்? என்று கூறுவான். (அதற்கு இறைவன்) அவ்வாறு தான். நம்முடைய வசனங்கள் உன்னிடம் வந்த போது அவற்றை நீ மறந்து விட்டாய். அவ்வாறே இன்றைய தினம் நீயும் மறக்கப்பட்டு விட்டாய் என்று கூறுவான். ஆகவே எவன் தன் இறைவனுடைய வசனங்களின் மேல் நம்பிக்கை கொள்ளாமல் வரம்பு மீறி நடக்கின்றானோ அவனுக்கு இவ்வாறு தான் நாம் கூலி கொடுப்போம். (இதை விட) மறுமையின் வேதனை மிகவும் கடுமையானதும், நிலையானதுமாகும்’. (அல்குர்ஆன் 20:124-127)

    இறைவனின் வேத வசனங்களை நம்பாத அனைவரும் குருடர்களாகவே எழுப்பப்படுவார்கள் என்பதை இவ்வசனங்கள் கூறுகின்றன.

    முகம் கறுத்தவர்களாக எழுப்பப்படுவர்

    விசாரணைக்குப் பின் கிடைக்கும் தண்டனை தனியாக இருக்க விசாரணைக்கு முன்பே குற்றவாளிகள் குருடர்களாகவும், செவிடர்களாகவும், ஊமைகளாகவும், தனி அடையாளத்துடன் எழுப்பப்படுவது போல், முகம் கறுத்தவர்களாகவும் எழுப்பப்படுவார்கள். நல்லவர்கள் உலகில் கறுப்பர்களாக இருந்தாலும் – வெண்மை முகத்தவர்களாகவும், தீயவர்கள் – உலகில் வெண்மை நிறத்தவர்களாக இருந்தாலும், முகம் கறுத்தவர்களாகவும் எழுப்பப்படுவர். இதைப் பின் வரும் வசனம் விளக்குகின்றது.

    ‘அந்த நாளில் சில முகங்கள் வெண்மையாகவும், மற்றும் சில முகங்கள் கறுப்பாகவும் இருக்கும். எவரது முகங்கள் கறுப்பாக உள்ளனவோ அவர்களிடமும் ‘நீங்கள் நம்பிக்கை கொண்டபின் நிராகரித்தீர்கள் அல்லவா? நீங்கள் நிராகரித்ததற்காக இந்த வேதனையைச் சுவையுங்கள் (என்று கூறப்படும்)”. (அல்குர்ஆன் 3:100)

78:17 முதலாவது சூரின் போது அனைத்தும் அழிக்கப்பட மாட்டாது

முதலாவது சூரின் போது அனைத்தும் அழிக்கப்பட மாட்டாது

    ‘நிச்சயமாக தீர்ப்பு வழங்கும் (கியாமத்) நாள் நேரங் குறிக்கப்பட்டதாக இருக்கிறது. சூர் ஊதப்படும் அந்நாளில் நீங்கள் கூட்டம் கூட்டமாக வருவீர்கள்’. (அல்குர்ஆன் 78:17,18)

    அழிப்பதற்கும் ஆக்குவதற்கும் தனித்தனியாக சூர்கள் ஊதப்படும் என்பதையும் முதல் சூர் ஊதப்பட்டவுடன் மனிதர்களும், மற்ற உயிரினங்களும் அழிக்கப்படுவார்கள். எனினும் மலக்குகள் அழிக்கப்பட மாட்டார்கள் என்பதையும் சென்ற இதழில் நாம் கண்டோம்.

    முதல் சூர் ஆக்குவதற்கும், இரண்டாவது சூர் அழிப்பதற்கும் என்று பொதுவாகக் கூற முடியாது. முதலாவது சூர் ஊதப்படும் போது அழிக்கப்படாமல் இன்னும் சில பொருட்கள் விடப்படும். அவை ஆக்குவதற்காக ஊதப்படும். இரண்டாவது சூரின் போது அழிக்கப்படும் என்பதைத் திருக்குர்ஆனிலிருந்து நாம் விளங்கலாம்.

    பூமி கடுமையான நடுக்கத்திற்கு உள்ளாக்கப்படும் போது மேலும் மலைகள் நூளாக்கப்பட்டு பரப்பப்பட்ட புழுதியாக அது மாறும். அப்போது நீங்கள் மூன்று பிரிவினர்களாகி விடுவீர்கள். (அல்குர்ஆன் 56:5,6)

    மக்கள் மூன்று பிரிவினர்களாகப் பிரியும் போது, அதாவது இரண்டாவது சூர் ஊதப்படும் போது, தான் இப்பூமியில் மாபெரும் அதிர்ச்சி ஏற்பட்டு மலைகள் தூளாகும் என்பதை அவ்வசனங்கள் கூறுகின்றன.

    இப்பூமி கடும் அதிர்ச்சிக்கு உட்படுத்தப்படும் போது, மேலும் இப்பூமி, தன் சுமைகளை வெளிப்படுத்தும் போது, இதற்கு என்ன நேர்ந்தது என்று மனிதன் கேட்கும் போது, உமது இறைவன் இதற்குக் கட்டளையிட்டதால் அந்நாளில் அது தன் செய்திகளை அறிவிக்கும். அந்நாளில் மக்கள் தமது செயல்கள் காண்பிக்கப்படுவதற்காகப் பல பிரிவினர்களாக ஆவார்கள். (அல்குர்ஆன் 99:1,2)

    மக்கள் தமது செயல்களுக்குரிய பிரதிபலனுக்காக நிறுத்தப்;படும் நாளில் – அதாவது இரண்டாவது சூர் ஊதப்படும் நாளில் – தான் பூமி அழிக்கப்படும் என்பதை இந்த வசனங்களும் கூறுகின்றன.

    வானம் உருக்கப்பட்ட செம்பைப் போல் ஆகும் அந்நாளில் இன்னும் மலைகள் பஞ்சு போல் ஆகிவிடும் அந்நாளில் ஒரு நண்பன் மற்றொரு நண்பனைப் பற்றி விசாரிக்க மாட்டான். (அல்குர்ஆன் 70:8,9,10)

    ஒருவன் மற்றவனைக் கண்டு அவனைப் பற்றி விசாரிக்காமல் செல்லும் நாளில் – அதாவது இரண்டாம் சூர் ஊதப்பட்டு உயிர்ப்பிக்கப்பட்ட பின் – தான் வானம் உருக்கப்பட்ட செம்பு போல் மாறி மலைகள் பஞ்சாய் பறக்கும் என்பதை இந்த வசனங்களும் கூறுகின்றன.

    சூரியன் சுருட்டப்படும் போது, நட்சத்திரங்கள் உதிர்ந்து விழும்; போது, மலைகள் பெயர்க்கப்படும் போது, சூல் நிறைந்த ஒட்டகங்கள் (கவனிப்பாரற்று) விடப்படும் போது, காட்டு மிருகங்கள் ஒன்று சேர்க்கப்படும் போது, கடல்கள் தீ மூட்டப்படும் போது, உயிர்கள் (உடலுடன்) ஒன்று சேர்க்கப்படும் போது, உயிருடன் புதைக்கப்பட்டவர் எந்தக் காரணத்துக்காகக் கொல்லப்பட்டார் என்று விசாரிக்கப்படும் போது, ஏடுகள் விரிக்கப்படும் போது, வானங்கள் அகற்றப்படும் போது, நரகம் கொழுந்து விட்டு எறியுமாறு செய்யப்படும் போது, சொர்க்கம் சமீபமாகக் கொண்டுவரப்படும் போது, ஒவ்வொரு ஆத்மாவும் தாம் கொண்டுவந்ததை அறிந்து கொள்ளும். (அல்குர்ஆன் 81:1-14)

    மனிதன், காட்டுமிருகங்கள், ஒட்டகங்கள் ஆகியவை உயிர்ப்பிக்கப்பட்டு விசாரிக்கப்பட்டு ஒவ்வொருவரும் தத்தமது செயல்களின் பலன்களை அடையும் அந்த நாளில் தான், அதாவது இரண்டாவது சூர் ஊதப்பட்ட பின்புதான், சூரியன் நட்சத்திரங்கள், கடல்கள், மலைகள், வானங்கள் ஆகியவை அழிக்கப்படும் என்பதை இந்த வசனங்களும் கூறுகின்றன.

    ‘வானம் பிளந்து விடும் போது நட்சத்திரங்கள் உதிர்ந்து விழும் போது, கடல்கள் அகற்றப்படும் போது, ஒவ்வோர் ஆத்மாவும் தான் செய்ததை அறிந்து கொள்ளும்’. (அல்குர்ஆன் 82:1-5)

    இந்த வசனங்களும் அதே கருத்தை கூறுவதை யாரும் அறியலாம்.

    ‘அந்நாளில் சிதறடிக்கப்பட்ட ஈசல்களைப் போன்று மனிதர்கள் அகிவிடுவர். மேலும் மலைகள் உதிர்க்கப்பட்ட பஞ்சுபோல் ஆகும்’. (அல்குர்ஆன் 10:4,5)

    ‘இந்த பூமி வேறு பூமியாகவும் (மாற்றப்பட்டு) வானங்களும் மாற்றப்படும் அந்நாளில் அடக்கியாளும் ஏகனாகிய அல்லாஹ்வின் முன்னிலையில் (மக்கள்) நிற்பார்கள்’. (அல்குர்ஆன் 14:48)

    மனிதனைத் திரும்பவும் உயிர்ப்பிக்கும் அந்த நாளில் தான் இந்த பூமி, வானம் அழிக்கப்பட்டு வேறு பூமியும் வானங்களும் ஏற்படுத்தப்படும் என்பதை இந்த வசனங்களும் ஐயத்திற்கிடமின்றி அறிவிக்கின்றன.

    ‘வானம் பிளந்து விடும் போது தனது (இறைவனின் ஆணைக்கு கட்டுப்படுவது) கடமையாக்கப்பட்டுள்ள நிலையில் தன் இறைவனின் கட்டளைக்கு (அந்த வானம்) அடிபணியும் போது, இன்னும் பூமி விரிக்கப்பட்டு அது தன்னில் உள்ளவற்றை வெளியாக்கி அது காலியாகி விடும்போது, தனது (இறைவனின் ஆணைக்கு கட்டுப்படுவது) கடமையாக்கப்பட்டுள்ள நிலையில் தன் இறைவனின் கட்டளைக்கு (அந்த பூமி) அடிபணியும் போது,

    மனிதனே! நிச்சயமாக நீ இறைவனிடம் சேரும் வரை முனைந்து உழைப்பவனாக இருக்க உழைக்கின்றாய். பின்னர் அவனைச் சந்திப்பவனாக இருக்கின்றாய். ஆகவே எவனுடைய பட்டோலை அவனுடைய வலக்கையில் கொடுக்கப்படுகின்றதோ அவன் சுலபமான விசாரணையாக விசாரிக்கப்படுவான்’. (அல்குர்ஆன் 84:1-8)

    ‘நிச்சயமாக உங்களுக்கு வாக்களிக்கப்பட்டது நிகழ்வதேயாகும்.

    இன்னும் நட்சத்திரங்கள் அழிக்கப்படும் போது

    மேலும் வானம் பிளக்கப்படும் போது

    மலைகள் (தூசிகளைப் போல்) பறக்கடிக்கப்படும் போது

    தூதர்களுக்கு தத்தம் சமூகத்தாருக்காக சாட்சியம் கூற

    நேரம் குறிக்கப்படும் போது

    எந்த நாள் வரை (இவையெல்லாம்) பிற்படுத்தப்பட்டிருக்கின்றன?

    தீர்ப்புக்குரிய நாளுக்காகத்தான்’. (அல்குர்ஆன் 77:7-13)

    ‘கியாம நாள் எப்போது வரும்? என்று (ஏளனமாகக்) கேட்கிறான்

    ஆகவே, பார்வையும் மழுங்கி

    சந்திரன் ஒளியும் மங்கி

    சூரியனும் சந்திரனும் ஒன்று சேர்க்கப்பட்டு விடும்

    அந்நாளில் (தப்பித்துக் கொள்ள) எங்கு விரண்டோடுவது?

    என்று மனிதன் கேட்பான்

    இல்லை, இல்லை! தப்ப இடமேயில்லை (என்று கூறப்படும்)

    அந்நாளில் உம் இறைவனிடம் தான் தங்குமிடம் உண்டு.

    அந்நாளில் மனிதன் முற்படுத்தி (அனுப்பி)யதையும் (உலகின்) பின்

    விட்டு வைத்ததையும் பற்றி அறிவிக்கப்படுவான்’. (அல்குர்ஆன் 75:6-13)

    நிச்சயமாக அவர்கள் அதை வெகுதூரமாகக் காண்கின்றனர்

    ஆனால் நாமோ அதனை வெகுசமீபத்தில் காண்கிறோம்.

    வானம் உருக்கப்பட்ட செம்பைப் போல் ஆகிவிடும் – நாளில்

    இன்னும் மலைகள் பஞ்சைப் போல் ஆகிவிடும் (நாளில்)

    (அனுதாபமுடையவர்களாக இருந்த) ஒரு நண்பன் மற்றொரு

    நண்பனைப் பற்றி (அனுதாபத்துடன்) விசாரிக்க மாட்டான்.

    அவர்கள் நேருக்கு நேர் காண்பார்கள். (ஆனால் விசாரித்துக் கொள்ள மாட்டார்கள்)

    அந்நாளின் வேதனைக்க ஈடாக

    குற்றவாளி ஈடுகொடுக்கப் பிரியப்படுவான்,

    தன் மக்களையும் தன் மனைவியையும் தன் சகோதரனையும்

    அவனை அரவணைத்துக் கொண்டிருந்த அவனுடைய சுற்றத்தாரையும்

    இன்னும் பூமியிலுள்ள அனைவரையும் (ஈடு கொடுத்துத்)

    தன்னைக் காப்பாற்றிக் கொள்ளப் (பிரியப்படுவான்) (அல்குர்ஆன் 70:6-14)

    ‘எனவே சூரில் ஊதல் ஒரு முறை ஊதப்படும் போது, இன்னும் பூமியும் மலைகளும் தூக்கி (எறியப்பட்டு) பின்னர் ஒன்றோடொன்று மோதி அவை இரண்டும் ஒரே தூளாக ஆக்கப்பட்டால் –
அந்த நாளில் தான் நிகழ வேண்டிய (மாபெரும் சம்பவம்) நிகழும். வானமும் பிளந்து அந்நாளில் அது அடியோடு தன் சக்தியை இழந்து விடும்.

    இன்னும் மலக்குகள் அதன் கோடியிலிருப்பார்கள். அன்றியும் அந்நாளில் உம்முடைய இறைவனின் அர்ஷை (வானவர்) எட்டுப் பேர் தம் மேல் சுமந்திருப்பார்கள்.
(மானிடர்களே!) அந்நாளில் நீங்கள் (இறைவன் முன்) கொண்டு போகப்படுவீர்கள், மறைவான உங்களுடைய எந்த விஷயமும் அவனுக்கு மறைந்து விடாது’. (அல்குர்ஆன் 69:13-18)

    இன்னும் இது பற்றிக் கூறுகின்ற எல்லா வசனங்களும் மனிதன் உயிர்ப்பிக்கப்படும் நாளில் தான் இவ்வுலகம் முழுமையாக அழியும் என்பதைக் கூறுகின்றன.

    நாம் விரிவுரை செய்து கொண்டிருக்கும் இந்த அத்தியாயத்தில் இந்த விபரங்கள் தெளிவாகக் கூறப்படுகின்றன.
முதலாவது சூரின் போது அனைத்தும் அழிக்கப்பட்டு விடும் என்று பெரும்பாலான அறிஞர்கள் கருதுவதால் அந்தத் தவறான கருத்தை மறுக்க இதை நாம் விரிவாக விளக்கியுள்ளோம். எனவே இரண்டாவது சூர் ஆக்குவதற்கானது என்று பொதுவாகக் கூற முடியாது. இனி அந்த நாளில் நடை பெறும் நிகழ்ச்சிகளைக் காண்போம்.

78:5 வானம், பூமி, மலை, கடல் ஆகியவை இரண்டாவது சூரின் போது தான் அழியும்

வானம், பூமி, மலை, கடல் ஆகியவை இரண்டாவது சூரின் போது தான் அழியும்

    ‘அவ்வாறன்று, அவர்கள் சீக்கிரமே அறிந்து கொள்வார்கள். மேலும் அதிசீக்கிரத்தில் அறிந்து கொள்வார்கள்’. (அல்குர்ஆன் 78:4-5)

    கியாமத் நாள் குறித்து அன்றைய இஸ்லாமிய எதிர்ப்பாளர்கள் ‘அந்நாளில் அப்படி என்னதான் நிகழ்ந்து விடும்?’ எனவும் கேள்வி எழுப்பி வந்தனர். இந்தக் கேள்விக்கு திருக்குர்ஆன் பல இடங்களில் விரிவாகப் பதில் அளித்தாலும் இந்த அத்தியாயத்தில் சுருக்கமாக இந்தக் கேள்விக்கும் பதிலளிக்கப் படுகின்றது. அந்தப் பதிலின் ஒரு பகுதிதான் கீழே காணப்படும் இரு வசனங்கள்.

    ‘நிச்சயமாக தீர்ப்பு வழங்கும் (கியாமத்) நாள் நேரங் குறிக்கப்பட்டதாக இருக்கிறது. சூர் ஊதப்படும் அந்நாளில் நீங்கள் கூட்டம் கூட்டமாக வருவீர்கள்’. (அல்குர்ஆன் 78:17,18) இது அந்த வசனங்களின் பொருள்.

    குறிப்பிட்ட நேரம் வந்தவுடன் சூர் ஊதப்படும். சூர் ஊதப்பட்டவுடன் கூட்டம் கூட்டமாக விசாரணை மன்றம் நோக்கி மக்கள் விரைவார்கள் என்று இந்த வசனங்கள் கூறுகின்றன.

    இறந்து கிடக்கும் மனிதர்கள் உயிர் பெற்று எழுவது தான் இங்கே கூறப்படுகிறது. மனிதர்கள் எப்படி அழிந்து போவார்கள் என்ற விபரம் இந்த வசனங்களில் கூறப்பட வில்லை. 18:101, 36:51 வசனங்களிலும் உயிர்த்தெழுவது தான் கூறப்படுகின்றது.

    ஆயினும் மற்றொரு வசனத்திலும், நபிமொழிகளிலும் இரண்டு தடவைகள் சூர் ஊதும்போது அனைவரும் அழிந்து போவார்கள் என்றும், இரண்டாவது தடவை சூர் ஊதப்படும் போது அனைவரும் உயிர்த்தெழுவார்கள் என்றும் விபரமாகக் கூறப்பட்டுள்ளது.

    சூர் ஊதப்பட்டதும் வானங்களில் உள்ளவர்களிலும் பூமியில் உள்ளவர்களிலும் அல்லாஹ் நாடியவர்களைத் தவிர (மற்றவர்கள்) மூர்ச்சித்து விழுவார்கள். பிறகு இன்னொரு சூர் ஊதப்படும். அனைவரும் எழுந்து எதிர்நோக்கி நிற்பார்கள். (அல்குர்ஆன் 39:68)

    நாம் விரிவுரை செய்து செய்து கொண்டிருக்கும் வசனம் இரண்டாவது சூர் ஊதுவதைத்தான் குறிப்பிடுகிறது என்பதை இந்த வசனத்திலிருந்து அறியலாம். இந்த வசனத்தைத் தவிர சூர் பற்றிக் கூறும் எல்லா வசனங்களிலும் இரண்டாவது சூர் ஊதுவது மட்டுமே கூறப்படுகின்றது. முதலாவது சூர் அதிக முக்கியத்துவம் கொடுக்கப்படாததற்கு நியாயமான காரணங்கள் கூற முடியும்.

    அழிப்பதற்காக ஊதப்படும் சூர் ஆதம் (அலை) முதல் யுக முடிவு நாள் வரை வாழ்ந்த அனைவராலும் அறிந்து கொள்ள முடியாது. இறுதிக் காலத்தில் வாழ்ந்த மிகச் சிலர் மட்டுமே அதை உணர்வார்கள். அந்தக் காலத்துக்கு முந்திய காலத்தில் வாழ்ந்தவர்கள் வேறு வேறு வழிகளில் அழிந்து விட்டார்கள். ஆதம் (அலை) முதல் கடைசிக் காலம் வரை வாழ்ந்தவர்கள் ஒரு நேரத்தில் உயிர்த்தெழுவதால் இரண்டாவது சூர் ஊதுதலை அனைவரும் அறிவார்கள்.

    மேலும் மனிதன் கவனத்தில் கொள்ள வேண்டியதும் அஞ்ச வேண்டியதும் உயிர்த்தெழுந்து இறைவன் முன்னிலையில் நிற்க வேண்டியது பற்றித்தான் இருக்க வேண்டும். இதுபோன்ற காரணங்களுக்காக அது பற்றிப் பலமுறை இறைவன் கூறாமலிருக்கக் கூடும்.

    இனி சூர் ஊதுதல் பற்றி மேலும் சில விபரங்களை நாம் அறிந்து கொள்வோம்.

    சூர் என்றால் என்ன? நபி (ஸல்) அவர்கள் பின்வருமாறு விளக்கம் தருகிறார்கள்.

    சூர் என்பது (கொம்பு போன்ற வடிவிலமைந்த சப்தத்தை வெளிப்படுத்தும்) எக்காலமாகும். அதில் தான் ஊதப்படும் என்ற நபி (ஸல்) கூறியுள்ளார்கள். (அறிவிப்பவர்: அப்துல்லாஹ் பின் அம்ரு (ரலி), நூல்கள்: திர்மிதி, அபூதாவூத், தாரமி)

    சூர் என்பது இறைவனின் கட்டளைப்படி தானாக ஓசை யெழுப்புமா? அல்லது அதற்கென யாரேனும் நியமனம் செய்யப்பட்டுள்ளனரா? இதையும் நபி (ஸல்) அவர்கள் விளக்கியுள்ளனர்.

    சூர் ஊதுபவர் (வானவர்) தம் கையில் அதைப் பிடித்தவராக தலையைச் சாய்த்து ‘எப்போது ஊதுமாறு கட்டளையிடப்படும்’ என்று எதிர்பார்த்தவராக இருக்கிறார். இந்த நிலையில் நான் எவ்வாறு மகிழ்ச்சியுடன் இருக்க முடியும்? என நபி (ஸல்) கூறியுள்ளனர். (அறிவிப்பவர்: அபூஸயீத் அல்குத்ரீ (ரலி), நூல்: திர்மிதி)

    சூர் ஊதும் பணிக்காகவே ஒரு வானவர் நியமிக்கப்பட்டிருக்கிறார். அவருக்காக வேறு அலுவல் ஏதுமில்லை. எப்போது கட்டளை வரும் என எதிர்பார்த்தவராக கையில் சூர் வைத்துக் கொண்டு இருக்கிறார் என்ற விபரங்களை இந்த ஹதீஸ் விளக்குகிறது.

    அப்படியானால் சூர் ஊதும் பணிக்காக அமர்த்தப்பட்டவர் முதல் சூர் ஊதியதும் அழிந்து விடுவாரா? அழிந்து விட்டால் இரண்டாவது சூர் ஊதுபவர் யார்? இந்த சந்தேகத்திற்கு அல்லாஹ் மற்றொரு இடத்தில் விடையளிக்கிறான்.

    முதலாவது சூர் ஊதப்பட்டவுடன் மனிதர்களும் மற்றவர்களும் அழிந்து விட்டாலும் மலக்குகள் அழிய மாட்டார்கள்.

    முன்னர் நாம் எடுத்துக்காட்டிய 39:68 வசனத்தில் ‘அல்லாஹ் நாடியவர்களைத் தவிர’ என்ற சொற்றொடர் இடம் பெற்றுள்ளது. அல்லாஹ் நாடக்கூடிய சிலர் இந்த சூர் ஊதப்பட்ட பின் அழிய மாட்டார்கள் என்பது தெரிகின்றது. அல்லாஹ் நாடியவர்கள் என்போர் யார்? இதையும் திருக்குர்ஆன் விளக்கமாகக் கூறிவிடுகின்றது.

    ஒரு தடவை சூர் ஊதப்படும் போது பூமியும் மலைகளும் தூக்கப்பட்டு அவை ஒரேயடியாக துள்படுத்தப்படும் போது அந்நாளில் தான் நிகழவேண்டியது நிகழும். வானம் பிளந்து அந்நாளில் தன் சக்தியை இழந்து விடும். மேலும் மலக்குகள் வானத்தின் கோடியில் இருப்பார்கள். மேலும் அன்றைய தினம் என்மர் (எட்டு வானவர்கள்) உமது இறைவனின் அர்ஷைச் சுமந்து கொண்டிருப்பார்கள். (அல்குர்ஆன் 69:13-17)

    வானம் பிளந்து பலமிழந்து விட்டாலும் அதன் கடைக் கோடியில் மலக்குகள் இருப்பார்கள் என்பதும், எட்டு வானவர்கள் அர்ஷைச் சுமப்பார்கள் என்பதும் வானவர்கள் அழியமாட்டார்கள் என்பதற்கான சான்றுகள்!

    முதலாவது சூர் ஊதப்பட்டவுடன் அழிக்கப்பட்டவர்கள் உடனடியாக உயிர்த்தெழுவார்களா? அல்லது இரண்டுக்கு மிடையே கால வித்தியாசம் ஏதும் இருக்கிறதா? இதை நபி (ஸல்) அவர்கள் விளக்கியுள்ளனர்.

    இரண்டு சூர் ஊதுதலுக்குமிடையே நாற்பது இருக்கிறது என்பது நபி (ஸல்) கூறியதாக அபூஹுரைரா (ரலி) கூறினார்கள். மக்கள் அபூஹுரைராவிடம் நாற்பது நாட்களா? என்று கேட்டனர். அதற்கு அபூஹுரைரா (ரலி) தெரியாது என்றனர். நாற்பது மாதங்களா? என்று மக்கள் கேட்டனர். அதற்கும் தெரியாது என்று விடையளித்தனர். நாற்பது வருடங்களா? என்று கேட்டதற்கும் தெரியாது என்றே விடையளித்தனர். (நூல்கள்: புகாரி, முஸ்லிம்)

    அழிக்கப்பட்டதற்கும், உயிர்ப்பிக்கப்படுவதற்கும் நாற்பது ஆண்டுகள் அல்லது நாற்பது மாதங்கள் அல்லது நாற்பது நாட்கள் இடைவெளி இருக்கும் என்று அபூஹுரைரா (ரலி) ஐயத்துடன் கூறியிருந்தாலும் இரண்டும் உடனடியாக நடக்காது என்பது மட்டும் உறுதி.

    இந்த இடத்தில் ஒரு விஷயத்தை நினைவில் வைக்க வேண்டும். சூர் ஊதப்பட்டவுடன் மனித, ஜின் மற்றும் உயிரினங்கள் தாம் அழியும். வானம், பூமி, மலை, கடல் ஆகியவை இரண்டாவது சூரின் போது தான் அழியும். வேறு வானம் வேறு பூமி உருவாக்கப்பட்டு அங்கே தான் விசாரணை நடை பெறும். இதற்கான ஆதாரங்களை அடுத்த இதழில் காண்போம்.

78:5 கியாமத் நாள் எப்படி சாத்தியமாகும்?

கியாமத் நாள் எப்படி சாத்தியமாகும்?

    ‘அவ்வாறன்று, அவர்கள் சீக்கிரமே அறிந்து கொள்வார்கள். மேலும் அதிசீக்கிரத்தில் அறிந்து கொள்வார்கள்’. (அல்குர்ஆன் 78:4-5)

    அவர்கள் எதைப்பற்றி வினா எழுப்புகின்றனர்? அவர்கள் எதில் கருத்து வேறுபாடு கொண்டுள்ளனரோ அந்த மகத்தான செய்தியைப் பற்றியா (வினா எழுப்புகின்றனர்?) அவ்வாறன்று! அவர்கள் இனிமேல் அறிந்து கொள்வார்கள். மேலும் அதிசீக்கிரத்தில் அறிந்து கொள்வார்கள்.

    நபி (ஸல்) காலத்து மக்கள் மறுமை நாளைப்பற்றி ஐயம் கொண்டிருந்தனர். அதுபற்றி அடிக்கடி கேள்விகள் எழுப்பி வந்தனர்.

    1. அந்த நாள் எப்போது வரும்?

    2. அது எப்படி சாத்தியமாகும்?

    3. அப்படி என்ன தான் அந்த நாளில் நடந்து விடும்?

    இவையே அவர்களின் கேள்விகள். இம்மூன்று கேள்விகளில் முதல் கேள்விக்கு இறைவன் அளித்த விடையை இதுவரை கண்டோம். ‘அதை பின்னர் அறிந்து கொள்வார்கள்’ என்று கூறி அது எப்போது வருமென்பதை தன்னைத் தவிர வேறெவரும் அறிய முடியாது என்று விளக்கினான்.

    இரண்டாவது கேள்வி

    மனிதன் மரணித்து மண்ணோடு மண்ணாகி விடுகிறான். அவனது எலும்புகள் உட்பட அனைத்தும் அழிந்து பின்னர் அவன் எப்படித் திரும்பவும் உயிர் கொடுக்கப்பட்டு எழுப்பப்படுவான்? இதை எங்களால் நம்ப முடியவில்லையே? மறுமை நாள் குறித்து அவர்கள் எழுப்பிய இரண்டாவது கேள்வி இது!

    இவ்வாறு அவர்கள் கேள்வி எழுப்பியதைத் திருக்குர்ஆன் பல இடங்களில் சுட்டிக்காட்டுகின்றது.

    மக்கிய இந்த எலும்புகளை யாரால் உயிர்ப்பிக்க இயலும்? என்று மனிதன் கேட்கிறான். (அல்குர்ஆன் 37:78)

    நாங்கள் எலும்புகளாகவும், மக்கிய பொருட்களாகவும் ஆன பின்பு புதிய படைப்பாக எழுப்பப்படுவோமா என்ன? என்று அவர்கள் கேட்கின்றனர். (அல்குர்ஆன் 17:49, 17:98, 23:82, 37:15, 37:53, 56:47)

    ”நிச்சயமாக நீங்கள் மரணித்து மண்ணாகவும், எலும்புகளாகவும் ஆனபின்னர் நீங்கள் (மீண்டும்) வெளிப்படுத்தப் படுவீர்கள்’ என்று அவர் உங்களை எச்சரிக்கிறாரா? நீங்கள் எச்சரிக்கப்படுவது வெகு தூரம்! வெகு தூரம்!! நமது இவ்வுலக வாழ்வைத் தவிர வேறு வாழ்க்கை இல்லை. நாம் வாழ்ந்து மடிகிறோம். மீண்டும் நாம் எழுப்பப் படப்போகிறவர் அல்லர்’ (எனக் கூறுகின்றனர்.) (அல்குர்ஆன் 23:35,36,37)

    நாம் நிச்சயமாக மண்ணறைகளிலிருந்து எழுப்பப்படுவோமா? மக்கிய எலும்புகளாக நாங்கள் ஆகிவிட்டாலுமா? என்று அவர்கள் கேட்கின்றனர் (அல்குர்ஆன் 79:10,11)

    அவனது எலும்புகளை நாம் ஒன்று சேர்க்கவே மாட்டோம் என்று மனிதன் நினைத்துக் கொண்டிருக்கிறானா? (அல்குர்ஆன் 75:03)

    இறந்தவன் உயிர்பிக்கப்படுவதும் அவன் விசாரிக்கப்படுவதும் சாத்தியமே இல்லை என்று அவர்கள் கருதியதால் எப்படிச் சாத்தியமாகும் என்ற கேள்வியை எழுப்பி வந்தனர்.

    இந்த கேள்விக்கு திருக்குர்ஆனின் எனைய இடங்களில் விடையளித்திருக்கிறது! இந்த அத்தியாயத்திலும் விடையளிக்கிறது! இரண்டும் வௌ;வேறு விதமான விடைகள்!

    மக்கிப்போய் ஒன்றுமில்லாமல் ஆன பின் எப்படி உயிர்ப்பிக்கப்பட முடியும்? என்பது உங்கள் கேள்வி என்றால் ஒரு காலத்தில் நீங்கள் ஒவ்வொருவரும் ஒன்றுமில்லாமல் இருக்க வில்லையா? இன்ன பொருளாக இருந்தோம். இந்த இடத்தில் இருந்தோம். என்றெல்லாம் கூறமுடியாத நிலையில் நீங்கள் ஒவ்வொருவரும் ஒரு காலத்தில் இருந்ததில்லையா?

    ஒன்றுமில்லாத நிலையிலிருந்து தான் நீங்கள் ஆரம்பமாகப் படைக்கப்பட்டீர்கள்! ஒன்றுமில்லாமல் இருந்தால் கூட படைக்கப்பட முடியும் என்பதை இது உணர்த்த வில்லையா? ஒன்றுமில்லாத நிலையிலிருந்து முதன் முதலில் படைப்பது ஆச்சரியமானதா? ஒரு முறை படைத்து பின்னர் அழித்து அதையே மறுபடியும் படைப்பது ஆச்சரியமானதா? என்றெல்லாம் பொட்டில் அறைந்தாற்போல் ஏனைய இடங்களில் திருக்குர்ஆன் இந்த கேள்விக்கு விடையளித்தது.

    இந்த அத்தியாயத்தில் மனிதனின் சிந்தனையை தூண்டி நம்ப முடியாத அற்புதங்களை நினைவூட்டி மனிதன் இதில் ஆச்சரியப்பட ஏதுமில்லை என பதிலளிக்கப்படுகிறது!

    நாம் இப்பூமியை விரிப்பாக ஆக்கவில்லையா? (அல்குர்ஆன் 78:06)

    மலைகளை முளைகளாக நாம் ஆக்கவில்லையா? (அல்குர்ஆன் 78:07)

    மேலும் உங்களை ஜோடி ஜோடியாக நாம் படைக்க வில்லையா? (அல்குர்ஆன் 78:08)

    மேலும் உங்களின் தூக்கத்தை இளைப்பாறுதலாக நாம் ஆக்கவில்லையா? (அல்குர்ஆன் 78:09)

    இன்னும் இரவை உங்களுக்கு ஆடையாக நாம் ஆக்கவில்லையா? (அல்குர்ஆன் 78:10)

    மேலும் பகலை வாழ்க்கை வசதிகளைத் தேட ஏற்றதாக ஆக்கவில்லையா? (அல்குர்ஆன் 78:11)

    உங்களுக்கு மேல் பலமான ஏழு வானங்களை நாம் அமைக்கவில்லையா? (அல்குர்ஆன் 78:12)

    ஒளி வீசும் விளக்கையும் நாம் ஏற்படுத்தவில்லையா? (அல்குர்ஆன் 78:13)

    மேலும் கார்மேகங்களிலிருந்து மழையை நாம் இறக்கவில்லையா? (அல்குர்ஆன் 78:14)

    அதன் மூலம் தானியங்களையும், தாவரங்களையும் அடர்ந்த சோலைகளையும் ஏற்படுத்தினோம். (அல்குர்ஆன் 78:15,16)

    அவர்களின் கேள்விக்கு இந்த கேள்விகளையே இறைவன் பதிலாகத் தருகிறான்.

    மக்கி மண்ணோடு மண்ணாக கலந்து விட்டவர்களை உயிருள்ள மனிதனாகப் படைப்பது உங்களால் முடியாது தான், உங்களில் மிகவும் பலசாலிகளாலும் முடியாதுதான். வரம்புக்குட்பட்ட ஆற்றலுள்ள மனித சமுதாயம் முழுவதும் முயன்றால் கூட அது முடியாதுதான்.

    உங்களை விட பன்மடங்கு பெரியதான இநதப் பூமியை படைத்து அதை உருண்டை வடிவமாக்கி, அந்தரத்தில் மிதக்க விட்டு, அதைப் படுவேகமாக சுழலவிட்டு அதைவிடவும் வேகமாக அது சூரியனைச் சுற்றி வருமாறு அமைத்து, அந்தச் சுழற்சியையும், சுற்றுதலையும் நீங்கள் உணரமுடியாத வகையில் – தொட்டிலில் ஆடும் குழந்தை அந்த ஆட்டத்தை உணராதிருப்பது போன்று – அமைந்திருக்கின்ற சர்வ சக்தனுக்கு உங்களைத் திரும்பப் படைப்பது இயலாத ஒன்றாகி விடுமா? இதைச் செய்யப் போகிறவன் யார்? அவனது வல்லமை எத்தகையது என்பதை நீங்கள் அறிந்தால் இவ்வாறு ஆட்சேபனை எழுப்புவீர்களா?

    நீங்கள் வாழ்வதற்கு ஏற்ற வகையில் அதே பூமியின் சில பகுதிகளை மிருதுவாகவும் சில பகுதிகளை அடர்த்தியாகவும் சில பகுதிகளை மண்ணாகவும் மற்றும் சில பகுதிகளை தண்ணீராகவும் படைத்து அதை சமன் செய்வதற்காக மலைகளையும் ஆங்காங்கே முளைக்கச் செய்த இறைவனுக்கு இது சாத்தியமாகாது என்கிறீர்களா?

    நீங்கள் பல்கிப் பெருகுவதற்காக உங்களை ஆண்-பெண் என ஜோடிகளாகப் படைத்து அவ்விருவரும் ஒருவரை ஒருவர் ஈர்க்கக்கூடிய நிலையை ஏற்படுத்தி, அந்த ஈர்ப்பினால் இருவரையும் இணையச் செய்து, அந்த இணைப்பில் வார்த்தையில் வடிக்க இயலாத இன்பத்தை வைத்து, கண்ணுக்குத் தெரியாத சிறுதுளியை ஒருவரிடமிருந்து மற்றவருக்குச் செலுத்தி உங்களை படைத்த கடவுளுக்கு இது இயலாது என்று கூறுகிறீர்களா?

    எவ்வளவு கிடைத்தாலும் போதாது என்று கருதும் எண்ணத்தைக் கொடுத்து, அந்த எண்ணத்தினால் சுறுசுறுப்பாக மனிதனை இயங்க வைத்து, அந்த இயக்கத்திற்கு ஏற்றவாறு பகல் பொழுதைப் படைத்து, அந்தச் சுறுசுறுப்பு வரம்பு மீறிப்போய் ஓய்வு ஒழிச்சலின்றி உழைத்து மனநோய்க்கு ஆளாகாமலும், உடல் நலத்தைக் கெடுத்துக் கொள்ளாமலும் இருப்பதற்காக இரவை ஏற்படுத்தி அந்த இரவில் ஓய்வைத் தேடக் கூடிய உணர்வையும் ஏற்படுத்திய அந்த நுண்ணறிவாளனுக்குக் கூட இந்த ஆற்றல் இருக்காது என்கிறீர்களா?

    மனிதன் எட்டிப்பார்க்க இயலாத உயரத்தில் பலமான வானங்களை மிகவும் பிரம்மாண்டமான கூரைகளை ஏற்படுத்தி அதனால் எண்ணற்ற நன்மைகளை ஏற்படுத்திய ஆற்றலுடையவனுக்குக் கூட இது சாத்தியமற்றது என்கிறீர்களா?

    உங்களுக்கு வெளிச்சத்தைத் தருவதற்காக சூரியனைப் படைத்து, மனிதனும், தாவரங்களும் வாழவும், வளரவும் வழி ஏற்படுத்தி மனிதன் பயன்படுத்தும் கழிவு நீரை உறிஞ்சி சுத்தமாக்கி நீராவியாக உயரே கொண்டு சென்று தூய நீராக மீண்டும் பூமிக்குத் திருப்பி அனுப்பி அதன் மூலம் பயிர்களை வளரச் செய்த வல்லமை மிக்கவனுக்கு இது இயலாத காரியமா?

    வரண்டு செத்து விட்ட பூமிக்கு உயிர் கொடுப்பதும் இங்கிருந்த தண்ணீரை இல்லாமலாக்கி மறுபடியும் வரச் செய்வதும் மனிதன் உயிர்ப்பிக்கப்படுதல் சாத்தியம் என்பதை உங்களுக்கு விளக்கவில்லையா?
மேற்கண்ட வசனங்கள் மூலம் இத்தகைய கேள்விகளை எழுப்பி இது சாத்தியமான ஒன்றே என இறைவன் பிரகடனம் செய்கிறான்.

    இறைவன் ஒருவன் இருக்கிறான் என்பதை புரிந்து கொண்டால், அந்த இறைவன் எல்லாவிதமான பலவீனங்களிலிருந்தும் தூயவன் என்பதையும் அறிந்து கொண்டால், அவனது அதிகாரத்திற்கும், ஆற்றலுக்கும் எந்த எல்லையும் கிடையாது என்பதை விளங்கிக் கொண்டால், தனது வல்லமையை உலகறியச் செய்யும் வகையில் அவன் படைத்து வைத்திருக்கின்ற அதியசயங்களைப் பற்றி சிந்தித்தால் ‘எப்படி உயிர்ப்பிக்க முடியும்’ என்று நீங்கள் கேட்க மாட்டீர்கள். எப்படி என்பதைச் சிந்திப்பதை விட இதைச் செய்யக் கூடியவன் எத்தகையவன் என்பதை சிந்தியுங்கள்!

    அவ்வாறு சிந்தித்தால் மனிதன் மண்ணோடு மண்ணாக மக்கி ஒன்றுமற்றுப் போனாலும் அந்த வல்லவனால் மீண்டும் அவனை உருவாக்க முடியும் என்பதை ஐயமற உணர்வீர்கள்!

    மேற்கண்ட வசனங்கள் மூலம் இதைத்தான் அவர்களின் இரண்டாவது கேள்விக்குரிய விடையாக இறைவன் தருகிறான்.

    இனி அவர்களின் மூன்றாவது கேள்வியையும் அதற்கு இறைவன் அளிக்கும் விடையையும் இனி காண்போம்.

78:5 புகை மூட்டம்,பூகம்பம்,பெருநெருப்பு இறுதிநாளின் அடையாளம்

புகை மூட்டம்,பூகம்பம்,பெருநெருப்பு இறுதிநாளின் அடையாளம்

    ‘அவ்வாறன்று, அவர்கள் சீக்கிரமே அறிந்து கொள்வார்கள். மேலும் அதிசீக்கிரத்தில் அறிந்து கொள்வார்கள்’. (அல்குர்ஆன் 78:4-5)

    யுகமுடிவு நாள் நெருங்கும் போது ஏற்படக்கூடிய பத்து அடையாளங்களில் தஜ்ஜால், ஈஸா (அலை), யஃஜுஜ், மஃஜுஜ் கூட்டத்தினர் ஆகியோரின் வருகை, அதிசயப்பிராணி, சூரியன் மேற்கிலிருந்து உதிப்பது ஆகிய ஐந்து அடையாளங்களை இது வரை கண்டோம். இனி ஏனைய அடையாளங்களைக் காண்போம்.

    புகை மூட்டம்

    யுகமுடிவு நாளின் நெருக்கத்தில் வானத்திலிருந்து புகைப்படலம் இறங்கும். அது சாதாரண புகையாக இருக்காது. மாறாகக் கடுமையான வேதனையளிப்பதாக அந்தப் புகை அமைந்திருக்கும் என்று திருக்குர்ஆனும் நபிமொழிகளும் அறிவிக்கின்றன.

    ‘வானம் தெளிவான புகையை வெளிப்படுத்தக்கூடிய நாளை எதிர்பார்ப்பீராக! அப்புகை மனிதர்களைச் சூழ்ந்து கொள்ளும். இது கடுமையான வேதனையாக அமைந்திருக்கும்’ (அல்குர்ஆன் 44:10,11)

    உங்கள் இறைவன் உங்களுக்கு மூன்று விஷயங்களைப் பற்றி எச்சரிக்கிறான். அவற்றில் ஒன்று புகை மூட்டம். மூமினை இப்புகை ஜலதோஷம் பிடிப்பது போல் பிடிக்கும். காபிரைப் பிடிக்கும் போது அவன் ஊதிப்போவான். அவனது செவிப்பறை வழியாக புகை வெளிப்படும். இரண்டாவது (அதிசயப்) பிராணி மூன்றாவது தஜ்ஜால் என்று நபி (ஸல்) கூறியுள்ளனர். (அறிவிப்பவர்: அபூமாலிக் (ரலி), நூல்: தப்ரானி)

    பத்து அடையாளங்களைக் நீங்கள் காணும் வரை கியாமத் நாள் ஏற்படாது என்று நபி (ஸல்) கூறிய ஹதீஸை முன்னர் குறிப்பிட்டுள்ளோம். அந்த பத்து அடையாளங்களில் ஒன்றாக புகை மூட்டத்தையும் நபி (ஸல்) குறிப்பிட்டுள்ளதை இந்த இடத்தில் சேர்த்துக் கொள்க!

    அப்புகையை காபிர்கள் சுவாசிக்கும் போது அப்புகை அவர்களின் காதுகள் வழியாக வெளியேறும் என்றும், அதனால் அவர்களின் உடல் ஊதிவிடுமென்றும் அவர்களுக்கு அதனால் மிகப்பெரிய வேதனை ஏற்படுமென்றும் இந்த ஆதாரங்கள் கூறுகின்றன.

    மூன்று பூகம்பங்கள்

    யுகமுடிவு நாளின் நெருக்கத்தில் மிகப்பெரிய அளவில் நிலச்சரிவுகளும், பூகம்பங்களும் ஏற்படும். மனிதர்கள் உயிருடன் புதையுண்டு போவர்.

    (மதீனாவின்) கிழக்கே ஒரு பூகம்பம், மேற்கே ஒரு பூகம்பம், அரபு தீபகற்பத்தில் ஒரு பூகம்பம் ஆகிய மூன்று பூகம்பங்களை நீங்கள் காண்பது வரை யுகமுடிவு நாள் ஏற்படாது என்பது நபிமொழி. (அறிவிப்பவர்: ஹுதைபா (ரலி), நூல்: முஸ்லிம்)

    உலகில் ஆங்காங்கே பூகம்பங்களும் அவ்வப்போது ஏற்பட்டு வருகின்றன என்றாலும் நபி (ஸல்) அவர்கள் குறிப்பிடக்கூடிய இந்த பூகம்பங்கள் மிகவும் பிரமாண்டமானவையாக அமைந்திருக்கும்.

    இம்மூன்று பூகம்பங்களையும் நபி (ஸல்) அவர்கள் மூன்று தனி அடையாளங்களாகக் கூறியுள்ளனர். இம்மூன்றையும் சேர்த்து இது வரை ஒன்பது அடையாங்களை நாம் விளக்கியுள்ளோம்.

    பெரு நெருப்பு

    எமன் நாட்டில் மிகப்பெரும் நெருப்பு ஏற்பட்டு, அந்நெருப்பு கொஞ்சம் கொஞ்சமாகப் பரவி மொத்த உலகையும் அந்நெருப்பு சூழ்ந்து கொள்ளும். யாராலும் அணைக்க முடியாத அந்நெருப்பு பரவ ஆரம்பித்ததும் மக்கள் தத்தமது ஊரைக் காலி செய்து விட்டு ஓட ஆரம்பிப்பார்கள். நெருப்பும் அவர்களை விரட்டிச் செல்லும். முடிவில் எந்த இடத்தில் அவர்கள் ஒன்று சேர்க்கப்படுவார்களோ அந்த இடத்தை அடைவார்கள்.

    ‘எமனிலிருந்து நெருப்பு தோன்றி மக்களை அவர்களது மஹ்ஷரின் பால் விரட்டிச் செல்லும் – அது வரை கியாமத் நாள் எற்படாது’ என்பது நபிமொழி. (அறிவிப்பவர்: ஹுதைபா (ரலி), நூல்: முஸ்லிம்)

    யுகமுடிவு நாளின் நெருக்கத்தில் ஏற்படக்கூடிய பத்து அடையாளங்களையும் ஒரளவு நாம் அறிந்து கொண்டோம்.

    மறுமை நாள் – மகத்தான செய்தி – பற்றி இது போன்ற அடையாளங்களைத் தான் அல்லாஹ் மனிதர்களுக்குக் கூறியிருக்கிறானே தவிர அது எப்போது ஏற்படும் என்பதை எவரும் அறிய முடியாது.

    ‘அவர்கள் எதைப் பற்றிக் கேட்கின்றனர். மகத்தான செய்தியைப் பற்றியா கேட்கின்றனர். அவ்வாறில்லை. இனி மேல் அவர்கள் அறிவார்கள்’ என்ற வசனம் காபிர்கள் கேட்கும் பல கேள்விகளுக்குப் பதில் கூறுகின்றது. அவற்றில் ஒரு பகுதியை இது வரை கண்டோம். இனி ஏனைய பதில்களைக் காண்போம்.

78:5 ஈஸா நபியின் வருகை ஓர் அதிசயம்

ஈஸா நபியின் வருகை ஓர் அதிசயம்

    ‘அவ்வாறன்று, அவர்கள் சீக்கிரமே அறிந்து கொள்வார்கள். மேலும் அதிசீக்கிரத்தில் அறிந்து கொள்வார்கள்’. (அல்குர்ஆன் 78:4-5)

    நபி (ஸல்) அவர்கள் மறுமை நாளின் மிக நெருக்கத்தில் ஏற்படக்கூடிய பத்து அடையாளங்களை நமக்கு முன்னறிவிப்புச் செய்துள்ளனர். தஜ்ஜாலின் வருகை, யஃஜுஜ் மஃஜுஜ் கூட்டத்தினரின் வருகை, மேற்கில் சூரியன் உதிப்பது, அதிசயப்பிராணியின் வருகை ஆகியவற்றை இதுவரை கண்டோம். ஈஸா (அலை) அவர்கள் இவ்வுலகுக்கு வருகை தருவதும் அந்தப் பத்து அடையாளங்களில் ஒன்றாகும்.

    இந்த அடையாளத்தைப் பற்றி அறிந்து கொள்வதற்கு முன்னர் அடிப்படை விஷயத்தை அறிந்து கொள்வது அவசியமாகும். ஏனெனில் ஈஸா (அலை) அவர்களின் வருகை விஷயத்தில் சிலர் சந்தேகம் கொள்கின்றனர். தர்க்கரீதியான சில விவாதங்களை முன் வைத்து ஈஸா (அலை) அவர்களின் வருகையை மறுக்கின்றனர்.

    அல்லாஹ்வும் அவனது தூதரும் ஒரு விஷயத்தைப் பற்றி முடிவு செய்து விட்டால் – அந்த முடிவு நமக்கு விருப்பமில்லாததாக இருந்தாலும் நமது அறிவு அதை ஏற்கத் தயக்கம் காட்டினாலும் இதை நம்ப வேண்டியது முஸ்லிம்களின் கடமையாகும். ஏனெனில் நமக்கு விருப்பமில்லாதவற்றை முடிவு செய்யும் அதிகாரம் இறைவனுக்கு உண்டு. நமது அறிவு ஏற்க மறுப்பதையும் செய்து காட்டும் வல்லமையும் அவனுக்கு இருக்கின்றது.

    இரண்டாயிரம் ஆண்டுகளாக ஒருவர் எப்படி உயிருடனிருக்க முடியும்? அவர் எதை உண்கிறார்? அவர் எப்படி மலஜலம் கழிக்கிறார்? என்பது போன்ற கேள்விகளை இத்தகையோர் கேட்கின்றனர்.சாதாரண நிலையில் இவ்வாறு நடப்பதில்லை என்பது உண்மைதான். அல்லாஹ் நாடினால் இவ்வாறு நடத்திக் காட்டுவது சந்தேகப்படக் கூடியதன்று. அதிசயமான ஒரு விஷயத்தை சாதாரண நிலையில் வைத்துப் பார்க்கக் கூடாது என்பதை உணர்ந்தால் இவ்வாறு கேட்க மாட்டார்கள்.

    ஈஸா (அலை) அவர்கள் தொட்டில் குழந்தையாக இருந்த போது பேசியதாக அல்லாஹ் கூறுகிறான். (3:45, 5:110) இதுவும் சாதாரணமாக நடப்பது கிடையாது. ஆயினும் இறைவன் அவ்வாறு கூறுவதால் அதில் குதர்க்கம் செய்வதில் நியாயம் இல்லை. இறந்தவர்களை உயர்ப்பித்தல் சாதாரணமாக நடக்கக் கூடியதன்று. ஆயினும் ஈஸா (அலை) அவ்வாறு செய்ததாக அல்லாஹ் கூறுவதால் அதை நம்பித்தான் ஆக வேண்டும். இறைவனின் வல்லமைக்கு முன்னே இது பெரிய விஷயமன்று. களிமண்ணால் பறவை செய்து அதை நிஜப்பறவையாக மாற்றுவதும் நடைமுறையில் சாத்தியமற்றவைதான் அதை அல்லாஹ் கூறுவதால் (3:49) அதையும் நம்பித்தான் ஆக வேண்டும். இது போல் பலநூறு விஷயங்களில் குதர்க்கமான கேள்விகள் கேட்க வழியுண்டு. ஆயினும் அல்லாஹ்வின் வல்லமையை உணர்ந்து அல்லாஹ்வின் வேதத்தில் நம்பிக்கை உள்ளவர்கள் இவற்றை நம்பத் தயங்க மாட்டார்கள். நம்பத் தயங்கினால் அல்லாஹ்வையும் அவனது வேதத்தையும் நம்பியவர்களாக முடியாது.

    இறைவல்லமையை மறந்து அதைக் கேலி செய்யும் போக்குடையவர்களின் குதர்க்க வாதங்களுக்கு நாம் இதையே பதிலாக்குவோம்.

    இதைத் தவிர குர்ஆனின் சில வசனங்களைக் கொண்டு ஈஸா (அலை) அவர்களின் வருகையை மறுப்பவர்களும் உள்ளனர். அவற்றுக்கு நாம் பதில் சொல்லக் கடமைப்பட்டிருக்கிறோம்.

    நான் உயிரோடிருக்கும் காலமெல்லாம் தொழுமாறும், ஸகாத் கொடுக்குமாறும் அல்லாஹ் எனக்கு போதித்துள்ளான். (19:31) என்று ஈஸா (அலை) கூறியதாக அல்லாஹ் கூறுகிறான்.

    ஈஸா (அலை) அவர்கள் இன்றளவும் உயிருடனிருந்தால் அவர்கள் இன்று வரை தொழ வேண்டும், ஸகாத் கொடுக்க வேண்டும். மக்களுடன் தொடர்பில்லாத அவர்கள் யாருக்கு எப்படி ஸகாத் கொடுப்பார்கள்? அவர்கள் ஸகாத் கொடுக்க வில்லை என்பது உறுதியானால் அவர்கள் உயிருடன் இப்போது இல்லை என்பதும் உறுதியாகின்றது என்பது இவர்களின் வாதம்.

    மேலோட்டமாகக் கேட்கும் போது இது நியாயமான வாதமாகவே படுகின்றது. சிந்திக்கும் போது இது அர்த்தமற்ற வாதம் என்பது புலனாகும்.

    அல்லாஹ்வின் எந்தக் கட்டளையானாலும் அதற்குரிய சூழ்நிலை இருக்கும் போது தான் நிறைவேற்ற வேண்டும் என்றே புரிந்து கொள்ள வேண்டும். ஒவ்வொரு இடத்திலும் அல்லாஹ் அதைக் கூறாவிட்டாலும் கூட அப்படித்தான் புரிந்து கொள்ள வேண்டும்.

    மூமின்களே! உங்கள் குரலை நபியின் குரலைவிட உயர்த்தாதீர்கள் (49:2) என்று அல்லாஹ் கூறுகிறான். மூமின்களே என்று அழைத்து இறைவன் கூறுவதால் இதை நாம் செயல்படுத்த வேண்டும். இதை எப்படி செயல்படுத்த இயலும்? நபியின் குரலைக் கேட்கும் காலத்தில் உள்ளவர்கள் மட்டுமே இதைச் செயல்படுத்த முடியும். மற்றவர்களுக்கு இது இயலாது. இதற்கான சூழ்நிலை இல்லை என்பதால் இதைச் செயல்படுத்தும் கடமை நமக்கு இல்லை என்று புரிந்து கொள்கிறோம். இங்கே வார்த்தையை மட்டும் வைத்துக் கொண்டு வரட்டுப் பிடிவாதம் பிடிப்பதில்லை. அல்லாஹ் ‘அதற்கான சூழ்நிலை இருக்கும் போது’ என்று கூறாவிட்டாலும் அதுதான் பொருள் என விளங்குகிறோம்.

    ஈஸா (அலை) அவர்கள் இப்பூமியில் வாழக்கூடிய காலத்தில் பொருள் வசதி பெற்றவராக இல்லாமலிருந்தால் அப்போதும் அவர்களால் ஸகாத் கொடுக்க முடியாது. அதனால் அவர்கள் இப்பூமியில் வாழ்ந்ததையே மறுத்து விடமுடியுமா? உயிருடன் உள்ளவரை ஸகாத் கொடுக்குமாறு அல்லாஹ் கட்டளையிடுகிறான் என்றால் அதற்குரிய வசதி வாய்ப்பு இருந்தால் என்றே புரிந்து கொள்ள வேண்டும். எனவே மேற்கண்ட வசனத்தை வைத்து ஈஸா (அலை) மரணித்து விட்டார்கள் என்று முடிவு செய்ய முடியாது.

    ஒவ்வொரு ஆத்மாவும் மரணத்தைச் சுவைத்தே தீரும் என்று அல்லாஹ் கூறுகிறான். (3:185, 21:35, 29:57) ஒவ்வொரு ஆத்மாவும் மரணத்தைச் சுவைத்தே தீரும் என்பதற்கு முரணாக ஈஸா (அலை) உயிருடன் உள்ளனர் என்பது அமைந்துள்ளது எனவும் அவர்கள் வாதிடுகின்றனர்.

    ஈஸா (அலை) அவர்கள் ஒருபோதும் மரணிக்கவே மாட்டார்கள் என்று கூறினால் இவர்கள் கூறக்கூடிய முரண்பாடு ஏற்படும். ஈஸா (அலை) அவர்கள் உயிருடன் உள்ளனர் என்று கூறக்கூடியவர்கள் ஈஸா (அலை) மரணிக்க மாட்டார்கள் என்று கூறுவதில்லை. அவர்கள் இவ்வுலகுக்கு வந்து வாழ்ந்து மரணத்தைத் தழுவுவார்கள் என்றே நம்புகின்றனர். மரணம் தாமதமாக வருகின்றது என்று தான் நம்புகின்றனரே தவிர மரணமே அவருக்கு வராது என நம்புவதில்லை. எனவே அந்த வசனத்தினடிப்படையில் ஈஸா (அலை) மரணித்து விட்டனர் என வாதிக்க முடியாது.

    ‘முஹம்மது அல்லாஹ்வின் தூதரைத் தவிர வேறில்லை, அவருக்கு முன்னர் தூதர்கள் சென்று விட்டனர்’ என்று அல்லாஹ் கூறுகிறான். (3:144) ஈஸா (அலை) அவர்கள் உட்பட எல்லாத் தூதர்களும் சென்று விட்டனர் என்பதையே இது காட்டுகிறது எனவும் அவர்கள் வாதிடுகின்றனர்.

    மேலும் நபி (ஸல்) அவர்கள் மரணமடைந்த போது சில நபித்தோழர்கள் அவர்களின் மரணத்தை நம்ப மறுத்தனர். அவர்களிடம் அபூபக்ர் (ரலி) அவர்கள் அந்த வசனத்தை ஓதிக் காட்டினார்கள். உடனே அந்த நபித்தோழர்கள் நபி (ஸல்) அவர்கள் மரணித்து விட்டதாக ஏற்றுக் கொண்டனர் என்று ஹதீஸ்கள் கூறுகின்றன.

    எல்லா நபிமார்களும் மரணித்து விட்டதாக இந்த வசனத்தை நபித்தோழர்கள் புரிந்து கொண்டிருந்தால் தான் நபியவர்களின் மரணத்தை நம்பியிருக்க இயலும். ஈஸா (அலை) மட்டும் மரணிக்கவில்லை என்று அம்மக்கள் நம்பியிருந்தால் இந்த வசனம் அவர்களின் தவறான நம்பிக்கையைப் போக்கியிருக்க முடியாது. ஈஸா (அலை) அவர்கள் உயிருடன் இருப்பதாக நம்பினால் அதே போல நபி (ஸல்) அவர்களும் உயிருடன் இருக்க முடியும் என்று நம்புவதற்கு தடை ஏதுமில்லை. எனவே இந்த வசனமும், இந்த நிகழ்ச்சியும் ஈஸா (அலை) அவர்கள் மரணித்து விட்டார்கள் என்பதை சந்தேகத்திற்கிடமின்றி அறிவிக்கின்றன எனவும் அவர்கள் வாதிடுகின்றனர்.

    ஈஸா (அலை) அவர்களின் வருகை பற்றிய ஆதாரங்கள் இல்லாத பட்சத்தில் இவர்களின் வாதம் வலுவானதுதான். ஆனால் ஈஸா (அலை) அவர்களின் வருகை பற்றிய பலமான ஆதாரங்கள் இருக்கின்றன. (அதைப் பின்னர் காணவுள்ளோம்)

    அவர்களின் வருகை பற்றி ஏனைய ஆதாரங்கள் உள்ளதால் மேற்கண்ட வசனங்களிலிருந்து ஈஸா (அலை) மட்டும் விதிவிலக்குப் பெற்றுள்ளனர் என்றே எடுத்துக் கொள்ள வேண்டும். இல்லை எனில், அவர்கள் வருவார்கள் என்று கூறக்கூடிய ஆதாரங்களை நிராகரிக்கும் நிலை ஏற்படும்.

    ஈஸா (அலை) மரணிக்கவில்லை என நபித்தோழர்கள் நம்பியிருந்தால் நபி (ஸல்) அவர்களின் மரணத்தையும் அவர்கள் நம்பியிருக்க மாட்டார்கள் என்ற வாதமும் ஏற்கக் கூடியதன்று. ஈஸா (அலை) அவர்களின் வருகையை நம்பக் கூடியவர்கள் அவர்கள் உயிருடனும் உடலுடனும் உயர்த்தப்பட்டார்கள் என்றே நம்புகின்றனர். உடல் இங்கே கிடக்க உயிர் மட்டும் உயர்த்தப்பட்டது என நம்புவதில்லை. நபித்தோழர்களும் இவ்வாறு நம்பியிருந்தால் அவர்கள் நபி (ஸல்) அவர்களின் மரணத்தை நம்புவதற்கு தடை ஏதுமில்லை. ஏனெனில் நபி (ஸல்) அவர்களின் உடல் கண் முன்னால் இருந்தது. அந்த உடலில் எந்த இயக்கமும் இல்லாமலிருந்ததும் அவர்களுக்குத் தெரிந்தது. ஈஸா (அலை) அவர்கள் உடலுடன் காணாமல் போனது போல் நபி (ஸல்) அவர்களும் உடலுடன் காணாமல் போயிருந்தால் ஈஸா (அலை) அவர்களைப் போலவே நபி (ஸல்) அவர்களும் உயிருடன் உள்ளதாக நம்பலாம். இரண்டுக்குமுள்ள வித்தியாசம் பளிச்சென்று தெரியும் போது ஈஸா நபியைப் போல் நபியவர்களையும் அவர்கள் கருத வேண்டியதில்லை.

    ஈஸா நபி இன்றளவும் உயிருடன் இருக்கிறார். நபி (ஸல்) அவர்கள் உயிருடன் இல்லை. எனவே எங்கள் ஈஸா நபியே உங்கள் நபியைவிடச் சிறந்தவர் என்று கிறித்தவர்கள் வாதம் செய்வதற்கு இந்த நம்பிக்கை உதவி செய்கிறது. எனவே கிறித்தவர்களின் வாயை அடைக்க ஈஸா நபியின் மரணத்தை நம்பியே ஆக வேண்டும் என்பதும் அவர்களின் வாதம்.

    இது முட்டாள்தனமான வாதமாகும். ஒரு நபிக்குக் கொடுக்காத சில சிறப்பை வேறொரு நபிக்கு அல்லாஹ் கொடுக்கலாம். கொடுத்திருக்கிறான். ஓரிரு சிறப்பு உள்ளதால் எல்லா வகையிலும் ஒருவர் சிறந்தவராக முடியாது.
ஈஸா நபி தந்தையின்றி அற்புதமான முறையில் பிறந்தார்கள். நபி (ஸல்) அவர்களோ தந்தையின் விந்துத்துளி மூலம் பிறந்தார்கள். அதனால் ஈஸா நபியே சிறந்தவர் என்று கூட கிறித்தவர்கள் வாதிடலாம். இதனால் ஈஸா நபி தந்தைக்குத் தான் பிறந்தார் என்று கூற வேண்டுமா?

    இவர்கள் கூறியது போல் கிறித்தவர்கள் வாதம் செய்தால் அந்த வாதத்தை அறிவுப்பூர்வமாக சந்திக்க இயலும்.

    எவ்வளவு காலம் ஒருவர் உயிருடன் இருக்கிறார் என்பதில் சிறப்பு ஏதுமில்லை. என்ன செய்திருக்கிறார் என்பதிலேயே சிறப்பு உள்ளது. இது பகுத்தறிவுள்ள அனைவரும் ஏற்கக்கூடிய வாதம் தான். இதை விளக்கமாக எடுத்துச் சொல்லி அவர்களின் வாதத்தை முறியடிக்க முடியும்.

    கர்த்தர் ஏசுவுக்கு அருளிய வேதம் இன்று வரை பாதுகாக்கப்பட வில்லை. தீமைக்கு எதிராக ஏசு போர் புரிந்ததாக வீர வரலாறு இல்லை. வாழ்வின் அனைத்துத் துறைகளுக்கும் சரியான தீர்வை ஏசு கூறியதாக பைபிள் கூறவில்லை. நபி (ஸல்) அவர்களுக்கோ இந்தச் சிறப்புக்கள் உள்ளன. இப்படி ஆயிரமாயிரம் சிறப்புக்களைக் கூறி அவர்களின் வாதத்தை முறியடிக்க முடியும். அவர்களின் தவறான வாதத்திற்காக சரியான உண்மையை மறுக்கத் தேவையில்லை.

    ஆக இது போன்ற வாதங்களை அலட்சியம் செய்து விட்டு ஈஸா (அலை)அவர்களின் வருகை சம்பந்தமான ஆதாரங்களைக் காண்போம்.

    இன்னும் மரியமின் குமாரரும், அல்லாஹ்வின் தூதருமான மஸீஹ் எனும் ஈஸாவை நாங்கள் கொன்று விட்டோம் என்று அவர்கள் கூறுவதாலும் அவர்கள் சபிக்கப்பட்டார்கள். அவர்கள் அவரைக் கொல்லவும் இல்லை, அவரை சிலுவையில் அறையவுமில்லை எனினும் அவர் (ஈஸா) அவர்களுக்குக் குழப்பமாக்கப்பட்டார். நிச்சயமாக இதில் முரண்படுவோர் இது பற்றி சந்தேகத்திலேயே உள்ளனர். வெறும் யூகத்தைப் பின்பற்றுவதைத் தவிர (சரியான) ஞானம் அவர்களிடம் இல்லை. நிச்சயமாக அவரை அவர்கள் கொல்லவே இல்லை. மாறாக அல்லாஹ் அவரைத் தன்னளவில் உயர்த்திக் கொண்டான். அல்லாஹ் வல்லமை மிக்கோனாகவும் ஞானமுடையோனாகவும் இருக்கிறான். (அல்குர்ஆன் 4:157,158)

    இவ்விரு வசனங்களையும் அல்லாஹ்வின் வல்லமையையும் உணர்ந்து, விதண்டாவாதமும் வார்த்தை ஜாலமும் செய்யாமல் சிந்தித்தால் இது கூறக்கூடிய உண்மையை யாரும் தெளிவாக அறியலாம்.

    ‘அவர்கள் அவரைக் கொல்லவில்லை’ என்பது அவர் மரணிக்கவில்லை என்பதை அறிவிக்காது. யூதர்கள் கொல்லவில்லை என்பதைத் தான் குறிக்கும். வேறுவழியில் அவர் மரணித்திருக்கலாம் என்பதை இவ்வசனம் மறுக்காது என்று இவர்கள் சமாதானம் கூறுகின்றனர். அத்துடன் அல்லாஹ் நிறுத்திக் கொண்டால் இவர்களது சமாதானம் பொருத்தமானதே. ‘மாறாக அவரைத் தன்னளவில் அல்லாஹ் உயர்த்திக் கொண்டான்’ என்று அல்லாஹ் கூறுகிறான். அவர்களும் கொல்லவுமில்லை. அவரைத் தன்னளவில் உயர்த்திக் கொண்டான் என்பதையும் சேர்த்து சிந்தித்தால் அவர் மரணிக்கவில்லை என்பது தெளிவாகும்.

    அவரை உயர்த்திக் கொண்டான் என்றால் அவரது அந்தஸ்தை உயர்த்திக் கொண்டான் என்று அவர்கள் விளக்கம் கூறி சமாளிக்கிறன்றனர்.

    அவருடைய உடல் சம்பந்தமாகப் பேசி வரும் போது திடீரென்று அந்தஸ்து என்று தாவுவது ஏற்புடையதாக இல்லை. அந்தஸ்து உயர்வு பற்றி இங்கே கூற வேண்டியதில்லை.

    அவரைக் கொல்லவில்லை. (கொல்லாத வகையில்) உயர்த்திக் கொண்டான் என்பது பொருத்தமாக அமைகின்றது.

    ஒரு வாதத்துக்காக அந்தஸ்து உயர்வு என்றே வைத்துக் கொள்வோம் வேறு பல சான்றுகள் இந்த வாதத்தை உடைத்து எரிகின்றன.

    நிச்சயமாக அவர் (ஈஸா) இறுதிநாளின் அடையாளமாவார். இதில் அறவே சந்தேகம் கொள்ளாதீர்கள். என்னைப் பின்பற்றுங்கள். இதுதான் நேரான வழியாகும். (அல்குர்ஆன் 43:61)

    ஈஸா (அலை) அவர்கள் இறுதிக்காலத்தின் அத்தாட்சியாவார் என்ற வாசகம் பலமுறை சிந்திக்கப்பட வேண்டிய ஒன்று. இது ஈஸா (அலை) அவர்களுக்கு முந்தைய வேதங்களில் சொல்லப்பட்டிருந்தால் எதையாவது கூறி சமாளிக்கலாம். இது நபி (ஸல்) அவர்களின் உம்மத்தினரை நோக்கி அல்லாஹ்வால் கூறப்படுகின்றது. கியாமத் நாளின் அடையாளம் என்றால் இனி மேல் அந்த அடையாளம் எற்பட வேண்டும் என்பதைத் தவிர வேறு அர்த்தம் அதற்கு இருக்க முடியாது. எப்போதோ இறந்து விட்ட ஒருவரைப் பற்றி இவ்வாறு கூற முடியாது.

    கியாமத் நாளின் அடையாளமாக அவர் திகழ்கிறார் என்ற குர்ஆன் வசனத்தை மனதிலிருத்திக் கொண்டு அவரை அல்லாஹ் தன்னளவில் உயர்த்திக் கொண்டான் என்பதைச் சிந்தித்தால் அந்தஸ்து உயர்வு என்ற அர்த்தத்துக்கு வருவது பொருத்தமாக இராது. அந்தஸ்து உயர்வு என்று சாதித்தால் கூட ‘மறுமை நாளின் அடையாளமாக அவர் திகழ்கிறார்’ என்பது மிகத் தெளிவாக இந்த உண்மையைக் கூறி விடுகின்றது. ஈஸா நபி மரணித்து விட்டார்கள் என்று கூறுவோர் இந்த வசனத்துக்கு ஏற்கத்தக்க எந்த விளக்கமும் கூறமுடியவில்லை. இப்படி ஒரு வசனம் இருப்பதைக் கண்டு கொண்டதாகவே அவர்கள் காட்டிக் கொள்வதில்லை.

    கியாமத் நாளின் அடையாளமாக அவர்கள் திகழ்கிறார்கள் என்பதை நபி (ஸல்) அவர்கள் மிகவும் அழகாக நமக்கு விளக்கியுள்ளனர்.

    ‘எனது உயிர் எவனது கைவசம் உள்ளதோ அவன் மீது ஆணையாக! மர்யமுடைய மகன் உங்களிடம் நீதி செலுத்துபவராக, தீர்ப்பு வழங்குபவராக இறங்குவார். சிலுவையை முறிப்பார். பன்றியைக் கொல்வார். ஜிஸ்யா வரியை நீக்குவார். வாங்குவதற்கு யாருமில்லாத அளவுக்கு செல்வம் கொழிக்கும்’ என்பது நபிமொழி. (அறிவிப்பவர்: அபூஹுரைரா (ரலி), நூல்கள்: புகாரி, முஸ்லிம்)

    நானே ஈஸா நபி என்று கூறிய பொய்யர்கள் சிலர் தோன்றினர். சிலுவை, பன்றி, ஜிஸ்யா என்பதற்கெல்லாம் நவீனமான விளக்கம் கூறி அதைத் தாங்கள் செயல்படுத்தியதாக கதையளந்தனர். ‘யாரும் வாங்காத அளவுக்கு செல்வம் கொழிக்கும்’ என்பதற்கு எந்த சமாதானமும் அவர்களிடம் இல்லை. இந்தப் பொய்யர்களின் காலத்தில் இத்தகைய நிலை ஏற்படவேயில்லை.

    முஸ்லிமில் இடம் பெறும் மற்றொரு அறிவிப்பில் ‘போட்டி, பொறாமை, கபடம் ஆகியவை எடுபட்டுப் போகும்’ என்று நபி (ஸல்) கூறியதாக இடம் பெற்றுள்ளது. இந்தப் பொய்யர்கள் வந்த போது இந்தத் தீய பண்புகள் முன்பை விட அதிகமானதே தவிர எடுபட்டுப் போகவில்லை.

    ‘அவர் இறங்கக் கூடிய காலத்தில் இஸ்லாத்தை தவிர எல்லா மதங்களையும் அல்லாஹ் அழிப்பான்’ என்று அபூதாவூதில் இடம் பெறும் ஹதீஸ் கூறுகிறது. அந்தப் பொய்யர்களின் காலத்தில் அப்படி நடக்கவில்லை.

    தஜ்ஜாலின் கொடுமை தலைவிரித்தாடும் போது தான் ஈஸா (அலை) இறங்குவார்கள்.

    தஜ்ஜாலின் நிலை இவ்வாறு இருக்கும் போது மர்யமின் மகன் மஸீஹை அல்லாஹ் அனுப்புவான். டமாஸ்கஸ் நகரின் கிழக்குப் பகுதியில் உள்ள வெள்ளை மனாரா(கோபுரம்)வுக்கருகில் அவர் இறங்குவார். இரண்டு வானவர்களின் சிறகுகள் மீது நன்மைகளை வைத்தவராக இறங்குவார். அவர் தலை குனிந்தால் தலையில் நீர் சொட்டும். தலையை உயர்த்தினால் முத்துப் போல் தண்ணீர் சிதறும்! அவரது மூச்சுக்காற்று அவரது பார்வையில் எட்டும் தூரம் வரை செல்லும். மூச்சுக் காற்று படுகின்ற எந்தக் காபிரும் சாகாமல் இருப்பதில்லை. பின்னர் தஜ்ஜாலைத் தேடுவார்கள். ‘லுத்’ (பைத்துல் முகத்தஸின் அருகிலுள்ள ஊர்) எனும் வாசலில் வைத்து அவனைக் கொல்வார்கள் என்றும் நபி (ஸல்) கூறியுள்ளார்கள். (அறிவிப்பவர்: நவ்வாஸ் பின் ஸம் ஆன் (ரலி) நூல்: திர்மிதி)

    இந்தப் பொய்யர்கள் மூலம் இவற்றில் எதுவும் நிறைவேறவில்லை.

    (ஈஸா (அலை) அவர்கள் தஜ்ஜாலைக் கொன்ற பின் ஏற்படக்கூடிய நிகழ்ச்சிகளை யஃஜுஜ் மஃஜுஜ் பற்றிக் கூறும் போது குறிப்பிட்டுள்ளோம். அதையும் பார்த்துக் கொள்க)

    ஈஸா (அலை) மரணித்து சில காலத்தில் யுகமுடிவு நாள் வந்து விடும் எனவும் நபி (ஸல்) கூறியுள்ளனர்.

யுகமுடிவு நாளின் மிக நெருக்கத்தில் ஏற்படவுள்ள நிகழ்ச்சிகளில் ஈஸா (அலை) அவர்களின் வருகையும் ஒன்றாகும் என்பதை முஸ்லிம்கள் நம்பியாக வேண்டும்.

78:5 மனிதர்களோடு பேசும் மிருகம்

மனிதர்களோடு பேசும் மிருகம்

    ‘அவ்வாறன்று, அவர்கள் சீக்கிரமே அறிந்து கொள்வார்கள். மேலும் அதிசீக்கிரத்தில் அறிந்து கொள்வார்கள்’. (அல்குர்ஆன் 78:4-5)

    யுக முடிவு நாள் மிகவும் அண்மித்து விடும் போது ஏற்படக்கூடிய பத்து அடையாளங்களில் ஒன்றான தஜ்ஜாலின் வருகை பற்றி ஓரளவு நாம் அறிந்து கொண்டோம். அவனது மரணம் ஈஸா (அலை) அவர்களுடன் சம்மந்தப்பட்டிருப்பதால் ஈஸா (அலை) அவர்களின் வருகையை விளக்கும் போது தஜ்ஜாலின் மரணம் பற்றி விரிவாக அறியலாம். இனி ஏனைய அடையாளங்களைப் பற்றியும் அறிந்து கொள்வோம்.

    அதிசயப் பிராணி

    யுக முடிவு நாளின் நெருக்கத்தில் அதிசயப் பிராணி ஒன்றை இறைவன் படைத்து மக்களிடையே அதை நடமாட விடுவான். அத்தகைய பிராணியின் வடிவம் பற்றி ஆதாரப்பூர்வமான ஹதீஸ்களில் விபரம் காணப்படா விட்டாலும் அத்தகைய பிராணி ஒன்று யுக முடிவு நாளின் நெருக்கத்தில் தோன்றும் என்பதற்கு திருக்குர்ஆனிலும் ஹதீஸ்களிலும் ஆதாரங்கள் கிடைக்கின்றன.

    அவர்களுக்கெதிரான தீர்ப்பு உறுதியாகும் போது இப்பூமியிலிருந்து ஒரு பிராணியை நாம் அவர்களுக்காக வெளிப்படுத்துவோம். அப்பிராணி அவர்களுடன் பேசும். (இதற்குக் காரணம்) மக்கள் நமது வசனங்களை நம்பாமல் இருந்தது தான். (அல்குர்ஆன் 27:82)

    இறை வசனங்களை மக்கள் நம்பாத மோசமான காலகட்டத்தில் அந்தப் பிராணி தோன்றும் எனவும் அது வானிலிருந்து இறக்கப்படாத இந்தப் பூமியிலேயே தோன்றும் எனவும் தஜ்ஜால் போன்று முன்பே படைக்கப்பட்டு அப்பிராணி மறைத்து வைக்கப்பட வில்லை, இனிமேல் தான் அது தோன்றவிருக்கின்றது எனவும் இந்த வசனத்திலிருந்து அறியலாம்.

    எத்தனையோ பிராணிகள் உலகில் உள்ளன. அவற்றிலிருந்து இப்பிராணி வித்தியாசப்படுகின்றது. எந்தப் பிராணியும் மனிதர்களுடன் பேசுவதில்லை. இந்த அதிசயப்பிராணியோ மக்களுடன் பேசக்கூடியதாகப் படைக்கப்படும் என்பதையும் இந்த வசனத்திலிருந்து நாம் அறிய முடியும்.

    பத்து அடையாளங்களில் ஒன்றாக இந்த அதியசப்பிராணியும் உள்ளது என்ற ஹதீஸை முன்னரே நாம் குறிப்பிட்டுள்ளோம்.

    சூரியன் மேற்கிலிருந்து உதிப்பதும் நண்பகல் நேரத்தில் அந்தப் பிராணி மக்களுக்குக் காட்சி தருவதும் ஆரம்ப அடையாளங்களாகும். இவ்விரண்டில் எது முதலில் தோன்றினாலும் அதைத் தொடர்ந்து அடுத்ததும் தோன்றிவிடும் என்பது நபி மொழி. (அறிவிப்பவர்: அப்துல்லாஹ் பின் அம்ரு (ரலி), நூல்: முஸ்லிம்)

    இவற்றைத் தவிர அப்பிராணி பற்றி மேலதிகமாக ஆதாரப்பூர்வமான ஹதீஸ்களில் நாம் காணமுடியவில்லை.

    மனிதர்களின் கற்பனைக்கு எட்டக்கூடிய வடிவில் முன்பே மனிதர்கள் அறிந்து வைத்திருக்கின்ற ஏதேனும் மிருகத்தின் வடிவில் அப்பிராணியின் வடிவம் அமைந்திருக்குமென்றால் அதை அல்லாஹ்வோ அவனது தூதரோ நமக்கு கூறியிருப்பார்கள். மனிதர்கள் இதுவரைக் கண்டிராத ஒரு வடிவில் அது அமைந்திருகக் கூடும் என்று நாம் ஊகிக்க முடியும். அதன் வடிவம் தான் நமக்கு கூறப்படவில்லையே தவிர அது வந்து விட்டால் சட்டென்று கண்டு கொள்ளக் கூடிய முக்கியமான தன்மையை அல்லாஹ் கூறிவிட்டான்.

    மனிதர்களுடன் பேசக் கூடியதாக அப்பிராணி அமைந்திருக்கும் என்பதை விட வேறு அடையாளமும் தேவையில்லை. அப்படி ஒரு பிராணி தோன்ற விருக்கிறது என்று நம்புவதே நமக்குப் போதுமானதாகும் என்பதாலேயே அதுபற்றி அதிக விபரம் நமக்குக் கூறப்படவில்லை.

    மேற்கில் சூரியன் உதிப்பது

    நடக்க முடியாத விஷயத்தைக் குறித்து ‘சூரியன் மேற்கே உதித்தாலும் இது நடக்காது’ என்று கூறப்படுவதுண்டு. சூரியன் மேற்கே உதிப்பது சாதாரணமாக நடக்கக் கூடியதன்று என்றாலும் யுகமுடிவு நாளின் நெருக்கத்தில் நடக்க முடியாத இதுவும் நடக்கவுள்ளது. உலகம் தோன்றியது முதல் கிழக்கிலிருந்து உதித்து வரும் சூரியன் திடீரென மேற்கிலிருந்து உதிக்கும் இந்த நிலை ஏற்பட்ட பின் ஈமான் கொள்வதோ பாவமன்னிப்பு கேட்பதோ இறைவனால் ஏற்கப்படாது.

    சூரியன் மேற்கிலிருந்து உதிப்பதற்கு முன் கியாமத் நாள் ஏற்படாது. அதைக் கண்டவுடன் மக்கள் (இறைவனை) நம்புவார்கள். ஆயினும் அதற்கு முன்பே நம்பிக்கை கொள்ளாதவர்களுக்கு அந்த நம்பிக்கை பயனளிக்காது என்பது நபிமொழி. (அறிவிப்பவர்: அபூஹுரைரா (ரலி), நூல்கள்: புகாரி, முஸ்லிம், அபூதாவூத்)

    சூரியன் மேற்கிலிருந்து உதிப்பதைச் சாதாரணமான ஒன்றாகக் கருதிவிடக் கூடாது. அதனால் ஏற்படும் விளைவுகள் பயங்கரமானவையாக இருக்கும்.

    கோள்களைப் பற்றி நாம் அறிந்து வைத்திருக்கின்ற விபரங்களினடிப்படையில் இதை சிந்தித்தால் இதன் பயங்கரத்தை நாம் எளிதாக உணர முடியும்.

    பூமி சூரியனைச் சுற்றி வருவதால் இரவு பகல் ஏற்படுகிறது என்பதை நாம் அறிந்து வைத்திருக்கின்றோம். மணிக்கு ஆயிரம் மைல் வேகத்தில் இந்த பூமி சுழன்று கொண்டிருக்கிறது என்பதை நாம் அறிவோம். இத்தகைய பூமியில் கிழக்கே உதித்து வரும் சூரியன் மேற்கே உதிக்க வேண்டுமானால் பூமி தன் சுழற்சியைத் திடீரென நிறுத்தி உடனே எதிர்த் திசையில் சுழல வேண்டும். அப்போது தான் மேற்கில் சூரியன் உதிக்க முடியும்.

    நாற்பது மைல் வேகத்தில் செல்லக்கூடிய ஒரு பேருந்து திடீரென நிறுத்தப்பட்டால் அதில் பயணம் செய்தவர்கள் தூக்கி எறியப்படுவதை நாம் அனுபவித்திருக்கிறோம். திடீரென நிறுத்தப்பட்டதுடன் மட்டுமின்றி உடனேயே பின்புறமாக அதே வேகத்தில் இந்தப் பேருந்து செல்வதாக கற்பனை செய்து பாருங்கள்! இது இன்னும் மோசமான விளைவை ஏற்படுத்தும்.

    அப்படியானால் ஆயிரம் மைல் வேகத்தில் சுழலும் இந்தப் பூமி திடீரென நிறுத்தப்பட்டு எதிர்த் திசையில் அதே வேகத்தில் சுழன்றால் அதன் விளைவு எத்தகையதாக இருக்கும் என்பதை இதிலிருந்து நாம் அறிந்து கொள்ளலாம்.

    நினைத்துப் பார்த்திராத விதத்தில் இந்தப் பூமி குலுங்கும். கட்டிடங்கள் தகர்ந்து விழும். மலைகளும் கூட பெயர்த்து எறியப்படும். இவ்வளவு பயங்கர விளைவுகளை ஏற்படுத்தக் கூடியதாக இந்த நிகழ்ச்சி அமைந்திருக்கும் என்பதை நாம் நினைவில் கொள்ள வேண்டும்.

    யஃஜுஜ், மஃஜுஜ் கூட்டத்தினரின் வருகை

    நபி (ஸல்) அவர்கள் முன்னறிவிப்புச் செய்த பத்து அடையாளங்களில் யஃஜுஜ், மஃஜுஜ் எனும் கூட்டத்தினரின் வருகையும் ஒன்றாகும். இக்கூட்டத்தினர் பற்றி திருக்குர்ஆனிலும் ஹதீஸ்களிலும் பல விபரங்கள் கூறப்பட்டுள்ளன.

    இந்த இரண்டு கூட்டத்தினரும் இனிமேல் தான் பிறந்து வருவார்கள் என்பதில்லை. நீண்ட காலமாகவே அவர்கள் இருந்து வருகின்றனர்.

    (துல்கர்னைன் அவர்கள்) இரண்டு மலைகளுக்கு இடையிலமைந்த (பகுதியை) அடைந்த போது அவ்விரு மலைகளுக்கு முன்னே ஒரு கூட்டத்தினரைக் கண்டார்கள். இவர்கள் பேசுவதை அவர்கள் விளங்கிக் கொள்பவர்களாக இல்லை. துல்கர்னைன் அவர்களே! யஃஜுஜ் மற்றும் மஃஜுஜ் கூட்டத்தினர் இந்தப் பூமியில் குழப்பம் விளைவித்து வருகின்றனர். எனவே எங்களுக்கும் அவர்களுக்குமிடையே நீங்கள் தடுப்புச் (சுவர்) ஏற்படுத்துவதற்காக உங்களுக்கு நாங்கள் வரி செலுத்தட்டுமா? என்று அவர்கள் கேட்டனர்.

    ‘என் இறைவன் எனக்களித்துள்ள வசதி எனக்குச் சிறந்ததாகும். எனவே (உடல்) உழைப்பைக் கொண்டு எனக்கு உதவுங்கள்! அவர்களுக்கும் உங்களுக்குமிடையே ஒரு தடுப்பை நான் ஏற்படுத்துகிறேன்’ என்று (துல்கர்னைன்) கூறினார்.

    என்னிடம் இரும்புப் பாளங்களைக் கொண்டு வாருங்கள்! (என்றும் கூறினார்) இரு மலைகளுக்கிடையே (உள்ள இடைவெளி) மட்டமானதும் ஊதுங்கள் என்றார். அது நெருப்பாக (பழுத்ததாக) ஆனதும் (செம்பை) என்னிடம் கொண்டு வாருங்கள்! இதன் மீது அதை நான் ஊற்றுகிறேன் என்று கூறினார்.

    அதில் ஏறவும் அவர்கள் சக்தி பெற மாட்டார்கள். அதில் துவாரமிடவும் சக்தி பெற மாட்டார்கள்.

    இது என்னுடைய இறைவனின் அருட்கொடையாகும். (எனினும்) என் இறைவனின் வாக்கு வரும்போது இதை அவன் தூளாக்குவான். என் இறைவனின் வாக்கு உண்மையானதாகும் என்றும் அவர் கூறினார்.

    அந்நாளில் அவர்களில் சிலரை மற்றும் சிலருடன் அலைமோத விடுவோம். மேலும் ‘சூர்’ ஊதப்பட்டதும் அவர்களை ஒன்று திரட்டுவோம். (அல்குர்ஆன் 18:94-99)

    முன்பே அக்கூட்டத்தினர் இருந்து வருகின்றனர். அவர்கள் மலைகளால் சூழப்பட்ட பகுதியில் வசிக்கின்றனர். அம்மலைகளுக்கிடையே இரும்புப் பாளங்களை அடுக்கி செம்பு உருக்கி ஊற்றப்பட்டுள்ளது. அதைத் தாண்டி வரவும் முடியாது. அதைக் குடைந்து வெளியே வரவும் முடியாது. யுக முடிவு நாளின் நெருக்கத்தில் அந்தத் தடை உடைக்கப்பட்டு அவர்கள் வெளிப்பட்டு வருவார்கள். ஒருவருடன் ஒருவர் முட்டி மோதிக் கொள்ளும் அளவுக்கு அவர்களின் எண்ணிக்கை பெருமளவில் இருக்கும் என்றெல்லாம் இந்த வசனங்களிலிருந்து நாம் அறியலாம்.

    இறுதியில் யஃஜுஜ், மஃஜுஜ் கூட்டத்தினர் திறந்து விடப்படுவார்கள். உடனே அவர்கள் (வெள்ளம் போல) ஒவ்வொரு மேட்டிலிருந்து விரைந்து வருவார்கள். (அல்குர்ஆன் 21:96)

    யுக முடிவு நாளின் நெருக்கத்தில் அவர்களுக்கு வழி திறக்கப்படும் என்பதை இந்த வசனமும் அறிவிக்கின்றது.
அவர்கள் எந்த நாட்டில் இவ்வாறு அடைக்கப்பட்டுள்ளனர் என்பதை அல்லாஹ்வும் அவனது தூதரும் நமக்குக் கூறவில்லை. யுக முடிவு நாளின் நெருக்கத்தில் அவர்கள் வெளிப்பட வேண்டுமானால் மற்ற மனிதர்கள் அவர்களை அறிந்து கொள்ளாமலிருப்பது அவசியம். அதற்காகக் கூட இறைவன் மறைத்து வைத்திருக்கலாம்.

    நவீன கருவிகளைக் கண்டு பிடித்துள்ள இந்தக் காலகட்டத்தில் – ஆகாய விமானங்கள் உள்ள கால கட்டத்தில் – தொலை நோக்கிக் கருவிகள் உள்ள காலகட்டத்தில் – அப்படி ஒரு கூட்டம் அடைக்கப்பட்டிருந்தால் உலகத்திற்குத் தெரியாமல் இருக்குமா? செம்பு உருக்கி ஊற்றப்பட்டால் அதன் பளபளப்பை வைத்து இனம் காணலாமே என்றெல்லாம் சிலர் கேட்கின்றனர். பல காரணங்களால் அந்தக் கேள்விகள் தவறானவையாகும்.

    மனிதனிடம் இத்தகைய நவீன சாதனங்கள் இருந்தாலும் அவை முழு அளவுக்கு இன்னமும் பயன்படுத்தப்பட வில்லை. பூமியை விட்டு மிக உயரத்திலிருந்து கொண்டு பூமியைப் படம் பிடித்திருக்கிறார்கள். பார்த்திருக்கிறார்களே தவிர பூமியின் ஒவ்வொரு அங்குலத்தையும் ஏன் ஒவ்வொரு ஏக்கரையும் கூட மனிதன் இந்தக் கருவிகள் மூலம் இதுவரை ஆராய வில்லை. பூமியிலேயே இருக்கும் சில பகுதிகளை இப்போதும் கூட கண்டு பிடித்ததாக செய்திகள் வருவதிலிருந்து இதை உணரலாம்.

    இந்த மண்ணுலகில் மனிதனின் கால் படாத நிலப்பரப்புக்கள் ஏராளம் உள்ளன. ஆகாயத்தில் வட்டமடித்து சக்தி வாய்ந்த தொலை நோக்கிக் கருவிகள் மூலம் ஒவ்வொரு ஏக்கராக ஆராய முற்பட்டாலும் மரங்கள், காடுகள் போன்ற தடைகள் இல்லாவிட்டால் தான் பூமியில் உள்ளவர்களைப் பார்க்க முடியும். தடைகள் இருந்தால் அந்தக் காடுகளைத்தான் பார்க்க முடியும்.

    குறிப்பிட்ட காட்டில் தான் வீரப்பன் இருக்கிறான் என்று தெளிவாகத் தெரிந்த நிலையில் அவனது இருப்பிடத்தைத் துல்லியமாகக் கண்டுபிடிக்க முடியாததற்கு இது தான் காரணம். காடுகளும், குகைகளும் தொலைநோக்கிக் கருவிகள் மூலம் பார்ப்பதை தடுத்து விடுகின்றன.

    இலங்கையில் பிரபாகரனும் அவரது புலிகளும் இந்திய இலங்கை இராணுவத்தினரால் பிடிக்கப்பட முடியாமல் போனதற்கும் கூட அடர்த்தியான காட்டுப் பகுதியை அவர்கள் தேர்வு செய்ததுதான். இலங்கையில் இராணுவத்தினர் மரங்களை வெட்டி வீழ்த்தி வருவதும் இந்தக் காரணத்துக்காகவே.

    மலைகளால் சூழப்பட்ட காடுகளிலோ அல்லது குகைகளிலோ யஃஜுஜ் மற்றும் மஃஜுஜ் கூட்டத்தினர் இருந்தால் எந்த சாதனங்கள் மூலமும் அவர்கள் இருப்பதை அறிந்து கொள்ள முடியாது.

    செம்பு எனும் உலோகம் விரைவில் பாசிபடிந்து பச்சை நிறத்துக்கு மாறிவிடுவதால் அதன் பளபளப்பை வைத்தும் கண்டு பிடிக்க முடியாது. தொலைவிலிருந்து பார்க்கும் போதும் அருகிலிருந்து பார்க்கும் போதும் கூட மலைகளில் புல் வளர்ந்திருப்பது போன்ற தோற்றமே தென்படும்.

    எனவே எவரது கண்களுக்கும் புலப்படாமல் இந்தக் கூட்டத்தினர் இந்தப் பூமியின் ஒரு பகுதியில் வாழ்ந்து வருவது சந்தேகப்பட வேண்டியதன்று.

    இனி வருங்காலத்தில் மனிதன் முயன்று நெருங்கலாம். அந்த நேரம் அவர்கள் வெளியே வரவேண்டிய காலமாக யுக முடிவு நாளின் நெருக்கமாகத்தான் இருக்க முடியும்.

    இந்தக் கூட்டத்தினர் பற்றி நபி (ஸல்) அவர்கள் கூறிய சில விபரங்களையும் நாம் அறிந்து கொள்வோம்.

    யஃஜுஜ், மஃஜுஜ் கூட்டத்தினர் வரும் வரை நீங்கள் போராடிக் கொண்டே இருப்பீர்கள். அவர்களின் முகங்கள் அகன்றதாகவும் கேடயம் போல் (வட்டமாகவும்) கண்கள் சிறியதாகவும் முடிகள் செம்பட்டையாகவும் அமைந்திருப்பார்கள் என்பது நபி மொழி. (அறிவிப்பவர்: காலித் பின் அப்துல்லாஹ், நூல்கள்: அஹ்மத், தப்ரானி)
இந்தக் கூட்டத்தினர் தனியான இனத்தவர் அன்று ஆதம் (அலை) அவர்களின் சந்ததியில் தோன்றியவர்களே என்பதைப் பின்வரும் நபி மொழி அறிவிக்கின்றது.

    யஃஜுஜ், மஃஜுஜ் கூட்டத்தினர் ஆதம் (அலை) அவர்களின் சந்ததிகளாகவும் அவர்கள் விடுவிக்கப்பட்டால் மக்களின் வாழ்க்கையைப் பாழாக்குவார்கள். அவர்களில் ஒவ்வொருவரும் ஆயிரம் அல்லது அதற்கும் அதிகமான சந்ததிகளை உருவாக்காமல் மரணிப்பதில்லை என்பதும் நபிமொழி. (அறிவிப்பவர்: அப்துல்லாஹ் பின் அம்ரு (ரளி), நூல்: தப்ரானி)

    ஒவ்வொருவரும் ஆயிரம் சந்ததிகளைப் பெற்றெடுப்பார்கள் என்பதிலிருந்து அவர்களின் எண்ணிக்கை கணக்கிலடங்காமல் இருக்கும் என்று கருத முடிகின்றது.

    யஃஜுஜ், மஃஜுஜ் கூட்டத்தினரை அல்லாஹ் வெளிப்படுத்துவான். அவர்களில் முதல் கூட்டத்தினர் ஒரு நீரோடையைக் கண்டு அதன் நீரைப் பருகுவார்கள். அடுத்த கூட்டத்தினர் வரும் போது (தண்ணீர் இராது என்பதால்) அந்த இடத்தில் ஒரு சமயத்தில் தண்ணீர் இருந்தது என்று கூறுவார்கள். பின்னர் பைத்துல் முகத்தஸில் உள்ள மலையை அடைவார்கள். ‘பூமியில் உள்ளவர்களை நாம் கொன்று விட்டோம். வாருங்கள்! வானில் உள்ளவர்களைக் கொல்வோம் எனக் கூறுவார்கள். தங்கள் அம்புகளை வானை நோக்கி எய்துவார்கள். அவர்களின் அம்புகளில் இரத்தம் பூசப்பட்டதாக இறைவன் திருப்பியனுப்புவான். ஈஸா நபியையும் அவரது தோழர்களையும் முற்றுகையிடுவார்கள். ஒரு மாட்டின் தலை இன்றைக்கு நூறு தங்கக் காசுகள் உங்களுக்கு எவ்வளவு மதிப்பு மிக்கதோ அதைவிட மதிப்பு நிறைந்ததாக இருக்கும். பின்னர் ஈஸா (அலை) அவர்களும் அவர்களின் தோழர்களும் அல்லாஹ்விடம் இறைஞ்சுவார்கள். அல்லாஹ் அவர்களிடம் புழுக்களை அனுப்புவான். அந்தப் பழுக்களின் தாக்குதலால் அனைவரும் ஒரேயடியாக செத்து விழுவார்கள். பின்னர் ஈஸா (அலை) அவர்களும் அவர்களின் தோழர்களும் (மலையிலிருந்து) தரைக்கு இறங்குவார்கள். அவர்களின் (பிணங்களின்) நாற்றமும் நெருக்கடியும் அப்பகுதியின் ஒரு சாண் இடத்தைக்கூட விடாது பிடித்துக் கொள்ளும். பின்னர் ஈஸா (அலை) அவர்களும் அவர்களின் தோழர்களும் அல்லாஹ்விடம் இறைஞ்சுவார்கள். உடனே அல்லாஹ் ஒட்டகங்களின் கழுத்துக்கள் போன்ற வடிவில் சில பறவைகளை அனுப்புவான். அப்பிணங்களை அவை சுமந்து சென்று அல்லாஹ் நாடிய இடத்தில் போட்டு விடும் என்று நபி (ஸல்) கூறியுள்ளனர். (அறிவிப்பவர்: நவ்வாஸ் பின் ஸம்ஆன் (ரலி), நூல், முஸ்லிம்)

    (யஃஜுஜ், மஃஜுஜ் மடிந்தபின்) அவர்களின் அம்புகளையும், விற்களையும், அம்பராத் துணிகளையும் ஏழு ஆண்டுகளுக்கு முஸ்லிம்கள் விறகாகப் பயன்படுத்துவார்கள். பின்னர் அல்லாஹ் மழையை அனுப்புவான். அனைத்து இல்லங்களையும் அம்மழை அடையும். பூமியை கண்ணாடி போல கழுவிவிடும். பின்னர் பூமியை நோக்கி ‘உன் கனிகளை முளைக்கச் செய்! உன்னிடமிருந்த பரக்கத்தையும் திரும்ப வழங்கு’ எனக் கூறப்படும். அந்நாளில் ஒரு மாதுளையை ஒரு கூட்டத்தினர் உண்பார்கள். அதன் தோலில் நிழல் பெறுவார்கள். (அந்த அளவு பெரியதாக இருக்கும்). பாலிலும் பரகத் செய்யப்படும். ஒரு ஒட்டகத்தில் ஒரு முறை கறக்கும் பால் ஒரு பெரும் கூட்டத்தினருக்குப் போதுமானதாக இருக்கும். ஒரு மாட்டில் ஒரு முறை கறக்கும் பால் ஒரு கோத்திரத்துக்குப் போதுமானதாக இருக்கும். ஒரு ஆட்டில் ஒரு முறை கறக்கும் பால் ஒரு குடும்பத்துக்குப் போதுமானதாக இருக்கும். மக்கள் இவ்வாறு இருக்கும் நிலையில் அல்லாஹ் சுகமான காற்றை அனுப்புவான். அக்காற்று அக்குள் வரை செல்லும். அனைத்து முஃமின்கள், அனைத்து முஸ்லிம்களின் உயிர்களும் கைப்பற்றப்படும். கழுதைகள் வெருண்டோடுவது போல் வெருண்டோடும் கெட்ட மனிதர்கள் மட்டுமே மிஞ்சுவார்கள். அவர்கள் மட்டும் இருக்கும் போது தான் கியாமத் நாள் ஏற்படும் என்று நபி (ஸல்) அவர்கள் கூறினார்கள். (அறிவிப்பவர்: நவ்வாஸ் பின் ஸம்ஆன் (ரலி), நூல்: திர்மிதி)

    ஈஸா (அலை) அவர்களின் வருகைக்குப் பின்னரே அக்கூட்டத்தினர் தோன்றுவார்கள். அவர்கள் அழிந்த ஏழு ஆண்டுகளில் உலகமும் அழியும் என்ற விபரங்களையும் யஃஜுஜ், மஃஜுஜ் சம்பந்தமான போதுமான விபரங்களையும் இந்த ஹதீஸ்களில் அறியலாம்.

    அடுத்து மிக முக்கியமான அடையாளங்களில் ஒன்றான ஈஸா (அலை) அவர்களின் வருகை பற்றி அறிந்து கொள்வோம்.

78:5 தஜ்ஜால் யூத இனத்தைச் சார்ந்தவன்

தஜ்ஜால் யூத இனத்தைச் சார்ந்தவன்

    ‘அவ்வாறன்று, அவர்கள் சீக்கிரமே அறிந்து கொள்வார்கள். மேலும் அதிசீக்கிரத்தில் அறிந்து கொள்வார்கள்’. (அல்குர்ஆன் 78:4-5)

    முஸ்லிம் சமுதாயத்தை வழி கெடுப்பவர்கள் பல வகையினராக இருப்பார்கள். தன்னை முஸ்லிம் என்று சொல்லிக் கொண்டே வழி கெடுப்பவர்களும் தோன்றுவார்கள். இஸ்லாத்தை விட்டு வெளியேறுமாறு கூறி வழி கெடுப்பவர்களும் தோன்றுவார்கள். தஜ்ஜால் என்பவன் இரண்டாம் வகையைச் சேர்ந்தவனாக இருப்பான்.

    அவன் முஸ்லிம் சமுதாயத்தைச் சேர்ந்தவனாகவும் இருக்க மாட்டான். இஸ்லாத்தின் பால் அழைப்பதாகவும் கூறமாட்டான்.

    இஸ்பஹான் பகுதியைச் சேர்ந்த யூதர்களில் ஒருவனாக தஜ்ஜால் வெளிப்படுவான் என்பது நபிமொழி. (அறிவிப்பவர்: ஆயிஷா (ரலி), நூல்: அஹ்மது)

    ‘தஜ்ஜாலின் நெற்றிக்கிடையே ‘காபிர்’ என்று எழுதப்பட்டிருக்கும். எழுதத் தெரிந்த, எழுதத் தெரியாத அனைத்து மூமின்களும் அதைப் படிப்பார்கள்’ என்று நபி (ஸல்) கூறினார்கள். (அறிவிப்பவர்: ஹுதைபா (ரலி), நூல்: முஸ்லிம்)

    அவன் இஸ்லாமிய வட்டத்தில் உள்ளதாக தன்னைக் கூறிக் கொள்ள மாட்டான் என்பதற்கு அவன் செய்யும் வாதமும் சான்றாக உள்ளது.

    ‘தஜ்ஜால் என்பவன் ஒரு கண் ஊனமுற்றவன். உங்கள் இறைவன் ஒரு கண் ஊனமுற்றவனல்லன்’ என்ற நபிமொழியிலிருந்து அவன் தன்னைக் கடவுள் என வாதிடுவான் என்பதை அறியலாம்.

    இஸ்லாத்தின் பெயரைக் கூறாமல் எவ்வாறு முஸ்லிம்களை வழி கெடுக்க இயலும்? என்று ஐயம் தோன்றலாம்.
தன்னைக் கடவுள் என்று சாதிக்கும் வகையில் அவன் பிரமிப்பூட்டும் அற்புதங்களைச் செய்வான். மிகப் பெரிய நபிமார்களுக்குக் கூட வழங்கப்படாத அற்புதங்கள் அவனுக்கு வழங்கப்பட்டிருக்கும்.

    ஒன்றிரண்டு தந்திர வேலைகளைச் செய்யக் கூடிய முஸ்லிம் அல்லாத – பலரின் வலையில் அப்பாவி முஸ்லிம்கள் அநேகர் விழுந்து ஈமானை இழந்து வருவதை இன்றைக்கு நாம் காண்கிறோம். அவர்களையெல்லாம் விட மிகப் பெரும் அற்புதங்களை நிகழ்த்தக் கூடிய தஜ்ஜாலின் வலையில் முஸ்லிம்கள் விழுவது ஆச்சரியத்திற்குரியது அல்ல. அவன் நிகழ்த்தும் அற்புதங்கள் எத்தகையதாக இருக்கும் என்பதை நபி (ஸல்) அவர்கள் தெளிவாக முன்னறிவிப்புச் செய்துள்ளனர்.

    வானத்திற்கு மழை பொழியுமாறு கட்டளையிடுவான், அது மழை பொழியும். முளைப்பிக்குமாறு பூமிக்குக் கட்டளையிடுவான், அது (பயிர்களை) முளைப்பிக்கும் என்பது நபிமொழி. (அறிவிப்பவர்: நவ்வாஸ் பின் ஸம்ஆன் (ரலி) நூல்: முஸ்லிம்)

    திடகாத்திரமான ஒரு இளைஞனை அவன் அழைத்து வாளால் இரண்டு துண்டுகளாக வெட்டுவான். பிறகு அவனைக் கூப்பிடுவான். உடனே அந்த இளைஞன் சிரித்துக் கொண்டு பிரகாசமான முகத்துடன் உயிர் பெறுவான் என்பதும் நபிமொழி. (அறிவிப்பவர்: நவ்வாஸ் பின் ஸம்ஆன் (ரலி) நூல்கள்: முஸ்லிம், திர்மிதி)

    தஜ்ஜால் பிறவிக் குருடையும், வெண் குஷ்டத்தையும் நீக்குவான். இறந்தவர்களையும் உயிர்பிப்பான் மக்களிடம் ‘நானே உங்கள் இறைவன்’ என்பான். யாரேனும் ‘நீ தான் என் இறைவன்’ என்று கூறினால் அவன் சோதனையில் தோற்று விட்டான். ‘அல்லாஹ் தான் என் இறைவன்’ என்று யார் கூறி அதிலேயே மரணித்து விடுகிறாரோ அவர் தஜ்ஜாலின் சோதனையிலிருந்து விடுபட்டு விட்டார் என்று நபி (ஸல்) கூறினார்கள். (அறிவிப்பவர்: ஸமுரா பின் ஜீன்தம் (ரலி), நூல்கள்: அஹ்மத், தப்ரானி)

    இறந்தவர்களை உயிர்ப்பிப்பது என்பது ஒரேஒரு தடவை மட்டுமே அவனால் செய்ய இயலும் தொடர்ந்து செய்ய இயலாது.

    ஒரு மனிதனைக் கொன்று அவனை உயிர்ப்பிப்பான். மற்றவர்கள் விஷயத்தில் அவனால் இவ்வாறு செய்ய இயலாது என்று அன்ஸாரித் தோழர் ஒருவர் அறிவிக்கிறார். (அஹ்மத்)

    அவனைப் பின்பற்றியவர்கள் தவிர ஏனைய மக்கள் மிகவும் வறுமையில் இருக்கும் போது அவனிடம் மலை போல் ரொட்டி இருக்கும். அவனிடம் இரண்டு நதிகள் இருக்கும். ஒன்றை அவன் சுவர்க்கம் என்பான். இன்னொன்றை நரகம் என்பான். அவன் சுவர்க்கம் என்று குறிப்பிடும் நதி உண்மையில் சுவர்க்கமாகும். மழை பொழியுமாறு வானத்திற்குக் கட்டளையிடுவான். மக்கள் பார்க்கும் வகையில் மழை பெய்யும். ‘இதைக் கடவுளைத் தவிர வேறு யாரும் செய்ய முடியுமா? என்று கேட்பான்’ என்பதும் நபிமொழி. (அறிவிப்பவர்: ஜாபிர் பின் அப்துல்லாஹ் (ரலி) நூல்: அஹ்மது)

    தஜ்ஜாலிடம் தண்ணீரும் நெருப்பும் இருக்கும் மக்கள் எதைத் தண்ணீர் என்று காண்கிறார்களோ அது சுட்டெரிக்கும் நெருப்பாகும். மக்கள் எதனை நெருப்பு என்று காண்கிறார்களோ அது சுவை மிக்க குளிர்ந்த நீராகும். உங்களில் யாரேனும் இந்த நிலையை அடைந்தால் நெருப்பு என்று காண்பதில் விழட்டும் என்று நபி (ஸல்) கூறினார்கள். (அறிவிப்பவர்: ஹுதைபா (ரலி), நூல்கள்: புகாரி, முஸ்லிம்)

    அவ்வளவு அற்புத சக்தியுடன் வெளிப்படும் தஜ்ஜால் நீண்ட நாட்கள் ஆட்டம் போட முடியாது வெறும் நாட்கள் மட்டுமே அவன் இவ்வுலகில் இருப்பான்.

    ‘தஜ்ஜால் இப்பூமியில் எவ்வளவு காலம் தங்கியிருப்பான் என்று நாங்கள் கேட்டோம். அதற்கு நபி (ஸல்) அவர்கள் ‘நாற்பது நாட்கள். ஒரு நாள் ஒரு வருடம் போன்றும் ஒரு நாள் ஒரு மாதம் போன்றும் ஒரு நாள் ஒரு வாரம் போன்றும் ஏனைய நாட்கள் சாதாரண நாட்களைப் போன்றும் இருக்கும் என்று விடையளித்தார்கள். (அறிவிப்பவர்: நவ்வாஸ் பின் ஸம்ஆன் (ரலி), நூல்கள்: முஸ்லிம், திர்மிதி)   

    இந்த நாற்பது நாட்களில் உலகம் முழுவதும் அவன் சுற்றி வருவான். ஆயினும் சில இடங்களை அவனால் அடைய முடியாது எனவும் நபி (ஸல்) அவர்கள் முன்னறிவிப்பு செய்துள்ளனர்.

    ‘மதீனா’ நகருக்கு தஜ்ஜால் பற்றிய அச்சம் இல்லை. அன்றைய தினம் மதீனாவுக்கு ஏழுவாயில்கள் இருக்கும். ஒவ்வொரு வாயிலிலும் இரண்டு மலக்குகள் இருப்பார்கள் என்பது நபிமொழி. (அறிவிப்பவர்: அபூபக்ரா (ரலி), நூல்: புகாரி)

    தஜ்ஜால் கீழ்த்திசையிலிருந்து மதீனாவைக் குறிக்கோளாகக் கொண்டு புறப்பட்டு வருவான். அப்போது மலக்குகள் அவனது முகத்தை ‘ஷாம்’ பகுதியை நோக்கித் திருப்புவார்கள். அங்கே தான் அவன் அழிவான் என்பதும் நபிமொழி. (அறிவிப்பவர்: அபூஹுரைரா (ரலி), நூல்கள்: புகாரி, முஸ்லிம்)

    கஸ்பஹான் நாட்டு யூதர்களில் ஒருவனாக தஜ்ஜால் புறப்பட்டு வருவான். மதீனாவை நெருங்கி அதன் எல்லையில் இறங்குவான். அன்றைய தினம் மதீனாவுக்கு எழுவாயில்கள் இருக்கும். ஒவ்வொரு வாயிலிலும் இரண்டு மலக்குகள் இருப்பார்கள். அவனை நோக்கி (மதீனாவில் உள்ள) கெட்ட மக்கள் புறப்பட்டுச் செல்வார்கள். ஷாம் நாட்டில் உள்ள பலஸ்தீன் நகருக்கு ‘லுத்’ எனும் வாசலுக்கு அவன் புறப்பட்டுச் செல்வான். அங்கே ஈஸா (அலை) இறங்கி அவனைக் கொல்வார்கள். அதன் பின் நாற்பது ஆண்டுகள் ஈஸா (அலை) இப்பூமியில் நேர்மையான தலைவராக சிறந்த நீதிமானாக வாழ்வார்கள் என்பதும் நபிமொழி. (அறிவிப்பவர்: ஆயிஷா (ரலி) நூல்: அஹ்மத்)

    மதீனாவுக்கு மட்டுமின்றி மற்றும் மூன்று இடங்களுக்கும் அவனால் செல்ல முடியாது.

    அவன் நாற்பது நாட்கள் பூமியில் வாழ்வான். அனைத்து இடங்களையும் அவன் அடைவான். மஸ்ஜிதுல்ஹராம், மதீனாவின் மஸ்ஜித், தூர் மஸ்ஜித், பைத்துல் மக்தஸ் ஆகிய நான்கு பள்ளிகளை அவன் நெருங்க முடியாது என்பதும் நபிமொழி. (நூல்: அஹ்மது)

    தஜ்ஜாலின் காலத்தை அடையக் கூடியவர்கள் அவனிடமிருந்து எவ்வாறு பாதுகாப்புப் பெறுவது என்பதற்கு நபி (ஸல்) அவர்கள் நமக்கு இரண்டு வழிகளைக் கற்றுத் தந்துள்ளார்கள்.

    தொழுகையில் அத்தஹிய்யாதின் இறுதியில் நான்கு விஷயங்களை விட்டும் பாதுகாப்புத் தேடுமாறு நபி (ஸல்) அவர்கள் போதனை செய்தார்கள். அதில் ஒன்று ‘தஜ்ஜாலின் சோதனையை விட்டும் இறைவா உன்னிடம் பாதுகாப்புக் கேட்கிறேன்’ என்பதாகும். நபியவர்கள் இவ்வாறு கற்றுத் தந்துள்ளதால் ஐங்காலமும் தொழக்கூடியவர்கள், தொழுகையில் இந்தப் பிரார்த்தனையைச் செய்து வருபவர்கள் அவனது மாய ஜாலத்தில் மயங்க மாட்டார்கள். ஈமானை இழக்க மாட்டார்கள். தொழாதவர்களும், தொழுகையில் இந்தப் பிரார்த்தனையைக் கேட்காதவர்களும் தான் தஜ்ஜாலின் பின்னே செல்வார்கள்.

    தஜ்ஜாலின் வருகைக்கு முன் நாம் செய்ய வேண்டிய பிரார்த்தனை இது. தஜ்ஜாலை நமது காலத்தில் நாம் அடைந்தால் அவனது அற்புதத்தில் மயங்கி ஈமானைம இழக்காமலிருக்க ‘கஹ்ப்’ அத்தியாயத்தின் ஆரம்பப் பகுதியை நாம் ஓதி வர வேண்டும்.

    உங்களில் யாரேனும் அவனை அடைந்தால் கஹ்பு அத்தியாயத்தின் ஆரம்பப் பகுதியை ஓதுங்கள் என்பது நபிமொழி. (அறிவிப்பவர்: நவ்வாஸ் பின் ஸம்ஆன் (ரலி), நூல்கள்: முஸ்லிம், திர்மிதி)

    மிகமுக்கியமான பத்து அடையாளங்களில் தஜ்ஜால் பற்றி ஓரளவு அறிந்து கொண்டோம். இனி ஏனைய அடையாளங்களையும் காண்போம்.