Category Archives: குர்ஆன் விளக்கம்

78:5 தஜ்ஜாலின் அங்க அடையாளங்கள்

தஜ்ஜாலின் அங்க அடையாளங்கள்

    ‘அவ்வாறன்று, அவர்கள் சீக்கிரமே அறிந்து கொள்வார்கள். மேலும் அதிசீக்கிரத்தில் அறிந்து கொள்வார்கள்’. (அல்குர்ஆன் 78:4-5)

    உலக முடிவு நாள் வருவதற்கு முன்னர் உலகில் ஏற்படும் – ஏற்பட்ட – மாறுதல்களை முன்னர் அறிந்தோம். அந்த நாள் மிகவும் நெருக்கத்தில் வரும் போது சில மகத்தான அடையாளங்கள் ஏற்படவுள்ளன. அவற்றையும் நாம் அறிந்து கொள்வோம்.

    புகை மூட்டம், தஜ்ஜால், (அதிசயப்) பிராணி, சூரியன் மேற்கிலிருந்து உதிப்பது, ஈஸா (அலை) இறங்கி வருவது, யஃஜுஜ் மஃஜுஜ், கிழக்கே ஒன்று மேற்கே ஒன்று அரபு தீபகற்பத்தில் ஒன்று என மூன்று நிலச்சரிவுகள் ஏற்படுவது, இவற்றில் இறுதியாக ‘எமனி’ லிருந்து புறப்படும் தீப்பிளம்பு மக்களை விரட்டிச் சென்று ஒன்று சேர்த்தல், ஆகிய பத்து அடையாளங்களை நீங்கள் காணும் வரை அந்த நாள் வராது என்று நபி (ஸல்) கூறியுள்ளார்கள். (அறிவிப்பவர்: ஹுதைபா (ரலி), நூல்: முஸ்லிம்)

    இந்த பத்து அடையாளங்களும் ஒன்றன் பின் ஒன்றாக ஏற்பட்டவுடன் உலகம் அழிந்துவிடும் என்று நபி (ஸல்) அவர்கள் இதன் மூலம் முன்னறிவிப்புச் செய்கிறார்கள். இவற்றில் மூன்று அடையாளங்கள் மிகவும் முக்கியமானவை.

    இறைவனை மறுத்தவர்கள், இணைவைத்தவர்கள் தங்கள் தவறை உணர்ந்து திருந்தினால், இறைவன் மீது நம்பிக்கை கொண்டால் அதை இறைவன் ஏற்றுக் கொள்கிறான். அவர்களை மன்னிக்கிறான். ஆனால் அந்த மூன்று அடையாளங்களும் ஏற்பட்டு விடுமானால் அதன் பின் பாவமன்னிப்பு என்பது கிடையாது. அதன் பின்னர் ஈமான் கொண்டால் அந்த ஈமானுக்கு இறைவனிடம் மதிப்பேதும் இராது. இதிலிருந்து அந்த மூன்று அடையாளங்களும் எவ்வளவு முக்கியமானவை என்பதையும் அழிவு எந்த அளவு அண்மித்து விட்டது என்பதையும் அறியலாம்.

    சூரியன் மேற்கிலிருந்து உதிப்பது, தஜ்ஜால், (அதிசயப்) பிராணி ஆகிய மூன்று அடையாளங்கள் தோன்றி விடுமானால் அவற்றுக்கு முன்பே ஈமான் கொண்டிருந்தால் தவிர எவருக்கும் அவரது ஈமான் பயனளிக்காது என்று நபி (ஸல்) கூறியுள்ளனர். (அறிவிப்பவர்: அபூஹுரைரா (ரலி), நூல்கள்: முஸ்லிம், இப்னுமாஜா)

    சூரியன் மேற்கிலிருந்து உதிக்கும் வரை அந்த நாள் வராது அவ்வாறு உதிப்பதை மக்கள் காணும் போது ஈமான் கொள்வார்கள். ஆனால் அது எவருக்கும் ஈமான் பயனளிக்காத நேரமாகும் என்று நபி (ஸல்) கூறியுள்ளனர். (அறிவிப்பவர்: அபூஹுரைரா (ரலி), நூல்கள்: புகாரி, முஸ்லிம், இப்னுமாஜா)

    மகத்தான இம்மூன்று அடையாளங்களில் பயங்கரமான அடையாளம் தஜ்ஜாலின் வருகைதான். அவனது வருகையினால் உண்மை முஸ்லிம்கள் கூட ஈமானை இழந்து விடும் அபாயம் உள்ளது. தன்னைக் கடவுள் என்று பிரகடனம் செய்யும் அவனது மாயவலையில் முஸ்லிம்கள் விழுந்து விடக் கூடாது என்பதற்காக நபியவர்கள் அவனைப் பற்றி முழுமையாக எச்சரித்துள்ளனர். அவனது ஆற்றல், அங்க அமைப்பு, அவனது செயல்பாடுகள் உட்பட அனைத்தையும் நபியவர்கள் முன்னறிவிப்பு செய்துள்ளனர்.

    நூஹ் (அலை) அவர்களுக்குப் பின் வந்த எந்த நபியும் தஜ்ஜாலைப் பற்றி தனது சமுதாயத்திற்கு எச்சரிக்காமல் விட்டதில்லை. நிச்சயமாக நானும் அவனைப்பற்றி உங்களுக்கு எச்சரிக்கிறேன் என்பது நபிமொழி. (அறிவிப்பாளர்: அபூஉபைதா (ரலி), நூல்கள்: திர்மிதி, அபூதாவூத்)

    ஆதம் (அலை) படைக்கப்பட்டது முதல் அந்த நாள் வரும் வரையிலும் தஜ்ஜால் விஷயத்தைத் தவிர பெரிய விஷயம் ஏதும் ஏற்படுவதில்லை என்பதும் நபிமொழி. (அறிவிப்பவர்: இம்ரான் பின் ஹுஸைன் (ரலி), நூல்: முஸ்லிம்)

    அந்தப் பத்து அடையாளங்களையும் விரிவாக நாம் அறிந்து கொள்ள வேண்டும் என்றாலும் முக்கியத்துவம் கருதி தஜ்ஜால் பற்றி நபியவர்கள் செய்த முன்னறிவிப்புக்களை முதலில் அறிந்து கொள்வோம்.

    முஸ்லிம் சமுதாயத்தில் தஜ்ஜால் பற்றி பல விதமான கருத்துக்கள் நிலவுகின்றன. தஜ்ஜால் என்பது ஒரு தீயசக்தியைப் பற்றியது என்று சிலர் கூறுகின்றனர்.

    பிரிட்டனின் கையில் பாதி உலகம் இருந்த போது வாழ்ந்த ‘மார்டன்’ மவ்லவிகள் பிரிட்டன் தான் தஜ்ஜால் என்றனர். இஸ்ரேலின் பிரதமர் மோஷே தயானையும் சிலர் தஜ்ஜால் என்றனர். ஜார்ஜ் புஷ் என்ற அமெரிக்க அரக்கனின் ஆட்சியை சந்தித்த நவீன கால அறிஞர்கள் தஜ்ஜால் என்பது ‘ஜார்ஜ் புஷ்’ தான் என்று அடித்துக் கூறியதும் உண்டு.

    தஜ்ஜாலின் சில குணாதிசயங்கள் இவர்களிடம் இருந்திருக்கலாம், அவனைப் பற்றி எல்லா அறிவிப்புக்களையும் ஆராய்ந்தால் அவர்களின் கூற்று பொய்யென உணரலாம். தஜ்ஜால் பற்றிக் கூறப்படும் முன்னறிவிப்புக்களில் சில அறிவுக்குப் பொருத்தமாக இல்லாததால் அவர்களின் அறிவுக்கு ஏற்ற வகையில் தஜ்ஜாலுக்கு இவ்வாறு விளக்கம் தருகின்றனர்.

    மார்க்கத்தைப் பற்றிய ஞானம் சிறிதும் இல்லாத சிலர் தஜ்ஜாலைப் பற்றி அதிகமாகக் கற்பனை செய்து கதைகள் புனைந்துள்ளனர். அவனது தலை வானத்துக்கும் கால் தரைக்குமாக இருப்பான். கடலில் அவன் நடந்து சென்றால் அவனது கரண்டைக் காலுக்குத் தான் கடல் நீர் இருக்கும். கடலில் மீனைப்பிடித்து சூரியனுக்கு அருகில் அதைக் காட்டி சுட்டுத் தின்பான். என்றெல்லாம் ‘கடோத்கஜன்’ கதையிலிருந்து காப்பியடித்துக் கூறுகின்றனர்.

    இன்னும் சிலர் தஜ்ஜால் பற்றி எதுவுமே அறியாதவர்களாக உள்ளனர். இம்மூன்று சாராரின் அறியாமையையும் அகற்றுவதற்காக தஜ்ஜால் பற்றிய எல்லா முன்னறிவிப்புக்களையும் விரிவாக எடுத்து வைப்போம்.

    தஜ்ஜாலின் அங்க அடையாளங்கள்

    ஒரு கண் ஊனமுற்றவனாக அவன் அமைந்திருப்பான். அது எந்தக் கண் என்பதில் இரு விதமான ஹதீஸ்கள் வந்திருந்தாலும் அவனது ஒரு கண் ஊனமாக இருக்கும் என்பதில் ஐயமில்லை.

    ‘நிச்சயமாக அல்லாஹ்வைப் பற்றி உங்களுக்குத் தெரியும், அல்லாஹ் ஒரு கண் ஊனமானவன் அல்லன். ஆனால் தஜ்ஜாலின் வலக்கண் சுருங்கிய திராட்சை போன்று ஊனமுற்றிருக்கும்’ – நபிமொழி. (அறிவிப்பவர்: அப்துல்லாஹ் பின் மஸ்வூது (ரலி), நூல்கள்: புகாரி, முஸ்லிம்)

    பெரும் பொய்யனாகிய ஒற்றைக் கண்ணனைப் பற்றி எந்த நபியும் தனது சமுதாயத்திற்கு எச்சரிக்காமல் இருந்ததில்லை. நிச்சயமாக ஒரு கண் ஊனமுற்றவன். உங்கள் இறைவன் ஒரு கண் ஊனமுற்றவன் அல்லன் – நபிமொழி. (அறிவிப்பவர்: அனஸ் (ரலி), நூல்கள்: புகாரி, முஸ்லிம்)

    தஜ்ஜால் என்பவன் இடது கண் ஊனமானவன் என்பதும் நபிமொழி. (அறிவிப்பவர்: ஹுதைபா (ரலி), நூல்: முஸ்லிம்)

    ஒற்றைக் கண்ணனாக இருப்பவனெல்லாம் தஜ்ஜால் என்று முடிவு செய்து விடக் கூடாது. அவனைப்பற்றி இன்னும் பல அடையாளங்களும் உள்ளன. அவற்றை அடுத்து பார்ப்போம்.

78:5 நடந்து முடிந்து விட்ட முன்னறிவிப்புக்கள்

நடந்து முடிந்து விட்ட முன்னறிவிப்புக்கள்

    ‘அவ்வாறன்று, அவர்கள் சீக்கிரமே அறிந்து கொள்வார்கள். மேலும் அதிசீக்கிரத்தில் அறிந்து கொள்வார்கள்’. (அல்குர்ஆன் 73:4-5)

    அவர்கள் தங்களுக்கிடையே சர்ச்சை செய்து கொண்டிருக்கும் நாள் எப்போது வரும் என்பதை இறைவன் கூறா விட்டாலும் அந்த நாள் நெருங்க நெருங்க உலகில் ஏற்படும் விபரீதங்களை நபி (ஸல்) அவர்கள் முன்கூட்டியே அறிவித்துச் சென்றுள்ளனர். அந்த நாளை நம் காலத்தவர்கள் எந்த அளவுக்கு நெருங்கியுள்ளனர் என்பதை அறிந்து கொள்ள அந்த முன்னறிவிப்புக்கள் நமக்கு உதவும் என்பதால் அவற்றில் சிலவற்றை அறிந்து விட்டு விளக்கவுரையைத் தொடர்வோம்.

    ஒரு தாய் எத்தனை ஆண் மக்களைப் பெற்றாலும் அவர்கள் தாயைக் கவனிக்காத நிலை ஏற்படும். மகளை அண்டி வாழும் நிலைமையை அவள் சந்திப்பாள். அங்கே அடிமையாக நடத்தப்படுவாள் என்பது நபி (ஸல்) அவர்கள் முன்னறிவிப்புச் செய்த அடையாளங்களில் ஒன்றாகும். ‘ஒரு பெண் தனது எஜமானியைப் பெற்றெடுப்பாள் (நூல்: முஸ்லிம்) என்று கூறி நபி (ஸல்) அவர்கள் முன்னறிவிப்புச் செய்தனர். இன்றைக்குப் பரவலாக இந்த நிலையைப் பெற்றோர்கள் சந்தித்து வருகின்றனர்.

    பொருளாதார வசதியில் மிகவும் பின் தங்கியவர்களில் சிலர் மிகவும் உயர்ந்த வசதியைப் பெறுவது உலகம் தோன்றியது முதல் நடந்து வரும் நிகழ்ச்சிகளே. ஆயினும் அத்தகைய பின் தங்கியவர்கள் ஒட்டு மொத்தமாக பொருளாதாரத்தில் மிகவும் உயர்ந்த நிலையை அடைவதென்பது கியாமத் நாள் நெருங்கி விட்டது என்பதற்கான அடையாளமாகும். ‘வறுமை நிலையில் (அரை) நிர்வாணத்துடனும் வெறுங்காலுடனும் ஆடு மேய்த்துக் கொண்டிருந்தவர்கள் மிகவும் உயர்ந்த கட்டிடங்களைக் கட்டிக் கொள்வார்கள்’ என்ற முன்னறிவிப்பின் மூலம் (நூல்: முஸ்லிம்) நபி (ஸல்) அவர்கள் இதை விளக்குகிறார்கள். இன்றைக்கு அரபியர்களுக்குக் கிடைத்திருக்கும் வாழ்வும் இன்ன பிற பகுதிகளில் நடக்கும் புரட்சிகரமான மாறுதலும் இதை விளங்கிடப் போதுமானவையாகும்.

    ‘விபச்சாரம் பெருகும், மது அருந்தும் பழக்கம் பரவலாகும்’ என்று (நூல்கள்: புகாரி, முஸ்லிம்) நபி (ஸல்) அவர்களின் முன்னறிவிப்பும் நிறைவேறியுள்ளது. அரசாங்கமே சிவப்பு விளக்குப் பகுதியை ஏற்படுத்துவதும், அன்னியப் பெண்களுடன் உறவு கொள்ளும் போது ஆணுறை பயன்படுத்துங்கள் என்றும் பண்பாடு மிக்க இந்தியா போன்ற நாடுகளே விளம்பரம் செய்கின்றனவென்றால் விபச்சாரம் எந்த அளவுக்கு பெருகிப் போயுள்ளது என்பதை உணரலாம். இந்தத் தீமைக்கு எதிராகப் போராடக் கடமைப்பட்ட பல அரபு நாடுகளில் கூட இந்தத் தீமை தலைவிரித்தாடும் போது அந்த நாள் மிகவும் நெருங்கி விட்டதாகவே தோன்றுகிறது.

    மக்களை நல்வழிப்படுத்தக் கடமைப்பட்ட அரசுகளே மதுபான விற்பனை செய்யத் துவங்கி விட்டனர். நாகரீகமான பெயர்களில் அறிமுகப் படுத்தப்படும் உயர்ரக அன்னிய மதுவுக்கு மக்கள் அடிமைப்பட்டுவருவதும் மறுக்க முடியாத உண்மைகள்.

    பொறுப்புக்கள் தகுதியற்றவர்களிடம் ஒப்படைக்கப்படுவதும், அப்பொறுப்புக்களில் அவர்கள் நாணயமின்றி நடந்து கொள்வதும் அன்றாடம் மனித சமுதாயம் காணக்கூடியவை தான். இதுவும் கூட அந்த நாள் மிகவும் நெருங்கி விட்டது என்பதை உறுதிப்படுத்தும் நிலையாகும்.

    நாணயம் பாழாக்கப்படும் போது அந்த நாளை எதிர் நோக்கு என்று நபியவர்கள் கூறியபோது எவ்வாறு பாழ்படுத்தப்படும் என்று ஒருவர் கேட்டார். அதற்கு நபி (ஸல்) அவர்கள் ‘தகுதியற்றவர்களிடம் ஒரு காரியம் ஒப்படைக்கும் போது அந்த நாளை எதிர்நோக்கு’ என்று விடையளித்தார்கள். (நூல்: புகாரி)

    இறைவனிடம் பதில் சொல்ல வேண்டும் என்ற அச்சமின்றி – உலகத்து ரிக்கார்டுகளை சரி செய்து – ஏமாற்றி அபகரித்துக் கொண்டவர்களை இன்றளவும் நாம் காண்பது அந்த நாளுக்கு எவ்வளவு நெருக்கமாகி விட்டோம் என்பதை தெளிவாக்குகின்றது.

    இன்றைய அரபுகள் அடைந்துள்ள பொருளாதார உயர் நலை 200 ஆண்டுகளுக்கு முன்பு கற்பனை செய்து பார்க்கக் கூட இயலாததாகும். அவர்கள் வழங்கும் ஸகாத்தைப் பெறக்கூட அங்கே மக்களில்லை. ஸகாத்தை வழங்குவதற்காக ஏழை நாடுகளை அவர்கள் தேடிச் செல்லும் நிலையையும் நாம் காண்கிறோம். எதற்கும் உதவாத பாலை நிலம் என்று உலகத்தால் புறக்கணிக்கப்பட்ட அந்த பிரதேசத்தில் சோலைகள் உருவாக்கும் முயற்சிகள் நடந்து வருகின்றன. இந்த மாறுதலும் கூட அந்த நாள் நெருங்கி விட்;டது என்பதற்கான அடையாளமே.

    செல்வம் பொங்கிப் பிரவாகித்து அதற்கான ஸகாத்தைப் பெறுவதற்கு எவரும் கிடைக்காத நிலை ஏற்படும் வரையிலும் அரபுப் பிரதேசம் நதிகளும் சோலைகளும் கொண்டதாக மாறும் வரையிலும் அந்த நாள் ஏற்படாது (நூல்: முஸ்லிம்) என்ற நபியவர்களின் முன்னறிவிப்பு நிறைவேறிக் கொண்டிருக்கின்றது.

    காலம் வெகுவேகமாக ஓடுவதும் இன்று நாம் காணக்கூடியதாக உள்ளது. மனிதனின் விஞ்ஞான அறிவு வளர்ந்து அவன் கண்டுபிடிக்கும் நவீன சாதனங்களால் காலம் மிகவும் சுருங்கி விட்டதைக் காண்கிறோம்.

    ஒருவாரம் பயணம் செய்யும் தூரம் ஒரு நாளில் சர்வசாதாரணமாகக் கடக்கப்படுகின்றது. ஒரு வாரத்தில் செய்யப்படத் தக்க வேலைகள் ஒரு நாளில் செய்து முடிக்கப் பட சாதனங்கள் இன்று உள்ளன. உலகில் எங்கோ நடக்கும் நிகழ்ச்சிகள் அதே நேரத்தில் முழு உலகையும் எட்டி விடுகின்றன. இத்தகைய முன்னேற்றங்களும் கூட அந்த நாள் சமீபித்து வருகின்றது என்பதற்கான அடையாளமே.

    காலம் சுருங்கும் வரை அந்த நாள் ஏற்படாது. (இன்றைய) ஒருவருடம் (அன்று) ஒரு வாரம் போலாகி விடும். (இன்றைய) ஒரு வாரம் (அன்று) ஒரு நாள் போலாகும், (இன்றைய) ஒரு நாள் (அன்று) ஒரு மணி நேரம் போல் ஆகும். ஒரு மணி என்பது ஒரு வினாடி போன்று ஆகும் என்பதும் நபியவர்கள் காட்டிய அடையாளம். (நூல்: திர்மிதி)

    மனிதன் மட்டுமே பேச இயலும் என்ற நிலைமாறி ஒலி நாடாக்களும் கூட பேசுகின்ற அளவுக்கு மனிதன் அறிவில் முன்னேறி விட்டான். ‘சாட்டையின் ஓரமும் செருப்பின் வாரும் மனிதனிடம் பேசும் வரை அந்த நாள் வராது’ என்பதும் நபியவர்களின் முன்னறிவிப்பு. (நூல்: திர்மிதி)

    நேரடியாக பேசும் என்று அர்த்தம் கொண்டால் அந்த நிலை இன்னும் ஏற்படவில்லை. செருப்பு வாராகப் பயன்படும் பொருட்கள் கூட ஒலி நாடாக்களாக மனிதனிடம் பேசும் என்று பொருள் கொண்டால் அந்த நிலையை மனிதன் அடைந்து விட்டான்.

    இப்படி பல அடையாளங்கள் வந்து விட்டன என்றாலும் அந்த நாள் எவ்வளவு நெருக்கத்தில் உள்ளது என்பதை நம்மால் தீர்மானிக்க முடியாது. ‘அந்த நாள் விரல் விட்டு எண்ணக்கூடிய அளவுக்கு நெருக்கமாக வரும் போது சில மகத்தான அடையாளங்கள் நிகழவுள்ளன. அந்த அடையாளங்கள் தோன்றி விட்டால் அந்த நாள் எவ்வளவு சமீபத்தில் உள்ளது என்று முடிவு செய்து விடலாம்.

    இதுவரை தோன்றியிராத விரைவில் தோன்றவிருக்கின்ற அந்த அடையாளங்களைத் தான் முக்கியமாக நாம் அறிந்து கொள்ள வேண்டும். ஏனெனில் அந்த அடையாளங்களை காணும் போது அவற்றை எதிர் கொள்ள வேண்டிய விதத்தில் எதிர் கொள்ளத் தவறினால் நமது ஈமான் பறிபோகும் அபாயம் உள்ளது. எனவே சமுதாயத்திற்கு எச்சரிக்கையாக உள்ள அந்த அடையாளங்கள் அனைத்தையும் இனி காண்போம்.

78:4 மறுமை நாள் பற்றிய கேள்விகள்

மறுமை நாள் பற்றிய கேள்விகள்

    ‘அவ்வாறன்று, அவர்கள் சீக்கிரமே அறிந்து கொள்வார்கள். மேலும் அதிசீக்கிரத்தில் அறிந்து கொள்வார்கள்’. (அல்குர்ஆன் 73:4-5)

    மறுமை நாளைப்பற்றி மக்கள் எழுப்புகின்ற வினாக்களுக்கு இறைவன் விடையளிக்கத் துவங்குகிறான். விடையை விரிவாக அறிந்து கொள்வதற்கு முன்னால் அவர்களின் வினாக்களைப் பற்றி விரிவாக அறிந்து கொள்வது அவசியம்.

    மகத்தான செய்தியைப் பற்றி – மறுமை நாளைப் பற்றி அவர்கள் கேள்விகள் எழுப்பினார்கள் என்பதை அறிந்தோம் அல்லவா? அந்த கேள்விகள் மூன்று வகையானவையாக இருந்தன.

    சில போது மறுமை நாள் எந்த ஆண்டு எந்த மாதம் எந்த நாளில் ஏற்படும் என்று கேள்வி எழுப்பினார்கள்.

    சில போது மனிதன் மரணித்து மண்ணோடு மண்ணாக ஆனபிறகு அவன் திரும்பவும் உயிர் கொடுத்து எழுப்பப்படுவான் என்பது அறிவுக்கும் பொருந்தவில்லையே! என்று அதன் சாத்தியம் பற்றி சந்தேகம் தெரிவித்தனர்.
சில போது அந்த நாளில் அப்படி என்னதான் நிகழ்ந்து விடப் போகின்றது? ஏனைய நாட்களில் நடவாத என்ன அதிசயம் அந்த நாளில் நிகழப் போகின்றது? என்பது அவர்களின் கேள்வியாக இருந்தது.

    இந்த மூன்று விதமான கேள்விகளையே மறுமை நாள் பற்றி அவர்கள் எழுப்பி வந்தனர். அவர்கள் அந்த மூன்று விதங்களில் எந்த விதமான கேள்வியை எழுப்பினார்களோ அதற்கேற்ப திருமறை நெடுகிலும் இறைவன் விடையளிக்கிறான்.

    அவர்களின் கேள்வி எப்போது நிகழும் என்பதாக இருந்தால் அதற்கு மட்டும் விடையளிப்பான். அது எப்படிச் சாத்தியமாகும் என்பது அவர்களின் கேள்வியானால் அதற்கு மட்டும் விடையளிப்பான். அந்த நாளில் அப்படி என்னதான் நிகழ்ந்துவிடப் போகிறன்றது என்பது அவர்களின் கேள்வியானால் அதற்கு மட்டும் இறைவன் விடையளிப்பான். திருமறை நெடுகிலும் இதைக் காணலாம்.

    இந்த அத்தியாத்தின் துவக்கத்தில் அவர்கள் எழுப்பியதாகக் கூறப்படும் கேள்வி, இம்மூன்று வகைகளில் எந்த வகையைச் சேர்ந்தது? காலம் பற்றியதா? சாத்தியம் பற்றியதா? நிகழும் சம்பவங்கள் பற்றியதா? இதை நாம் அறிந்து கொள்ள வேண்டும்.

    இந்த அத்தியாயத்தில் இறைவன் அறிவிக்கின்ற விடையைப் பார்க்கும் போது, அந்த மூன்று வகையையும் ஒட்டுமொத்தமாக உள்ளடக்கிய கேள்வியாகவே அதைக் கொள்ள வேண்டும். ஏனெனில் இந்த அத்தியாயத்தில் இம்மூன்று அம்சங்களுக்கும் ஒருசேர இறைவன் விடையளிக்கிறான். மூன்று வகையான கேள்விகளுக்கும் ஒரே இடத்தில் விடை கிடைப்பது இந்த அத்தியாயத்தின் தனிச்சிறப்பாகும்.

    எப்போது நிகழும்?

    மறுமைநாள் எப்போது நிகழும் என்ற கேள்விக்குரிய விடைதான் மேலே காணப்படும் இருவசனங்கள்!

    மறுமைநாள் எப்போது ஏற்படும் என்று அவர்கள் கேட்கிறார்கள். அவ்வாறன்று. அதாவது அவர்கள் இவ்வாறு கேட்கக் கூடாது. எந்நாளில் அது நிகழும் என்பது முக்கியமானதல்ல. இந்தக் கேள்வியே தவறானதாகும். வெகுவிரைவில் அவர்கள் அறிவார்கள். அதாவது இப்போது அந்த நாள் எதுவென்பதைக் கூறுவதற்கில்லை. அவர்கள் அனுபவப்பூர்வமாக அதைச் சந்தித்து அறியத்தான் போகிறார்கள். இந்தக் கேள்விக்கு இறைவன் அளிக்கக் கூடிய விடை இதுதான்.

    உனக்கொரு மகத்தான பரிசுதரப் போகிறேன் என்று கூறும் போது எப்போது தருவீர்கள் என்று கேட்கலாம். அந்தக் கேள்வியில் நியாயமிருக்கிறது. ‘உனக்குச் சரியான தண்டனை தரப் போகிறேன்’ என்று கூறும் போது எந்த ஆண்டு, எந்த மாதம் தரப் போகிறீர்கள் என்று எவரும் கேட்கமாட்டார்கள். மிகப்பெரிய வேதனையை எதிர்பார்த்துக் காத்திருக்கும் இவர்கள் அதிலிருந்து தப்பிக்கும் வழியைப் பற்றிக் கேட்பது தான் அறிவுப் பூர்வமானதே தவிர எப்போது அந்த வேதனை எனக்குக் கிடைக்கும் என்று கேட்பதில் எந்தப் பயனும் கிடையாது. அதனால் தான் இந்தக் கேள்வியே தவறு என்கிறான் இறைவன்.

    அந்த நாள் எப்போது வரும் என்று கேள்வி கேட்ட மக்கள் மட்டுமின்றி இறைத்தூதர்கள் உள்ளிட்ட எந்த மனிதரும் அது எப்போது நிகழும் என்பதை அறிய முடியாது என்று வேறு சில இடங்களில் இறைவன் தெளிவு படுத்துகின்றான்.

    ‘அவர்கள் உம்மிடம் அந்த நாள் எப்போது வரும் என்று கேட்கின்றனர். ‘அதைப் பற்றிய அறிவு என் இறைவனுக்கே உண்டு. அது நிகழும் நேரம் பற்றி அவனைத்தவிர வேறு எவரும் கூற இயலாது’ என்று நீர் கூறுவீராக! அது வானங்களிலும் பூமியிலும் பெரும்பளுவான சம்பவமாக நிகழும். (எதிர்பாராமல்) திடீரென்று அது உங்களிடம் வரும். நீர் அதுபற்றி அறிந்திருப்பீர்; போலும் என்று (எண்ணி) உம்மிடம் அவர்கள் கேட்கின்றனர். அதைப்பற்றிய அறிவு அல்லாஹ்வுக்கே உண்டு என்று கூறிவிடுவீராக! பெரும் பாலான மனிதர்கள் அறியாதவர்களாக உள்ளனர்’. (அல்குர்ஆன் 7:181)

    ‘அந்த நாள் எப்போது வரும் என்று உம்மிடம் கேட்கின்றனர் அது பற்றி விளக்கம் உமக்கு எங்கே இருக்கிறது? அதன் முடிவு உம் இறைவனுடன் (அன்றோ) இருக்கின்றது’. (அல்குர்ஆன் 19:42)

    நபி நாயகம் (ஸல்) உள்ளிட்ட எந்த மனிதரும் அது எப்போது நிகழும் என்பதை அறிந்திருக்கவில்லை. அது இறைவன் மாத்திரமே அறிந்த ஒரு விஷயமாகும் என்று இவ்வசனங்கள் விளக்குகின்றன.

    ‘அவர்களைச் சூழ்ந்து கொள்ளக் கூடிய அல்லாஹ்வின் வேதனை அவர்களுக்கு வராதென்றோ, அல்லது அவர்கள் அறியாதிருக்கும் போது திடீரென அந்த நாள் வராது என்று அவர்கள் அச்சமற்று இருக்கின்றார்களா?’ அல்குர்ஆன் 12:107)

    ‘வானங்களிலும் பூமியிலும் உள்ள இரகசியம் அல்லாஹ்வுக்கே உரியது. அந்த நாள் பற்றிய விஷயம் கண்மூடித்திறப்பது போன்றோ அல்லது அதைவிடவும் குறைவான நேரத்தில் நடந்து முடிந்துவிடும். (அல்குர்ஆன் 16:77)

    இந்த வசனங்கள் யாவுமே ‘அவர்கள் வெகுசீக்கிரம் அறிந்து கொள்வார்கள்’ என்பதன் விளக்கமாகவே அமைந்துள்ளதை அறியலாம்.

    அந்த நாள் நிச்சயம் வரத்தான் போகிறது எனும் போது அந்த நாளை இறைவன் தெளிவாக அனைவருக்கும் அறிவித்து விடலாமே! ஏன் அறிவிக்க மறுக்கிறான் என்று சிலருக்கு சந்தேகம் ஏற்படலாம்.

    இவ்வாறு அந்த நாளை இரகசியமாக வைத்திருப்பதில் உலகுக்கு ஏராளமான நன்மைகள் கிடைக்கின்றன. ஒவ்வொருவரையும் சரியான முறையில் பரீட்சிக்க இது அவசியமானதாக இருக்கின்றது.

    ஒவ்வொரு மனிதனும் நிச்சயமாக மரணத்தைத் தழுவப் போகிறான். ஆயினும் எந்த நாளில் எந்த மாதத்தில் எந்த நேரத்தில் மரணிக்கப் போகிறோம் என்பதை எவருமே அறிய முடியாது.

    மரணம் எப்போது வரும் என்பது தெரியாததால் மனிதன் ஓரளவுக்காவது மனிதனாக வாழ்ந்து வருகிறான். தனக்கு மரணம் வரும் நேரத்தை ஒருவன் முன்கூட்டியே அறிந்து விட்டால் எல்லாவிதமான அக்கிரமங்களையும் துணிந்து செய்வான். மரணத்திற்கு சற்றுமுன் பாவமன்னிப்புக் கேட்டுக் கொள்வோம் என்று எண்ணிவிடுவான்.

    நல்லவனையும் கெட்டவனையும் சரியான முறையில் பிரித்தறிய இயலாமல் போய்விடும். எல்லா மனிதனும் மரணத்திற்கு முதல் நாள்வரை மகாகெட்டவனாக வாழ்ந்து விட்டு ஒரு நாள் மட்டும் எல்லோருக்கும் நல்லவராக வாழ்ந்து விடுவார்கள். நல்லவனையும் கெட்டவனைவும் பிரித்தறிய இந்த ஏற்பாடு அவசியம் என்பது போலவே மறுமை நாளைப் பற்றியும் மறைத்து வைப்பது அவசியமே.

    நாம் வாழ்கின்ற போதே அந்த நாள் வந்துவிடுமோ என்ற அச்சம் தான் சிலரையாவது நல்லவர்களாக வாழச் செய்கின்றது. செய்கின்ற அக்கிரமத்தை எல்லாம் செய்து விட்டு கடைசி நேரத்தில் மட்டும் நல்லவனாக ஆகிவிடக் கூடாது என்பதற்கே அந்த நாள் எது என்பதை இறைவன் இரகசியமாக வைத்திருக்கின்றான். பின்வரும் வசனத்திலிருந்து இதை நாம் அறிய முடியும்.

    ‘நிச்சயமாக அந்த நாள் வரக்கூடியதாக உள்ளது. ஒவ்வொரு (ஆத்மா) மனிதனுக்கும் அவனது முயற்சிக்கேற்ப கூலி வழங்கப்படுவதற்காக அந்த நாளை நான் இரகசியமாக வைத்திருக்கிறேன்’. (அல்குர்ஆன் 20:15)
ஒவ்வொருவரும் அவரவர் செயலுக்கேற்ப கூலி வழங்கப் பட வேண்டும் என்பதற்காகவே அதை இரகசியமாக வைத்திருக்கிறான்.

    2000 ஆண்டில் அந்த நாள்வரும் என்றால் அதற்கு முந்தைய காலத்தில் வாழ்ந்தவர்கள் நேர்மையான வாழ்க்கை நடத்த மாட்டார்கள். நமது காலத்தில் அது வரப்போவதில்லை என்பதால் எப்படியும் நடக்கலாம் என்று அவர்கள் நடந்து விடக்கூடும்.

    இதன் காரணமாகவே அந்தநாள் எதுவென்று அவன் அறிவிக்கவில்லை. மறுமை நாள் எப்போது ஏற்படும் என்ற கேள்விக்கு இறைவன் விடையளிக்கா விட்டாலும் அதற்கான சில அடையாளங்களை அல்லாஹ்வும் அவனது தூதரும் கூறியுள்ளனர். அதனையும் அறிந்து விட்டு மற்ற இரண்டு கேள்விகளுக்கான விடையைப் பார்ப்போம்.

78:1 ஓர் உலகமகா செய்தி

ஓர் உலகமகா செய்தி

    ‘அம்ம யதஸாஅலூன்’ என்று துவங்கும் இந்த அத்தியாயம் ‘அந் – நபா’ அத்தியாயம் என்றழைக்கப் படுகின்றது. இதன் பொருள் ‘மகத்தான செய்தி’ என்பதாகும். இந்த அத்தியாயத்தில் மகத்தான ஒரு செய்தி பற்றிக் கூறப்படுவதால் இதற்கு இப்பெயர் வந்துள்ளது.

    நாற்பது சிறிய வசனங்களைக் கொண்ட இந்த அத்தியாயம் நபி (ஸல்) அவர்களின் மக்கா வாழ்க்கையின் போது அருளப்பட்டதாகும்.

    ‘எதைப் பற்றி அவர்கள் வினா எழுப்புகின்றனர்? அவர்கள் எதில் (இரு கூறாகப் பிளவுபட்டு) கருத்து வேறுபாடு கொண்டிருக்கிறார்களோ, அந்த மகத்தான செய்தியைப் பற்றியா (வினா எழுப்புகின்றனர்)?’ (அல்குர்ஆன் 78:1,2,3)

    என்று இந்த அத்தியாயம் துவங்குகிறது. நபி (ஸல்) அவர்கள் தமது ஏகத்துவப் பிரச்சாரத்தையும் மரணத்திற்குப் பின் இன்னொரு வாழ்க்கை உள்ளது என்பதையும் போதனை செய்த போது அவர்களை ஏற்காத மக்கள் ஏகத்துவத்தை எதிர்ப்பதை விட மறுமை வாழ்வையே கடுமையாக எதிர்த்தார்கள். மரணத்திற்குப் பின்னால் ஒரு வாழ்க்கை இருக்கிறதா என்பதே பெரும் சர்ச்சைக்குறிய விஷயமாக அவர்களுக்கு இருந்தது. அந்த வாழ்க்கையில் அவர்களுக்கு நம்பிக்கையில்லாததே ஏகத்துவத்தை அவர்கள் நிராகரிக்கக் காரணமாக இருந்தது என்று கூறலாம்.

    ‘மேலும் மனிதன் தான் படைக்கப்பட்டதை மறந்து விட்டு நமக்கு உதாரணம் கூறுகிறான். எலும்புகள் மக்கிவிட்ட நிலையில் அதை அவனால் உயிர்ப்பிக்க முடியும்? என்று அவன் கூறுகிறான்’. (36:78)

    ‘எலும்புகளாகவும் மக்கிப் போனவையாகவும் நாங்கள் ஆகிவிட்ட பின் புதிய படைப்பாக நாங்கள் எழுப்பப்படுவோமா என்ன? என்றும் அவர்கள் கேட்கின்றனர்’. (17:49)

    ‘நாங்கள் இறந்து மண்ணாகவும் எலும்புகளாகவும் ஆகிவிட்டால் நாங்கள் எழுப்பப்படுவோமா? முந்தைய எங்களின் முன்னோர்களும் எழுப்பப்படுவார்களா?’. (37:56, 56:47)

    ‘நாங்கள் இறந்து மண்ணாகவும் எலும்புகளாகவும் ஆகிவிட்ட பின் (மீண்டும் உயிர்ப்பிக்கப்பட்டு) நாம் கூலி வழங்கப் பெறுவோமா?’. (37:53)

    ‘நாம் கப்ருகளிலிருந்து திரும்பவும் எழுப்பப்படுவோமா? மக்கிப் போன எலும்புகளாக நாம் ஆகிவிட்ட போதுமா? அப்படியானால் அது பெரும் நஷ்டமுண்டாக்கும் திரும்புதலே என்றும் கூறுகின்றனர்’. (79:11)

    ‘மனிதனின் எலும்புகளை நாம் ஒன்று சேர்க்கவே மாட்டோம் என்று மனிதன் எண்ணுகின்றானா?’. (75:03)

    ‘இறந்தவர்களை அல்லாஹ் உயிர்ப்பித்து எழுப்ப மாட்டான் என்று அல்லாஹ்வின் மீதே சத்தியம் செய்து அவர்கள் கூறுகின்றனர்’. (16:38)

    ‘தாங்கள் எழுப்பப்படவே மாட்டோம் என்று நிராகரிப்பவர்கள் நினைத்துக் கொண்டிருக்கின்றனர்’. (64:07)

    ‘இன்னும் (நபியே!) ‘நிச்சயமாக நீங்கள் மரணத்திற்குப் பின் எழுப்பப்படுவீர்கள்’ என்று நீர் கூறினால் இது தெளிவான சூனியத்தைத் தவிர வேறு இல்லை என்று காபிர்கள் கூறுகின்றனர்’. (11:07)

    ‘மகத்தான ஒரு நாளில் அவர்கள் எழுப்பப்பட உள்ளனர் என்பதை அவர்கள் நினைத்துப் பார்க்க வேண்டாமா?’. (83:4)

    ‘இந்த உலக வாழ்க்கையைத் தவிர வேறு வாழ்க்கை ஏதும் இல்லை, நாங்கள் எழுப்பப்படக் கூடியவர்களாகவும் இல்லை எனவும் அவர்கள் கூறுகின்றனர். (6:29)

    நபி (ஸல்) காலத்தில் வாழ்ந்த நிராகரிப்பாளர்கள் மறுஉலக வாழ்க்கையில் எந்த அளவுக்கு நம்பிக்கை இழந்திருந்தார்கள் என்பதை மேற்கண்ட வசனங்கள் கூறுகின்றன. அவர்கள் இறைத்தூதர்களை நம்புவதற்கு இந்த விஷயமே முதல் காரணமாக இருந்தது என்பதைப் பின்வரும் வசனங்கள் கூறுகின்றன.

    ‘நிச்சயமாக நீங்கள் மரித்து மண்ணாகவும் எலும்புகளாகவும் ஆனபின்னர் நீங்கள் (திரும்பவும்) எழுப்பப்படுவீர்கள் என்று இவர் உங்களுக்கு வாக்களிக்கிறாரா?

    உங்களுக்கு (அவரால் அறிவிக்கப்பட்ட) வாக்குறுதி வெகு தொலைவு! வெகு தொலைவு!
இந்த உலக வாழ்க்கையைத் தவிர வேறு வாழ்க்கை ஏதுமில்லை, நாம் வாழ்கிறோம், மரணிக்கிறோம், (அவ்வளவு தான்) நாம் திரும்பவும் எழுப்பப்படக் கூடியவர்கள் அல்லர்.

    இவர் அல்லாஹ்வின் மீது பொய்யாக இட்டுக்கட்டிக் கூறும் மனிதரேயன்றி வேறில்லை. இவரை நாம் நம்பப் போவதில்லை என்றும் அவர்கள் கூறுகின்றனர்’. (திருக்குர்ஆன் 23:35-38)

    மறுமை வாழ்வை அவர்களால் நம்ப முடியாமல் போனதுதான் இறைத் தூதர்களையும், அவர்களது கொள்கைகளையும் அவர்களால் நம்ப முடியாமல் போனதற்குக் காரணம் என்பதை இவ்வசனங்கள் கூறுகின்றன.
இவ்வளவு வன்மையாக மறுமை வாழ்வை ஒரு கூட்டம் மறுத்து வந்தது. இன்னொரு கூட்டமோ அதைவிட உறுதியாக மறுமை வாழ்வில் முழு நம்பிக்கை வைத்திருந்தது.

    அடிக்கப்பட்டார்கள், அதனால் அவர்கள் துன்பப் பட்டாலும் தாங்கிக் கொண்டார்கள்!

    தரக்குறைவான வார்த்தைகளால் ஏசப்பட்டார்கள், சகித்துக் கொண்டார்கள்!

    சித்திரவதை செய்யப்பட்டார்கள், அதையும் சிரித்த முகத்துடன் ஏற்றுக் கொண்டார்கள்!

    நாடு கடத்தப்பட்டார்கள், அனைத்தையும் துறந்து விட்டு செல்வது அவர்களை எந்த விதத்திலும் பாதிக்கவில்லை!

    ஆசை வார்த்தைகள் அவர்களை மயக்க வில்லை. அச்சுறுத்தல்கள் அவர்களை சிறிதளவும் அசைக்க முடியவில்லை.

    குறைந்த எண்ணிக்கையினராகவும் பலவீனர்களாகவும் இருந்தும் பெரும் கூட்டத்தை எதிர்த்து நிற்குமாறு கட்டளை பிறப்பிக்கப்பட்டதும் அவர்கள் கணக்குப் பார்த்துக் கொண்டு இருக்காமல் களத்தில் குதித்தார்கள். இதற்கெல்லாம் என்ன காரணம்? இந்த உலக வாழ்க்கையோடு எல்லாம் முடிந்து விடுவதில்லை. இதன் பிறகு அழியாத பெருவாழ்வு உண்டு என்பதில் அவர்களுக்கு இருந்த உறுதியான நம்பிக்கை தான் காரணம்!

    இப்போது மீண்டும் அந்த மூன்று வசனங்களையும் நினைவுபடுத்திக் கொள்வோம்!

    எதைப்பற்றி அவர்கள் வினா எழுப்புகின்றனர்? எந்த விஷயத்தில் அவர்கள் கருத்து வேறுபாடு கொண்டுள்ளார்களோ அந்த மகத்தான செய்தியைப் பற்றியா வினா எழுப்புகின்றனர்?

    மறுஉலக வாழ்க்கையை நம்பும் விஷயத்தில் அவர்கள் இரண்டு அணிகளாக பிளவுபட்டு இருந்ததையும் அதுபற்றி அவர்கள் அடிக்கடி வினா எழுப்பிக் கொண்டிருந்ததையும் இவ்வசனங்கள் கூறுகின்றன. அவர்கள் எழுப்பிய வினாக்கள் எவ்வாறு அமைந்திருந்தன என்பதை இதற்கு முன் நாம் எடுத்துக் காட்டிய வசனங்கள் விளக்கமாக எடுத்துரைக்கின்றன.

    அவர்கள் வினா எழுப்பும் விஷயம் சாதாரணமானதல்ல. அது மகத்தான விஷயம் என்பதும் இங்கே வலியுறுத்தப்படுகின்றது. அது எப்படி மகத்தான விஷயமாக அமைந்துள்ளது என்பதையும் நாம் அறிந்து கொள்வது அவசியமாகும்.

    மறுவுலக வாழ்வில் நம்பிக்கை வைப்பது ஒரு சமுதாயத்தின் வாழ்க்கையையே தலைகீழாக மாற்றிவிடும் அளவுக்கு மகத்தானது. அவர்களது வாழ்வின் போக்கையே அந்த நம்பிக்கை மாற்றி அமைக்கும் அளவுக்கு அது மகத்தானது!

    கல்லுக்கும் மண்ணுக்கும் கடவுள் தன்மை வழங்கி வழிபட்டவர்கள், ஏக இறைவனைத் தவிர எவருக்கும் எதற்கும் அஞ்சாதவர்களாக ஆனது (33:39) இந்த நம்பிக்கையினால் தான்.

    தன்னலமே பெரிது என்ற வாழ்ந்த கூட்டம் தனக்கு வறுமை இருந்த போதும் தன்னை விட மற்றவர்கள் நலனில் அக்கறை செலுத்துபவர்களாக மாறியது (59:9) இந்த நம்பிக்கையினால் தான்.

    ஒற்றுமையின்றி தங்களுக்குள் அன்றாடம் போரிட்டுக் கொண்டிருந்த சமுதாயம் ஒற்றுமைக்கு இலக்கணமாகத் திகழ்ந்தது (3:103) இந்த நம்பிக்கையினால் தான்.

    மதுவில் வீழ்ந்து கிடந்த சமுதாயம் (5:90) அதிலிருந்து முழுமையாக விடுபட்டது இந்த நம்பிக்கையினால் தான்.

    தங்களின் அனைத்துத் தீமைகளையும் விட்டு விலகுவதாக பெண்களும் கூட உறுதி மொழி எடுத்துக் கொண்டது (60:12) இந்த நம்பிக்கையினால் தான்.

    எந்த மனிதரிடமும் எந்த உதவியையும் தேடாமல் சுயமரியாதையைப் பாதுகாக்க கூடிய சமுதாயமாக அவர்கள் மாறியதும் (2:273) இந்த நம்பிக்கையினால் தான்.

    தங்களுக்கு ‘நல்லது இது’ ‘கெட்டது இது’ என்று தெரியாத ஒரு கூட்டம் அனைத்து நன்மைகளையும்; மக்களுக்கு எடுத்துச் சொல்லி, அனைத்துத் தீமைகளை விட்டும் அவர்களை விலக்கக் கூடியவர்களாக மாறியதும் (3:104) இந்த நம்பிக்ககையினால் தான்.

    இப்படி ஒரு சமுதாயத்தின் வாழ்வையே அடியோடு மாற்றியமைப்பதற்கு இந்த நம்பிக்கை காரணமாக அமைந்துள்ளதால் அதை மகத்தான செய்தி என்று கூறுகிறான்.

    இந்த மகத்தான செய்தி பற்றி அவர்கள் வினா எழுப்பிக் கொண்டிருந்தார்கள் என்றால் அந்த வினாவுக்கு விடை என்ன? அவர்களின் மறுமை பற்றிய ஐயங்களை இறைவன் எவ்வாறு அகற்றுகிறான்?

அல் கஹ்ஃப் (அந்தக் குகை) அத்தியாயம்

அல் கஹ்ஃப் (அந்தக் குகை) அத்தியாயம்

    அளவற்ற அருளாளனும் நிகரற்ற அன்புடையோனுமாகிய அல்லாஹ்வின் திருப்பெயரால் துவங்குகிறேன்.

    கஹ்ஃப் என்ற வார்த்தையின் பொருள் குகை. அல் கஹ்ஃப் என்றால் அந்தக் குகை என்பது பொருள். இந்த அத்தியாயத்தின் ஒன்பதாவது வசனம் முதல் இருபத்தி ஆறாவது வசனம் வரை ஒரு குகையில் தஞ்சம் புகுந்த நல்லடியார்கள் குறித்த வரலாற்றுக் குறிப்பு கூறப்படுகிறது. இந்த அத்தியாயத்திற்கு அல் கஹஃப் (அந்தக் குகை) என்று பெயர் வர இதுவே காரணமாகும்.

    இந்த அத்தியாயம் நபிகள் நாயகம் (ஸல்) அவர்களின் மக்கா வாழ்க்கையின் போது அருளப்பட்டது என்பதில் அறிஞர்கள் ஒருமித்த கருத்தில் உள்ளதாக குர்துபி உள்ளிட்ட பல விரிவுரையாளர்கள் கூறுகின்றனர். ஆயினும் இதற்கு ஆதாரப்பூர்வமான சான்றுகள் எதையும் இவர்கள் எடுத்துக் காட்ட வில்லை.

    இந்த அத்தியாயத்தில் உள்ள வசனங்களில் கூறப்படும் செய்திகளைப் பார்க்கும் போது சில செய்திகள் மக்காவில் அருளப்பட்டு இருக்கலாம். வேறு சில செய்திகள் மதீனாவில் அருளப்பட்டு இருக்கலாம் என்று அனுமானம் செய்வதற்கு போதுமான காரணங்கள் உள்ளன. இன்னும் சில வசனங்களின் அமைப்பைப் பார்க்கும் போது அதன் அமைப்பிலிருந்து அது மக்காவில் அருளப்பட்டது என்றோ மதினாவில் அருளப்பட்டது என்றோ முடிவுக்கு வரமுடியாது.

    எனவே, ஒட்டு மொத்தமாக இந்த அத்தியாயம் மக்காவில் அருளப்பட்டது என்று கூறுவதை ஏற்றுக் கொள்ள முடியாது. ஏற்க வேண்டும் என்ற கட்டாயமும் கிடையாது.

    இது மக்காவில் அருளப்பட்டது அல்லது மதினாவில் அருளப்பட்டது என்று நபித்தோழர்கள் கூறியதாக குறிப்பு கிடைக்கும் போது மட்டுமே இது பற்றி நாம் முடிவுக்கு வர வேண்டும். அவ்வாறு குறிப்புக்கள் கிடைக்காத போது மக்கீ மதனி என்று ஏதாவது ஒன்றைக் கூறியாக வேண்டும் என்பதற்காக எதையாவது கூறுவதை ஒப்புக் கொள்ள முடியாது. திருக்குர்ஆனின் விரிவுரையாளர்களில் பலர் மக்கீ, மதனி என்று எதையாவது கூறியாக வேண்டுமே என்பதற்காகத் தான் கூறியுள்ளனர் என்பதை நாம் நினைவில் கொள்ள வேண்டும்.

    அல்லாஹ்வின் வார்த்தைகள் என்ற அடிப்படையில் திருக்குர்ஆனின் எல்லா வசனங்களும் சமமானவையே என்றாலும் சில அத்தியாயங்களுக்கு தனிச் சிறப்புகள் இருப்பதாக ஏராளமான ஹதீஸ்கள் உள்ளன. திருக்குர்ஆனின் ஒவ்வொரு அத்தியாயங்களின் சிறப்புக்களை எடுத்துரைக்கும் இத்தகைய ஹதீஸ்களில் பெரும்பாலானவை இட்டுக் கட்டப்பட்டவையாகவே உள்ளன.

    அல்பகரா, குல்ஹுவல்லாஹ், குல்அஊது பிரப்பின்னாஸ், குல்அஊது பிரப்பில் ஃபலக், அல்ஹம்து, ஆயத்துல் குர்ஸி, அல் கஹ்ஃப் ஆகிய அத்தியாயங்களின் சிறப்பு குறித்த ஹதீஸ்களில் மட்டுமே ஆதாரப்பூர்வமான ஹதீஸ்களைக் காண முடிகிறது. கஹ்ஃப் அத்தியாயத்தின் சிறப்புகள் குறித்தம் ஆதாரப்பூர்வமான ஹதீஸ்கள் உள்ளதால் அந்த சிறப்புகளை அறிந்து விட்டு இந்த அத்தியாயத்தின் விளக்கத்திற்குள் நாம் நுழைவோம்.

    ‘கஹ்ஃப் அத்தியாயத்தின் முதல் பத்து வசனங்களை யார் மனனம் செய்கிறாரோ அவர் தஜ்ஜாலை விட்டும் பாதுகாப்பு பெறுவார்’ என்று நபிகள் நாயகம் (ஸல்) அவர்கள் கூறினார்கள். (அறிவிப்பவர் : அபூதர்தா (ரலி), நூல் : முஸ்லிம்)

    இந்தப் பத்து வசனங்களுக்கும் தஜ்ஜாலுக்கும் என்ன தொடர்பு என்பதை பத்து வசனங்களுக்கான விளக்கம் நிறைவடையும் போது நாம் குறிப்பிடுவோம் இன்ஷா அல்லாஹ். இந்தப் பத்து வசனங்களை மனனம் செய்வது தஜ்ஜாலிடமிருந்து பாதுகாக்கும் கேடயம் என்பதை மட்டும் இப்போது புரிந்து கொண்டால் போதுமானது.

    ‘உங்களில் யார் தஜ்ஜாலை அடைகிறீர்களோ அவர் அவனை நோக்கி கஹ்ஃப் அத்தியாயத்தின் ஆரம்ப வசனங்களை ஓதட்டும’; என்று நபி (ஸல்) அவர்கள் கூறினார்கள். (நீண்ட ஹதீஸின் சிறு பகுதி)
(அறிவிப்பவர் : நவ்வாஸ் பின் சம்ஆன் (ரலி), நூல் : முஸ்லிம்)

    அபூதாவூத் நூலின் அறிவிப்பில், ‘அவனை உங்களில் யார் அடைகிறீர்களோ அவர் அவனை நோக்கி கஹ்ஃப் அத்தியாயத்தின் ஆரம்ப வசனங்களை ஓதட்டும் நிச்சயமாக அது தஜ்ஜாலின் சோதனைகளிலிருந்து பாதுகாக்கும்’ என்று கூறப்பட்டுள்ளது.

    முஸ்லிம் சமுதாயத்தின் மிகப் பெரிய சோதனையாக இருக்கும் தஜ்ஜாலின் வருகையின் போது ஈமானைக் காக்கும் கேடயமாக இவ்வசனங்கள் அமைந்திருப்பது அந்த அத்தியாயத்திற்கான சிறப்புகளில் ஒன்றாகும்.

    ஒரு மனிதர் கஹ்ஃப் அத்தியாயத்தை ஓதிக் கொண்டிருந்தார். அப்போது வீட்டில் இருந்த கால்நடை ஓட ஆரம்பித்தது. கஹ்ஃப் அத்தியாயத்தை ஓதிய மனிதர் கவனித்த போது அவர் மீது மேகம் நிழலிட்டுக் கொண்டிருந்தது. அவர் இதை நபி (ஸல்) அவர்களிடம் கூறினார். அதற்கு நபி (ஸல்) அவர்கள், ‘இந்த நிலை குர்ஆனை ஓதும் போது இறங்கிய (சகீனத் எனும்) அமைதியாகும்’ என்று விடையளித்தார்கள். (அறிவிப்பவர் : பராஃ (ரலி), நூல்கள் : புஹாரி, முஸ்லிம்)

    ‘ஜும்ஆ நாளில் யாரேனும் கஹ்ஃப் அத்தியாயத்தை ஓதினால் அடுத்த ஜும்ஆ வரை அவருக்கு பிரகாசம் நீடிக்கிறது’ என்று நபி (ஸல்) அவர்கள் கூறினார்கள். (அறிவிப்பவர் : அபூஸயீது (ரலி), நூல் : ஹாக்கிம்)

    அல் கஹ்ஃப் அத்தியாயம் இத்தகைய தனிச் சிறப்புகள் வாய்ந்த அத்தியாயம் ஆகும். இந்த அத்தியாயத்தின் விளக்கத்தை இனி காணலாம்.

23:12 அலக் எனும் அற்புதம்

 

 அலக் எனும் அற்புதம்
 ஹாபிழ் கே.என்.முஹம்மது ஜமாலி பாக்கவி, ஃபாஸில் உமரி,மக்கி
 

‘நிச்சயமாக மனிதனை களி மண்ணின் மூலத்திலிருந்து நாம் படைத்தோம். பின்னர் பாதுகாப்பான ஓரிடத்தில், அவனை விந்தாக நாம் ஆக்கினோம். பின்னர், இந்த இந்திரியத்தை அலக்காக படைத்தோம். பின்னர் அந்த அலக்கை தசைத் துண்டாகப் படைத்தோம்.பின்னர் அந்த தசைத் துண்டை எலும்புகளாகப் படைத்தோம்.பின்னர் அவ்வெலும்புகளுக்கு சதையை அணிவித்தோம்.

பின்னர் அவனை வேறொரு படைப்பாக (முழு மனிதனாக) உண்டாக்கினோம் …’ (அல்குர்ஆன் 23:12-14)

 ஆண் உயிரணுவும் பெண் சினை முட்டையும் சேர்ந்து ‘ஸைகோட்’ எனும் புதிய செல் உருவாகிறது. மனித கருவின் ஆரம்பம் இந்த ஸைகோட்டில் இருந்து தான் தொடங்குகிறது. ‘கலப்பு இந்திரியத்திலிருந்து நாம் மனிதனைப் படைத்தோம்’ என்று அல்குர்ஆன் 76:2ல் குறிப்பிடுவது இதனைத்தான்.
 அல்குர்ஆன் இறக்கியருளப்பட்டு சுமார் 1300 ஆண்டுகளுக்குப் பிறகு கருவியலில் ‘கலப்பு இந்திரியம்’ என்ற கட்டம் இருப்பதாக ஹெர்ட்விக் என்பவரால் 1875ம் ஆண்டில் தான் கண்டுபிடிக்கப்பட்டது என்பது
குறிப்பிடத்தக்கது.
 ‘கலப்பு இந்திரியம்’ தன்னுடைய பலவித பரிமாணங்களுடன் கருவின் குழாய் வழியாக கருவகத்தை நோக்கி திரவப் பந்தின் வடிவமைப்பைப் பெற்று நகர்கிறது. அப்;போது அதன் செல்கள் பன்மடங்காகப் பெருகுகின்றன. இருந்தாலும் கூட கற்பப் பையின் உள்வரிச் சவ்வில் தன்னைப் பதித்துக் கொள்ளும் வரை திரவப் பந்தின் வடிவத்தையே கொண்டிருக்கின்றது.
 இதைத் தொடர்ந்து ‘கலப்பு இந்திரியம்’ என்ற நிலையிலிருந்து ‘அலகா’ எனும் புதிய நிலைக்கு மாறுகிறது.
 ‘அலக்’ என்பது கருவுற்ற சினைமுட்டையா?
 ‘அலக்’ என்பது ‘அலகா’ எனும் வார்த்தையின் பன்மைச் சொல்லாகும். அலகா என்பதற்கு மூன்று பொருள்கள் உள்ளன. அந்த மூன்று பொருள்களும் ‘அலகா’வின் நிலைக்கு பொருந்திப் போவது அல்லாஹ்வின் வல்லமையை நினைவூட்டுகிறது. அறிவியல் வல்லுனர்களையும் வியப்பில் ஆழ்த்துகிறது.
 1. பற்றிப் பிடித்து தொங்குதல்: நீர்த் துளி வடிவில் உள்ள கலப்பு இந்திரியம் ஏழாவது நாளில் கருப்பையினுள் நுழைகிறது. கருப்பையினுள் ஒரு பாதுகாப்பான இடத்தை தேர்வு செய்து அதன் உள்வரிச் சவ்வில் தன்னை ஆழப்பதித்து, தொங்கத் தொடங்குகிறது.

2. இரத்தம், கருஞ்சிவப்பு இரத்தம், உறைந்த இரத்தம்: தொங்கிக் கொண்டிருக்கும் கரு, அதன் மூன்றாவது வாரத்தின் இடையே இரத்தத்தால் நிரப்பப்பட்டு, மூடப்பட்டுள்ள நாளங்களைக் கொண்டதாக உருமாறுகிறது.

3. குளங்களில் வாழ்ந்து உயிர்ப் பிராணிகளைப் பற்றிப்பிடித்து, அதன் இரத்தத்தை உட்கொள்ளும் அட்டைப் பூச்சியோடு, நிரப்பப்பட்ட இரத்த நாளங்களுடன் தொங்கிக் கொண்டிருக்கும் கரு, அதன் மூன்றாவது வார இறுதியில், தோற்றத்திலும் இரத்தத்தை உறிஞ்சும் போது பிராணிகளை உறுதியாகப் பற்றிப்பிடித்துக் கொள்வதிலும் முழுமையாக ஒத்துப் போகிறது.

 வெளித் தோற்றத்தில் அட்டைப் பூச்சியைப் போன்றும், உட்புறத்தில் இரத்தம் நிரப்பப்பட்ட நாளங்களைக் கொண்டதாகவும் இருக்கும் ‘அலகா’
கருவறையில் தன்னை ஆழப்பதித்து தொங்கிக் கொண்டிருக்கிறது என்பது தான் அலகாவின் முழுமையான விளக்கமும் பொருளுமாகும்.
 அறிவுலகத்தின் தந்தை என்றும் கிரேக்கத் தத்துவஞானி என்றும் போற்றப்படும் அரிஸ்டாட்டில் (கி.மு.384 – 322) கூட மாதவிடாய் இரத்தத்தில் இருந்து தான் மனிதன் படைக்கப்பட்டான் என்று கூறிக் கொண்டிருந்தார். இந்திரியத் துளியில் ஒழிந்திருக்கும் குட்டி மனிதன் தான் கருவறைக்குள் சென்று வளர்ந்து குழந்தையாக வெளியேறுகிறான் என்று ஒரு பிரிவினர் கூறிக் கொண்டிருக்க, மற்றொரு பிரிவினரோ அந்த குட்டி மனிதன் ‘சினை முட்டையில்’ தான் மறைந்திருக்கிறான் என்று கூறி வந்தனர். 17ம் நூற்றாண்டு வரை கருவியல் கோட்பாடு இவ்வாறு தான் இருந்தது.
 அறிவியல் கண்களை திறந்துவிட அல்குர்ஆன் மகத்தான பங்காற்றியது. மனித உருவாக்கம் தொடர்பான அல்குர்ஆன் வசனங்கள் அறிவியல் உலகின் திருப்பு முனையாயின. அதிலும் குறிப்பாக ‘அலக்’ எனும் பதம் கருவியல் உலகில் பெரும் புரட்சிக்கே வித்திட்டது.
 கிருத்துவ மதத்தைச் சேர்ந்த மருத்துவ ஆய்வாளர்கள் டாக்டர் கீத்மூர், மாரீஸ் புகைல், டாக்டர் ஜோ, லே ஸிம்சன் போன்ற சிந்தனையாளர்களை
அல்குர்ஆன் அல்லாஹ்வின் அற்புத வேதம் என்று கூற நிர்ப்பந்தித்தது.
 கனடாவில் டொரண்டோ பல்கலைக் கழகத்தில் உடற்கூறு துறைத்
தலைவராகவும் கருவியல் துறைப் பேராசிரியராகவும் இருந்த டாக்டர் கீத் மூர் ‘அலக்’ எனும் ஒரு கட்டத்தை மனிதக் கரு அடைகிறது என அல்குர்ஆன் கூறுவதை அறிந்து வியந்து போனார்.
 அது பற்றி விரிவாக ஆய்வு செய்த அவர்,
 கருவின் படத்தை ஒரு அட்டைப் பூச்சியின் படத்துடன் ஒப்பிட்டு, கருவின் ஆரம்பத்தோற்றமும் அதன் செயற்பாடுகளும் அட்டைப்பூச்சியின் தோற்றமும் அதன் தொழிற்பாடுகளும் ஒரே விதமாக இருந்ததைக் கண்டு வியந்து போன அவர், மேலும் இத்துறையில் தொடர்ந்து ஆய்வுகள் செய்யலானார். ஏனெனில், ஆரம்ப நிலைக்கரு அட்டைப் பூச்சி போன்றதென இதற்கு முன் கீத்மூர் அறிந்திருக்கவில்லை. இது இத்துறையில் அவரை மேலும் ஆய்வுகள் செய்யத் தூண்டியது.
 விலங்கியல் துறைக்குச் சென்று அட்டைப் பூச்சியை எடுத்து வந்து மனிதக் கருவுக்கு ஒப்பிட்டுக் காட்டினார். இரு போட்டோக்களையும் வெளியிட்டு அல்குர்ஆன் வாயிலாக தான் அறிந்த உண்மையை உலகுக்கு தெரிவித்து மகிழ்ந்தார்.
 அரபியரிடத்தில் ‘அலக்’ என்பதின் பொருள் உறைந்த இரத்தம் என்பதாகும் என்று அவரிடம் கூறப்பட்ட போது டாக்டர் கீத்மூர் திகைத்து விட்டார். குர்ஆனில் சொல்லப்பட்டது கருவின் வெளித்தோற்றத்திற்கான நுட்பமான வர்ணனையான மட்டும் அல்ல! மாறாக கருவின் உட்புற உருவாக்கத்திற்கான தெளிவான வர்ணனையாகக் கூட இருக்கிறது. ஏனெனில் ‘அலக்’ உடைய கட்டத்தில் நுட்பமான நாளங்களில் இரத்தமானது மூடப்பட்டதாக அமைந்திருக்கிறது என்றார்.
 கனடா நாட்டு நாளேடுகளின் தலைப்புச் செய்தியாகவே இது இடம் பெறலாயிற்று. அதில் ஒரு நாளேடு ‘பழங்காலப் புத்தகத்தில் இடம் பெற்றுள்ள ‘ஆச்சரியப்படத்தக்க செய்தி’ என்று தலைப்பிட்டிருந்தது.
 மனிதக் கண்களால் நேரடியாக காண முடியாத அளவுக்கு கருவின் ஆரம்பத் தோற்றங்கள் மிக நுட்பமானவை. மைக்ரோஸ்கோப் உதவியுடன் தான் ஒருவர் இவற்றைப் பார்க்க முடியும். சுமார் 200 வருடங்களுக்கு முன்பு தான் இக்கருவி
கண்டுபிடிக்கப்பட்டது.
 கருவளர்ச்சி குறித்து நம் கண் முன்னே உள்ள சிலேடுகளும் படங்களும் ஆகிய அனைத்துமே மைக்ரோஸ்கோப் உதவியுடன் படம் பிடிக்கப்பட்டவை. 14
நூற்றாண்டுகளுக்கு முன்பு கரடுமுரடான அறுவை சிகிச்சை செய்து கருவின் வளர்ச்சிப் படிகளை ஒருவர் காண முயன்றிருந்தால் கூட, அவற்றை அவரால் கண்கூடாகப் பார்த்திருக்க முடியாது என்றார் டாக்டர் கீத் மூர்.
 கரு வளர்ச்சியின் படித்தரங்களின் விளக்கங்களை அல்லாஹ்வின் தூதர் அறிந்திருக்க வாய்ப்பிருக்கிறதா? என்று அவரிடம் கேட்கப்பட்ட போது, அதற்கு சாத்தியமே இல்லை. ஏனென்றால் கரு படிப்படியாக உருவாக்கப்படுகிறது என்பதை அன்றைய முழு உலகமும் அறிந்திருக்க வில்லை என்றார்.
 அதனைத் தொடர்ந்து அல்குர்ஆனிலும் நபிமொழியிலும் கருவியல் தொடர்பாக சுமார் 80 விஞ்ஞான உண்மைகளைத் திரட்டினார். தான் ஏற்கனவே எழுதி வெளியிட்டிருந்த கருவில் உருவாகும் மனிதன் எனும் நூலில் இத்தகவல்களை இணைத்து அதன் மூன்றாம் பதிப்பாக 1982ல் வெளியிட்டார். மருத்துவத் துறையில் மிகச் சிறந்த நூல் என்ற பட்டத்தைப் பெற்றுத் தந்த அந்த நூல், கருவியல் துறையில் முக்கியப் பாடநூலாக முதலாமாண்டு மருத்துவ மாணவர்களுக்கு பயன்படுத்தப்படுவது குறிப்பிடத்தக்கது.
 1981ல் சவூதி அரேபியா, தம்மாமில் நடந்த ஏழாவது மருத்துவ மாநாட்டில் ‘அல்குர்ஆன் இறை வேதம் தான் என்பதற்கும் முஹம்மது நபி (ஸல்)
அவர்கள் அல்லாஹ்வின் தூதர் தான் என்பதற்கும் ‘அலக்’ ஒரு மகத்தான அத்தாட்சி என்று தனது உரையில் குறிப்பிட்டுள்ளார்.
 அல்குர்ஆனின் அற்புதம் கண்டு இஸ்லாத்தின் பால் விரைந்து கொண்டிருக்கும் விஞ்ஞானிகளை கிருத்துவ மதத்தில் தக்க வைப்பதற்காக கிறிஸ்துவ உலகம் படாதபாடு படுகிறது.
 கிறித்துவ பிரச்சாரகரான ஜகரிய்யா பத்ருஸ் என்பவர் கிருத்துவ வேதங்களிலும்? ‘அலக்’ என்பது இருப்பதாக பொய்யாக வாதிட்டுக் கொண்டிருக்கிறார்.
 இந்நிலையில் ‘அலக்’ என்பதற்கு கலப்பு இந்திரியத்தைக் குறிக்கும் கருவுற்ற சினை முட்டை என்ற சொல்லைப் பயன்படுத்தி விளக்கம் கொடுத்துள்ளார், தமிழகத்தைச் சேர்ந்த ஒருவர். இந்திரிய நிலையைத் தாண்டி, ‘அலக்’
எனும் அடுத்த கட்டத்திற்கு வந்த கருவை மீண்டும் இந்திரிய நிலைக்கே கொண்டு சென்றுள்ளார். பிறகு அங்கிருந்து ‘அலக்’கிற்கு அடுத்த நிலையான முல்கா நிலைக்குத் தாவி விடுகிறார். ஆக விஞ்ஞானிகளை வியப்புற வைக்கும் ‘அலக்’கின் எதார்த்தப் பொருளை அல்குர்ஆனில் இருந்து அப்புறப்படுத்தி யுள்ளனர்.
 அல்குர்ஆனின் 96வது அத்தியாத்தின் பெயரையும் ‘அலக்’ எனும் பதம் இடம் பெற்ற (22:5, 23:14, 40:67, 75:38, 96:2) அனைத்து ஆயத்துகளின்
பொருள்களையும் மாற்றியுள்ளார். கிருத்துவ உலகை ஆட்டிப் படைக்கும் அலக் எனும் சொல்லுக்கு மாற்றுப் பொருள் கொடுப்பதின் மூலம் இஸ்லாத்தின் எதிரிகளோடு கை கோர்க்க முயல்கிறாரோ என்ற சந்தேகம் பலருக்கும் எழுந்துள்ளது. எனவே முஸ்லிம்கள் இவர்களிடம் கவனமாக இருப்பது மிக அவசியமாகும்.
 சத்தியம் வந்தது, அசத்தியம் அழிந்தது, அசத்தியம் அழிந்தே தீரும். (அல்குர்ஆன் 17:8)
 சமுதாய ஒற்றுமை

18:28 ஏற்றத்தாழ்வுகளை எடுத்தெறிந்த இஸ்லாம்

ஏற்றத்தாழ்வுகளை எடுத்தெறிந்த இஸ்லாம்

    ‘தமது இறைவனின் திருமுகத்தை நாடி காலையிலும், மாலையிலும் தமது இறைவனைப் பிரார்த்திக்கும் மக்களுடன் உம்மைக் கட்டுப்படுத்திக் கொள்வீராக! இவ்வுலக வாழ்க்கையின் கவர்ச்சியை நாடி அவர்களை விட்டும் உமது கண்களைத் திருப்பி விடாதீர்! நம்மை நினைப்பதை விட்டும் எவனது சிந்தனையை நாம் மறக்கடிக்கச் செய்து விட்டோமோ அவனுக்குக் கட்டுப்படாதீர்! அவன் தனது மனோஇச்சையைப் பின்பற்றுகிறான். அவனது காரியம் வரம்பு மீறுவதாக உள்ளது’ (அல்குர்ஆன் 18:28)

காலையிலும் மாலையிலும் இறைவனிடம் பிரார்த்தனை செய்யும் கூட்டத்தாருடன் இருக்குமாறும், மனோ இச்சையைப் பின்பற்றியவனுக்குக் கட்டுப்பட வேண்டாம் எனவும் இவ்வசனம் நபிகள் நாயகம் (ஸல்) அவர்களுக்குக் கட்டளையிடுகிறது.

    இறைவனைக் காலையிலும் மாலையிலும் பிரார்த்தனை செய்யும் கூட்டத்தார் எனக் குறிப்பிடப்படுவோர் இவ்வுலகின் புகழ் வசதி வாய்ப்புகள் இல்லாதவர்களாக இருந்தனர் எனவும் மனோ இச்சையைப் பின்பற்றியோர் செல்வமும் செல்வாக்கும் பெற்றவர்களாக இருந்தனர் எனவும் இந்த வசனத்திலிருந்து அறிந்து கொள்ள முடிகின்றது. இவ்வுலகின் கவர்ச்சியின்பால் உமது கண்களைத் திருப்ப வேண்டாம் என்ற சொற்றொடரிலிருந்து இதை அறிந்து கொள்ளலாம்.

    இது போன்ற கருத்தை 6:52 வசனமும் கூறுகின்றது.

    ‘(முஹம்மதே!) தமது இறைவனின் திருப்தியை நாடி காலையிலும் மாலையிலும் அவனிடம் பிரார்த்திப்போரை நீர் விரட்டாதீர்! அவர்களைப் பற்றிய விசாரணையில் உமக்கு எந்தப் பொறுப்பும் இல்லை. உம்மைப் பற்றிய விசாரணையில் அவர்களுக்கு எந்தப் பொறுப்பும் இல்லை. எனவே அவர்களை நீர் விரட்டினால் அந்த இழைத்தவராவீர்!’ (அல்குர்ஆன் 6:52)

    இவ்வசனத்தில் காலையிலும் மாலையிலும் இறைவனைப் பிரார்த்திக்கும் மக்களை விரட்டியடிக்க வேண்டாம் எனவும் அவ்வாறு விரட்டியடித்தால் அநீதி இழைத்தவராவீர் எனவும் கூறப்படுகின்றது.

    இது போன்ற கருத்து மேலும் இரண்டு வசனங்களிலும் கூறப்பட்டுள்ளது.

    ‘அவர்களில் பல்வேறு கூட்டத்தினர் அனுபவிப்பதற்காக நாம் வழங்கியுள்ளதை நோக்கி உமது கண்களை நீட்டாதீர்! அவர்களுக்காகக் கவலைப்படாதீர்! நம்பிக்கை கொண்டோரிடம் உமது சிறகைத் தாழ்த்துவீராக!’ (அல்குர்ஆன் 15:88)

    ‘(முஹம்மதே!) சோதிப்பதற்காக அவர்களில் சிலருக்கு நாம் வழங்கிய இவ்வுலக வாழ்க்கையின் கவர்ச்சியை நோக்கி உமது கண்களை நீட்டாதீர்! உமது இறைவனின் செல்வம் சிறந்ததும் நிலையானதுமாகும்’ (அல்குர்ஆன் 21:131)

    சாமான்யர்களையும் ஏழைகளையும் அடிமைகளையும் செல்வந்தர்களுக்காக செல்வாக்குடையோருக்காக இழந்து விடக் கூடாது என்பது இவ்வசனங்கள் கூறும் சாராம்சம்.

    இது எந்தச் சந்தர்ப்பத்தில் கூறப்பட்ட அறிவுரை என்பதைப் பின்வரும் நபிமொழியிலிருந்து அறிந்து கொள்ளலாம்.

    நான், இப்னு மஸ்வூத், ஹுதைல் கோத்திரத்தைச் சேர்ந்த ஒருவர், பிலால் மற்றும் இருவர் நபிகள் நாயகம் (ஸல்) அவர்களுடன் அமர்ந்திருந்தோம். அவ்விருவரின் பெயரை நான் மறந்து விட்டேன். அப்போது இணை வைப்பவர்கள் நபிகள் நாயகம் (ஸல்) அவர்களிடம் வந்தனர். ‘இவர்களை விட்டு விடுவீராக! இல்லாவிட்டால் எங்கள் விஷயத்தில் இவர்களுக்கு துணிச்சல் வந்து விடும்’ என்று கூறினார்கள். அப்போது நபிகள் நாயகம் (ஸல்) அவர்களின் உள்ளத்தில் எது ஏற்பட வேண்டும் என்று அல்லாஹ் நாடினானோ அது ஏற்பட்டு விட்டது. அப்போது தான் இந்த (6:52) வசனம் அருளப்பட்டது என்று ஸஃது பின் அபீவக்காஸ் (ரலி) அறிவிக்கின்றார்கள். (நூல் : முஸ்லிம் 2413)

    நபிகள் நாயகம் (ஸல்) அவர்களை எதிர்த்தவர்களுக்கு நபிகளார்மீது நம்பிக்கை இருந்தது. நாற்பது வருடங்களாக அவர்களின் அப்பழுக்கற்ற வாழ்க்கையைப் பார்த்த அம்மக்கள் இறைத்தூதர் என்று முஹம்மது பொய் சொல்கிறார் என நினைக்கவில்லை.

    அவர்களிடம் உள்ள முக்கியமான தயக்கம் காலாகாலம் கட்டிக்காத்து வந்த சாதி அமைப்பை இவர் உடைத்தெறிகின்றார். உயர் குலத்தைச் சேர்ந்த இவர் இழிகுலத்தைச் சேர்ந்தவர்களைத் தம்மோடு சமமாக அமர வைக்கின்றார். இவரோடு நாமும் சேர்ந்தால் அனைவரையும் சமமாக ஆக்கி விடுவார் என்ற அச்சம் தான் நபிகள் நாயகத்தை ஏற்பதற்குப் பெரிய தடையாக அம்மக்களுக்கு இருந்தது.

    எனவே தான் பலவீனர்களை விரட்டினால் அல்லது அவர்களுக்குத் தனி சபையையும் தங்களுக்குத் தனி சபையையும் ஏற்படுத்தினால் இஸ்லாத்தை ஏற்கத் தயார் என்று அவர்கள் கோரினார்கள்.

    செல்வமும் செல்வாக்கும் மிக்கவர்கள் இஸ்லாத்தில் சேர்வது பலம் சேர்க்கும் என்று நினைத்து நபிகள் நாயகம் (ஸல்) அவர்களும் இதைச் சரி என நினைத்தார்கள். இஸ்லாத்தை ஏற்ற பின் அவர்களைப் பக்குவப்படுத்திக் கொள்ளலாம் என்பது இதற்குக் காரணமாக இருந்திருக்கலாம். காரணம் எதுவாக இருந்தாலும் நபிகள் நாயகம் (ஸல்) அவர்கள் அவ்வாறு நினைத்தார்கள் என்பதை மேற்கண்ட முஸ்லிம் ஹதீஸிலிருந்து அறிந்து கொள்ளலாம்.

    ஆனால் இறைவனுக்கு அதில் உடன்பாடில்லை. இஸ்லாத்தை ஏற்பதாக இருந்தால் அனைவரும் சமம் என்ற அடிப்படையையும் சேர்த்து ஏற்றாக வேண்டும். தமக்கு வசதியானதை மட்டும் ஏற்று மற்றதை ஏற்க மறுப்பவர்களுக்காக வளையத் தேவையில்லை. அவர்கள் வரத் தேவையில்லை என்பது தான் அல்லாஹ்வின் நிலையாக இருந்தது.

    எனவே தான் இவ்வசனங்களில் கடுமையாகவே நபிகள் நாயகம் (ஸல்) அவர்களை அல்லாஹ் எச்சரிக்கிறான். ஏற்கனவே முழு இஸ்லாத்தை ஏற்றவர்களுடன் தான் இருக்க வேண்டுமே தவிர பாதி இஸ்லாத்தை ஏற்பதாகக் கூறுவோரின் செல்வம் செல்வாக்கு போன்றவற்றால் கவரப்பட்டுவிட வேண்டாம் என்று கண்டிக்கிறான்.

    இதே போல் மற்றொரு சந்தர்ப்பத்தில் நபிகள் நாயகம் (ஸல்) அவர்களை இறைவன் கண்டிக்கிறான்.

    அப்துல்லாஹ் பின் உம்மி மக்தூம் என்ற பார்வையற்ற தோழர் நபிகள் நாயகத்திடம் வந்தார். எனக்கு அறிவுரை கூறுங்கள் என்றார். அப்போது நபிகள் நாயகம் (ஸல்) அவர்களுடன் இணை வைப்பவர்களில் முக்கியப் பிரமுகர் ஒருவர் இருந்தார். நபிகள் நாயகம் (ஸல்) அவர்கள் அந்தப் பார்வையற்ற தோழரைப் புறக்கணித்து விட்டு, முக்கியப் பிரமுகரின் பால் கவனம் செலுத்தினார்கள். ‘நான் கூறுவதில் தவறேதும் காண்கிறாயா?’ என்று அந்தப் பிரமுகரிடம் நபியவர்கள் கேட்க, அவர் இல்லை என்று கூறினார். அப்போது தான் அல்குர்ஆன் 80வது அத்தியாயம் 1 முதல் பத்து வரையிலான வசனங்கள் அருளப்பட்டன. (நூல்கள் : திர்மிதி 3452,3328, முஸனத் அபூயஃலா 4848)

    தன்னிடம் அந்தக் குருடர் வந்ததற்காக இவர் கடுகடுத்தார். அலட்சியம் செய்தார். அவர் தூயவராக இருக்கலாம் என்பது (முஹம்மதே!) உமக்கு எப்படித் தெரியும்? அல்லது அவர் அறிவுரை பெறலாம். அந்த அறிவுரை அவருக்குப் பயன் அளிக்கலாம். யார் அலட்சியம் செய்கிறானோ அவனிடம் வலியச் செல்கிறீர். அவன் பரிசுத்தமாக ஆகாவிட்டால் உம் மீது ஏதும் இல்லை. (இறைவனை) அஞ்சி உம்மிடம் யார் ஓடி வருகிறாரோ அவரை அலட்சியம் செய்கிறீர். (அல்குர்ஆன் 80:1-10)

    ஏற்கனவே இஸ்லாத்தை ஏற்ற பலவீனரை விட இஸ்லாத்தை ஏற்காதவர் பிரமுகர் என்பதற்காக நபிகள் நாயகம் முக்கியத்துவம் அளித்தார்கள் என்பதால் எவ்வளவு கடுமையான சொற்களால் இறைவன் கண்டிக்கிறான் என்பதைக் காணும் போது இணை வைத்தலுக்கு அடுத்த படியாக குலத்தால் உயர்வு கற்பித்தல் இறைவனுக்குக் கடும் கோபத்தை ஏற்படுத்தும் காரியம் என்பதை அறிந்து கொள்ளலாம்.

    நபிகள் நாயகம் (ஸல்) அவர்களே இந்த விஷயத்திற்காக மிகவும் கடுமையாகக் கண்டிக்கப்பட்டுள்ளதால் தான் முஸ்லிம்கள் சாதி, குலம், நிறம், மொழி, இனம், தேசம் போன்ற காரணங்களால் மனிதர்களுக்கிடையே உயர்வு தாழ்வு கற்பிப்பதைக் காண முடியவில்லை. எத்தனையோ சட்டங்கள் போட்டு ஒழிக்க முடியாத தீண்டாமையை அடியோடு ஒழித்துக் கட்டியதற்கு இத்தகைய கடுமையான நிலைபாடே காரணமாக இருக்கின்றது.

    சாதாரண மக்களுக்காக தனது தூதரையே இறைவன் கண்டிக்கிறான் என்பதால் தான் மனிதர்களுக்கிடையே ஏற்றத்தாழ்வு கற்பித்தல் கூடாது என்பது முஸ்லிம்களின் இரத்தங்களில் இரண்டறக் கலந்து விட்டது.

    நபிகள் நாயகத்தின் மரியாதையை இவ்வசனங்கள் குறைப்பதாக சிலர் நினைக்கலாம். நிச்சயமாக இது தான் நபிகள் நாயகம் (ஸல்) அவர்களின் மதிப்பை உயர்த்தியது எனலாம்.

    திருக்குர்ஆன் இறைவனிடமிருந்து தமக்கு வருவதாக நபிகள் நாயகம் (ஸல்) அவர்கள் கூறினார்கள். அவர்கள் கற்பனை செய்து இறை வேதம் எனக் கூறியிருந்தால் தம்மை இவ்வளவு கடுமையாகக் கண்டிக்கும் வசனங்களை இட்டுக் கட்டியிருக்க முடியாது. அவர்களின் மரியாதையைப் பாதிக்கும் கண்டனங்களையும் மக்கள் மத்தியில் அவர்கள் வைத்ததில் இருந்து குர்ஆன் இறைவனின் செய்தி தான் என்பது ஊர்ஜிதமாகின்றது. குர்ஆன் இறைச் செய்தி என்பது ஊர்ஜிதமாகும் போது நபிகள் நாயகம் இறைவனின் தூதர் தாம் என்பதும் உறுதியாகின்றது.

18:27 எண்ணிலாக் கட்டளைகள்

எண்ணிலாக் கட்டளைகள்   

    ‘உமது இறைவனின் ஏட்டிலிருந்து உமக்கு அறிவிக்கப் படுவதை ஓதுவீராக! அவனது வார்த்தைகளை மாற்றுபவன் எவனுமில்லை. அவனையன்றி (வேறு) புகலிடத்தை நீர் காண மாட்டீர்’ (அல்குர்ஆன் 18:27)

    இந்த வசனத்தில் இடம் பெற்றுள்ள ‘அவனது வார்த்தைகள்’ என்ற சொற்றொடருக்கு, அவனது வேதங்கள் என்றும், அவ்வேதங்களுக்கு விளக்கம் எழுதுதல் என்றும் விளங்கிக் கொண்டு சிலர் தவறான வியாக்கியானங்கள் வழங்கி வருவதைக் கடந்த இதழில் கண்டோம்.

    இறைவனின் வார்த்தைகளை மாற்ற முடியாது என்ற சொற்றொடர் 10:64 வசனத்திலும் காணப்படுகிறது.

    ‘அவர்களுக்கு இவ்வுலகிலும் மறுமை உலகிலும் நற்செய்தி உண்டு. அல்லாஹ்வின் வார்த்தைகளில் மாற்றுதல் கிடையாது. இதுதான் மகத்தான வெற்றியாகும். (அல்குர்ஆன் 10:64)

    வேதங்களைத் தான் இச்சொற்றொடர் குறிக்கிறது என்றால் குர்ஆனைத் தவிர எல்லா வேதங்களும் மாற்றப்பட்டு விட்டதே என்பதைச் சிந்தித்தால் இது வேதத்தைக் குறிக்க வில்லை என்பதை விளங்கலாம்.

    66:12 வசனத்தைச் சிந்தித்தால் இறைவனது வார்த்தைகள் என்பது வேறு, வேதங்கள் என்பது வேறு என்பதைத் தெளிவாக அறிந்து கொள்ளலாம்.

    ‘இம்ரானின் மகள் மாயமையும் (நல்லோருக்கு முன்னுதாரணமாக இறைவன் ஆக்கியுள்ளான்.) அவர் தமது கற்பைக் காத்துக் கொண்டார். நம்மிடமிருந்து நமது உயிரை அவரில் ஊதினோம். அவர் தமது இறைவனின் வார்த்தைகளையும் வேதங்களையும் உண்மைப்படுத்தினார். கட்டுப்பட்டு நடப்பவர்களில் ஒருவராக இருந்தார்’. (அல்குர்ஆன் 66:12)

    மர்யம் அவர்கள் இறைவனது வார்த்தைகளையும் வேதங்களையும் உண்மைப்படுத்தினார் என்று கூறி வேதங்கள் வேறு வார்த்தைகள் வேறு என்று அல்லாஹ் தெளிவு படுத்துகின்றான்.

    ‘அவனது வார்த்தைகள்’ என்ற சொற்றொடர் வேதங்களையோ குர்ஆனையோ குறிக்கவில்லை என்றால் வேறு எதைத் தான் குறிக்கின்றது என்ற விஷயத்துக்கு வருவோம்.

    குர்ஆனில் அவனது வார்த்தைகள் என்ற இடத்தில் ‘கலிமாத்’ என்ற சொல் பயன்படுத்தப்பட்டுள்ளது. இதன் நேரடிப் பொருள் வார்த்தைகள் என்பது தான். ஆனால் ‘அல்லாஹ்வின் கட்டளைகள்’ என்பது தான் அல்லாஹ்வின் வார்த்தைகள் என்ற கருத்தில் குர்ஆனில் பயன்படுத்தப்படுகின்றது.

    இவ்வுலகில் ஒரு விநாடியில் கோடிக் கணக்கான காரியங்கள் நடைபெறுகின்றன. ஒரு விநாடியில் அத்தனை கட்டளைகளையும் அவன் பிறப்பிக்கின்றான்.

    ஒரு விநாடி நேரத்தில் நீங்கள் பல்வேறு காரியங்களில் ஈடுபடுகின்றீர்கள். உங்களிடமிருந்து அனிச்சையாகப் பல்வேறு காரியங்கள் நிகழ்கின்றன.

    உதாரணமாக ஒரு பக்கத்துக்குக் கடிதம் எழுதுகின்றீர்கள் என்றால் அதற்கான கட்டளையும் அவனிடமிருந்தே பிறப்பிக்கப் படுகின்றது. ஒரு பக்கத்தில் 50 வரிகள் எழுதுகின்றீர்கள் என்றால் அதற்கான கட்டளையும் அவனிடமிருந்தே வருகின்றது. 50 வரிகளிலும் நூற்றுக்கணக்கான எழுத்துக்களை எழுதுகின்றீர்கள் என்றால் அதற்கான நூற்றுக்கணக்கான கட்டளைகளும் அடுக்கடுக்காக அவனிடமிருந்து வந்து கொண்டே இருக்கின்றன.

    ‘வணக்கத்திற்குரியவன்’ என்ற சொல்லை நீங்கள் எழுதுவதற்குள் 12 கட்டளைகள் அவனிடமிருந்து பிறந்து விடுகின்றன. ஒவ்வொரு எழுத்தும் பல புள்ளிகளைக் கொண்டது என்ற அடிப்படையில் அதற்கான கட்டளைகளும் அவனிடமிருந்தே பிறக்கின்றன. சில பேர் எழுதியதைப் பாதி அளவு எழுதிய நிலையில் உயிரை விட்டார்கள் என்றால் அவர்களுக்கான கட்டளை அவ்வளவு தான். ஐம்பது பக்கக் கடிதம் எழுதுவதற்குள் ஆயிரக்கணக்கான கட்டளைகள் அவனிடமிருந்து பிறப்பிக்கப் பட்டு விடுகின்றன.

    ஐம்பது வரிகள் கொண்ட கடிதத்தை நீங்கள் எழுதும் போது உங்கள் கண்களுக்கு நூற்றுக்கணக்கான கட்டளைகள் வந்து சேர்கின்றன. ஒவ்வொரு இடமாக கண் மாறிக்கொண்டே இருக்க வேண்டும் என்று கட்டளை பிறப்பிக்கப்படா விட்டால் குருடனைப் போல் தான் உங்களால் எழுத முடியும்.

    எழுதும் போது உங்களுக்கு அரிப்பெடுக்கும். அதற்கான கட்டளையும் அவனிடமிருந்தே வருகின்றது. அப்போது நீங்கள் சொறிகின்றீர்கள் என்றால் அதற்கான கட்டளையும் அவனிடமிருந்தே வருகின்றது. எத்தனை தடவை சொறிய வேண்டும் என்ற கட்டளையும் அவனிடமிருந்தே வருகின்றது.

    இதே நேரத்தில் எதையாவது காதால் கேட்டுக் கொண்டிருப்பீர்கள். அங்கு வீசும் வாடையை முகர்வீர்கள். தென்றல் உங்கள் மேனியில் ஒவ்வொரு அணுவிலும் பட்டுக் கொண்டே இருக்கும். சாய்வீர்கள். நிமிர்வீர்கள். கால்களைத் தட்டுவீர்கள். கழுத்தில் எறும்பு கடிப்பதை உணர்வீர்கள். இப்படி ஐம்பது வரிக் கடிதம் எழுதுவதற்கு ஆகும் சுமார் பத்து நிமிடங்களில் கோடிக்கணக்கான கட்டளைகள் பிறப்பிக்கப்படுகின்றன.

    உங்களுக்குத் தெரியாமல் இதயம் எத்தனை முறை துடிக்க வேண்டும். எவ்வளவு வேகத்தில் இரத்தத்தை அனுப்ப வேண்டும். இரத்தம் எங்கே செல்ல வேண்டும். வயிற்றுக்குள்ளே உள்ள உணவில் எதை எடுக்க வேண்டும். எதைத் தள்ள வேண்டும் என்பன போன்ற இலட்சக்கணக்கான கட்டளைகள் பத்து நிமிடத்திற்குள் நமக்குத் தெரியாமலேயே நமக்கு இடப்படுகின்றன.

    ஒரு மனிதனின் பத்து நிமிட நேரத்தில் பல்லாயிரம் கோடி கட்டளைகள் அவன் விஷயமாகப் பிறப்பிக்கப் படுகின்றன என்றால் உங்கள் 60 வயது வாழ்க்கையில் உங்களுக்காக மட்டும் பிறப்பிக்கப் பட்ட கட்டளைகளை எழுதவே ஒரு கடல் மை தேவைப்படும்.

    600 கோடி மக்களுக்கும் இடப்படுகின்ற கட்டளைகளை எழுத வேண்டும் என்றால் ஏழு கடல் என்ன? ஏழாயிரம் கடல் மை கூட போதாத ஒன்று தான்.

    மனிதர்கள் மட்டுமின்றி இலட்சோப லட்சம் ஜீவராசிகளுக்கு இடப்படும் கோடானுகோடி கட்டளைகள் ஜீவனில்லாத மரம், செடி, கொடிகளுக்கு இடப்படும் கட்டளைகள் என்று எடுத்துக் கொண்டால் அவனிடமிருந்து ஒரு விநாடி நேரத்தில் மட்டும் பிறப்பிக்கப் படுகின்ற கட்டளைகளைக் கூட எழுத முடியாது.

    இது தான் இறைவனின் வார்த்தைகள் என்பதன் பொருளாகும்.

    ஒவ்வொரு பொருளின் ஒவ்வொரு நொடியும் அவன் கட்டளைப்படியே இயங்குகின்றன. முதுகைச் சொறியுங்கள் என்று கட்டளையிடும் அதே நேரத்தில் 600 கோடி மக்களின் கைகளுக்கும் அந்த நேரத்தில் என்ன செய்ய வேண்டும் என்ற கட்டளைகள் அவனிடமிருந்து பிறக்கின்றன.

    அவன் அனைத்துப் பொருட்களுடன் ஒவ்வொரு விநாடியும் தொடர்பில் இருக்கின்றான் என்று அவனது வல்லமையைப் பறை சாற்றுவதற்காகவே அவனது வார்த்தைகளை, கட்டளைகளை எழுதி முடியாது என்கின்றான்.

    இப்போது ஒவ்வொரு வசனமாகப் பார்ப்போம்.

    ‘அவனது கட்டளைகளை மாற்றுபவன் இல்லை’ என்று 18:27, 10:64, 6:115 ஆகிய வசனங்களில் கூறப்படுவதற்கு என் கட்டை விரலால் காதைச் சொறியுமாறு அவன் கட்டளையிட்டால் வேறு கட்டளை போட்டு அதை எவனும் தடுக்க முடியாது என்பது பொருள்.

    18:109, 31:127 ஆகிய வசனங்களில், ‘அவனது கட்டளைகளை எழுதி முடியாது’ என்பதும் இதைத் தான் கூறுகின்றன.

    66:22 வசனத்தில் ‘அவனது வேதங்களையும் அவனது கட்டளைகளையும் உண்மைப் படுத்தினார்’ என்று கூறப்படுகின்றது. ஆண் துணையில்லாமல் இறைவனால் குழந்தையை உருவாக்க முடியும் என்ற அற்புதமான கட்டளைகள் உட்பட அனைத்தையும் மர்யம் நம்பினார் என்று பொருள்.

    2:124 வசனத்தில் ‘இப்ராஹீமை தனது கட்டளைகளால் சோதித்தான்’ என்று கூறப்படுவது நிச்சயம் வேதங்களைக் குறிக்காது. மகனைப் பலி கொடு! மனைவி மக்களை பாலைவனத்தில் கொண்டு போய் விடு! கஃபாவை கட்டு என்பன போன்ற பல கட்டளைகள் மூலம் சோதித்தான் என்பது அதன் பொருள்.

    6:34 வசனத்திலும் இதே கருத்து தான் கொள்ள வேண்டும்.

    (நபியே!) உமக்கு முன்னர் (சென்ற) தூதர்கள் பொய்யரெனக் கருதப் பட்டுள்ளனர். அவர்கள் பொய்யரெனக் கருதப்பட்டதையும் தொல்லை படுத்தப்பட்டதையும் சகித்துக் கொண்டனர். முடிவில் அவர்களுக்கு நமது உதவி வந்தது. அல்லாஹ்வின் வாhத்தைகளை மாற்றுபவன் யாருமில்லை. தூதர்கள் பற்றிய செய்தி உமக்கு (ஏற்கனவே) வந்துள்ளது. (அல்குர்ஆன் 6:34)

    இறைத் தூதர்களுக்கு இறுதி வெற்றி என்று அல்லாஹ்விடமிருந்து கட்டளை பிறந்தவுடன் அதை வேறு விதமாக மாற்றி எவராலும் எழுத முடியவில்லை. அவர்களின் பண பலமும் படை பலமும் இந்தக் கட்டளையின் முன்னர் நிற்க முடிய வில்லை.

    42:24 வசனத்தில் தனது கட்டளைகளால் சத்தியத்தை வெற்றி பெறச் செய்தான் என்பதும் அது குறித்து அவன் பிறப்பிக்கும் கட்டளைகளையே குறிக்கின்றது.

    7:158 வசனத்தில் அல்லாஹ்வையும் அவனது வார்த்தைகளையும் நபிகள் நாயகம் (ஸல்) அவர்கள் நம்புவதாகக் கூறுவதும் அவனது கட்டளைக்கு எதிராக மறுகட்டளை யாராலும் பிறப்பிக்க முடியாது என்ற கருத்தில் தான்.

    8:7 வசனத்தில் பத்ரு வெற்றியைப் பற்றிக் கூறும் போது ‘தனது கட்டளைகளால் சத்தியத்தை மேலோங்கச் செய்வான்’ என்று கூறுவதும் வேதத்தைக் குறிக்காது.

    ஆதம் (அலை) அவர்கள் இறைவனிடமிருந்து வார்த்தைகளைப் பெற்றார் என்பதும் மன்னிப்பு தேடும் படியும், அதற்கான சொற்களையும் உள்ளடக்கிய கட்டளைகளையே குறிக்கின்றது.

18:27 இறைவனின் வார்த்தைகள்

இறைவனின் வார்த்தைகள்    

    ‘உமது இறைவனின் ஏட்டிலிருந்து உமக்கு அறிவிக்கப் படுவதை ஓதுவீராக! அவனது வார்த்தைகளை மாற்றுபவன் எவனுமில்லை. அவனையன்றி (வேறு) புகலிடத்தை நீர் காண மாட்டீர்’ (அல்குர்ஆன் 18:27)

    குகைவாசிகள் வரலாற்றில் நாம் படிப்பினை பெறத் தேவையானவற்றைக் கூறிவிட்டு நபிகள் நாயகம் (ஸல்) அவர்களுக்கு இவ்வாறு கட்டளை பிறப்பிக்கின்றான்.

    உமது இறைவனிடமிருந்து வரும் செய்திகளை யாருக்கும் அஞ்சாமல் எடுத்துரைக்க வேண்டும் என்பது தான் இந்தக் கட்டளையின் சாரம்.

    இந்த வசனத்தில் நாம் விளங்கிக் கொள்ள வேண்டிய முக்கியமான பகுதி ‘அவனது வார்த்தைகளை மாற்றுபவன் இல்லை’ என்பது தான். அதிலும் குறிப்பாக ‘அவனது வார்த்தைகள்’ என்ற சொற்றொடர் தான் பலராலும் தவறாகப் புரிந்து கொள்ளப் படுகின்றது.

    அந்தச் சொற்றொடர் திருக்குர்ஆனில் 13 இடங்களில் பயன்படுத்தப் பட்டுள்ளது. ‘அவனது வார்த்தைகள்’ என்பது திருக்குர்ஆனையே குறிக்கின்றது என்று சிலர் கருதிக் கொண்டு அளிக்கின்ற விளக்கம் குழப்பத்தை அதிகரிப்பதாக அமைந்துள்ளது.

    இந்தச் சொற்றொடர்களை எவ்வாறெல்லாம் தவறாகப் பயன்படுத்தியுள்ளார்கள் என்பதற்கு இதே அத்தியாயத்தின் 109 வது வசனத்தை உதாரணமாக எடுத்துக் கொள்ளலாம்.

    ‘எனது இறைவனின் வார்த்தைகளை எழுதிட கடல் மையாக ஆக்கப்பட்டாலும் எனது இறைவனின் வார்த்தைகளுக்கு முன் கடல் முடிந்து விடும். இது (இக்கடல்) போன்றதைக் துணைக்கு நாம் கொண்டு வந்தாலும் சரியே!’ (அல்குர்ஆன் 18:109)

    அதாவது குர்ஆனுக்கு விளக்கவுரை எழுதப் புகுந்தால் கடல் முழுவதும் மையாக ஆக்கப்பட்டு அத்துடன் இன்னொரு கடலளவு மை உதவிக்குக் கொண்டு வரப்பட்டாலும் விளக்கம் எழுதி முடியாது என்று இவர்கள் விளக்கம் கூறுகினறனர்.

    இதை இன்னும் வலிமையுடன் இன்னொரு வசனமும் குறிப்பிடுகின்றது.

    ‘இந்தப் பூமியில் மரங்கள் யாவும் எழுது கோலாகவும், இக்கடல் தன்னுடன் ஏழு கடல்களைத் துணைக்கு கொண்டு வந்தாலும் அல்லாஹ்வின் வார்த்தைகள் முடியாது. அல்லாஹ் மிகைத்தவன். ஞானம் மிக்கவன். (அல்குர்ஆன் 31:27)

    குர்ஆன் கூறும் வழியில் நடப்போம். நபிகள் நாயகம் (ஸல்) அவர்கள் காட்டிய வழியில் நடப்போம் என்று நாம் அழைக்கும் போது அதற்கு எதிராக இவ்விரு வசனங்களையும் கொண்டு வந்து நிறுத்துகின்றார்கள்.

    குர்ஆன் என்ன சாதாரணமாக விளங்கக் கூடியதா? இப்போதுள்ள கடல் போல் ஏழு கடல்கள் மையாக ஆக்கப்பட்டாலும் விளக்கம் எழுதி முடியாது என்று அல்லாஹ் கூறும் போது உங்களுக்கு எப்படி குர்ஆன் விளங்கும்? என்று கேட்கின்றனர்.

    குர்ஆனை விளங்குவதற்கு நாம் எளிதாக ஆக்கியுள்ளோம் என 19:97, 44:58, 54:17, 54:22, 54:32, 54:40 ஆகிய வசனங்கள் கூறுகின்றன. மனிதன் நல்வழி பெறுவதற்காகவே குர்ஆன் அருளப்பட்டதாகக் கூறும் போது குர்ஆன் என்றால் காத தூரம் ஓட்டம் எடுக்கும் அளவுக்கு இறைவன் பயம் காட்டுவானா? என்று சிந்தித்திருந்தால் ‘இறைவனின் வார்த்தைகள்’ என்பது குர்ஆனைக் குறித்துச் சொல்லப்பட்டதல்ல என்பதை விளங்கியிருப்பார்கள்.

    குர்ஆனுக்கு விளக்கம் தருவதற்காகத் தானே நபிகள் நாயகம் (ஸல்) அவர்கள் அனுப்பப்பட்டார்கள். அவர்களின் விளக்கங்கள் இன்றும் பாதுகாக்கப்பட்டுள்ளன. அவர்களின் விளக்கங்களை ஒன்று திரட்டி, திரும்பத் திரும்பக் கூறப்படுவதைக் கழித்து விட்டுப் பார்த்தால் இக்குர்ஆனைப் போல் மூன்று அல்லது நான்கு மடங்குகளில் அடங்கி விடும். அப்படியானால் நபிகள் நாயகம் (ஸல்) அவர்கள் சரியாக விளங்கவில்லையா? என்று சிந்தித்துப் பார்த்திருந்தால் ‘இறைவனின் வாhத்தைகள்’ என்பது குர்ஆனைக் குறித்துக் கூறப்பட்டவை அல்ல என்று புரிந்து கொண்டிருப்பார்கள்.

    ஏழு கடல் அளவுக்கு மை இருந்தாலும் குர்ஆனுக்கு விளக்கம் எழுத முடியாது என்றால் அந்த விளக்கம் மனிதனுக்கு எந்த வழியில் கிடைக்கும்? என்று சிந்தித்திருந்தால் ‘இறைவனின் வார்த்தைகள்’ என்பது குர்ஆனைக் குறித்து கூறப்படவில்லை என விளங்கியிருப்பார்கள்.
ஒரு மாணவன் வருடம் முழுவதும் அவனது பாடங்களை எழுத 50 மி.லி மை போதுமானதாக உள்ளது. ஆயிரக்கணக்கான பக்கங்களை இதில் எழுதி விடுகின்றான். அப்படியானால் ஒரு கடல் அளவு மையால் எழுதி அவற்றை அடுக்கிக் கொண்டே போனால் சந்திர மண்டலத்தைக் கூட எட்டி விடும். ஏழு கடல் மை என்றால் கற்பனை செய்து கொள்ளலாம். சந்திர மண்டலத்தை எட்டி விடும் அளவுக்கு விளக்கத்தை எழுதும் நிலையில் ஒருவன் பேசினால் அந்தப் பேச்சில் அவ்வளவு குழப்பம் இருக்கின்றது என்று பொருள்.

    சந்திர மண்டலம் தொடும் அளவுக்குள்ள விளக்கவுரையைப் படித்து முடிக்க நூஹ் நபியின் வயதைப் போல் இன்னும் லட்சம் மடங்கு வாழ்நாள் தேவைப்படும். பல லட்சம் வருடங்கள் வாசித்து விளங்க வேண்டியதை 60 வயது வாழ்நாள் பெற்றுவனுக்கு அளிப்பதில் என்ன பயன்? என்று சிந்தித்திருந்தால் தாங்கள் எத்தகைய விபரீதமான கருத்தைக் கூறுகின்றோம் என்பதை விளங்கியிருப்பார்கள்.

    அவர்கள் ஆதாரமாகக் காட்டும் இரண்டு வசனங்களில் பயன்படுத்தப் பட்டுள்ள சொற்களைக் கவனிக்க வேண்டிய விதத்தில் கவனித்தால் இத்தகைய விபரீதமான கருத்துக்கு வந்திருக்க மாட்டார்கள்.

    அவ்விரு வசனங்களிலும் இறைவனின் வார்த்தைகளை எழுத முடியாது என்று தான் கூறப்பட்டுள்ளது. வார்த்தைகளின் விளக்கவுரை எனக் கூறப்படவில்லை. விளக்கவுரை என்பது இவர்களாகக் கற்பனை செய்து கொண்டதாகும். இறைவனின் வார்த்தைகளைத் தான் எழுத முடியாது என்று இறைவன் கூறுகின்றான். ஆனால் குர்ஆனை நாம் எழுதுவதாக இருந்தால் 50 மி.லி மையில் எழுதி விடலாம். எனவே இவ்வசனங்கள் குர்ஆனைக் குறிப்பிடவேயில்லை என்று அவர்கள் விளங்கியிருப்பார்கள்.

    குர்ஆன் இறைவனிடமிருந்து வந்தால் ‘இறைவனின் வார்த்தைகள்’ என்பது குர்ஆனைத் தான் குறிக்கின்றது என்று நினைத்து விட்டனர். இந்த நினைப்பின் அடிப்படையில் பார்த்தால் தவராத், இஞ்சீல், சபூர் மற்றும் பெயர் கூறப்படாத ஏராளமான வேதங்களை அருளினான். அவையும் குhஆனைப் போலவே இறைவனின் வார்த்தைகள் தாம். எனவே எல்லா வேதங்களையும் இச்சொல் குறிக்கின்றது என்று சிலர் வியாக்கியானம் தருவார்கள்.

    மேலே எடுத்துக் காட்டியுள்ள 18:27 வசனம் இந்த விளக்கமும் தவறு என்று கூறுகின்றது. ‘அவனது வார்த்தைகளை மாற்றுபவன் இல்லை’ என்று இவ்வசனம் கூறுகின்றது. ஆனால் குர்ஆனைத் தவிர அனைத்து வேதங்களையும் மாற்றி விட்டனர். இவர்களின் விளக்கத்தின் அடிப்படையில் இறைவன் கூறியதற்கு மாற்றமாக நடந்து விட்டது என்ற நிலை ஏற்படும்.

    ‘இறைவனின் வார்த்தைகள்’ என்ற சொற்றொடர் இடம் பெறும் எல்லா வசனங்களையும் சேர்த்து ஆய்வு செய்திருந்தால் அத்தகைய குழப்பமான முடிவுக்கு வந்திருக்க மாட்டார்கள்.

18:23-18:24 இன்ஷா அல்லாஹ்

இன்ஷா அல்லாஹ்   

    ‘நாளை நான் இதைச் செய்பவன் என்று எதைப் பற்றியும் கூறாதீர்!

    அல்லாஹ் நாடினால் தவிர, (முஹம்மதே!) நீர் மறந்து விடும் போது உமது இறைவனை நினைவு கூறுவீராக! எனது இறைவன் இதை விட குறைவான நேரத்தில் இதற்கு வழி காட்டிவிடக் கூடும் என்று கூறுவீராக!’ (அல்குர்ஆன் 18:23,24)

    குகை வாசிகளின் வரலாற்றுக்கிடையே மேற்கண்ட கட்டளையையும் இறைவன் பிறப்பிக்கிறான்.

    நாளை செய்யப் போவதாகக் கூறும் எந்தக் காரியமானாலும் ‘அல்லாஹ் நாடினால்’ என்பதையும் சேர்த்துக் கூற வேண்டும் என்று இவ்விரு வசனங்களும் நபிகள் நாயகம் (ஸல்) அவர்களுக்குக் கட்டளையிடுகின்றன.

    இதில் நாம் அறிந்து கொள்ள வேண்டிய பல செய்திகள் உள்ளன.

    மனிதர்களிலேயே அல்லாஹ்வின் அன்புக்கு அதிகம் உரித்தானவர்கள் நபிகள் நாயகம் (ஸல்) அவர்கள் என்பதை முஸ்லிம்கள் அறிந்து வைத்துள்ளோம். இவ்வளவு உயர்ந்த தகுதியில் உள்ள நபிகள் நாயகம் (ஸல்) அவர்களேயானாலும் ‘நாளை இதைச் செய்வேன்’ என்று கூறக் கூடாது. அது மிகவும் அற்பமான காரியமானாலும் கூட அவ்வாறு கூறக் கூடாது என்று இவ்வசனம் அழுத்தமாகக் கூறுகிறது.

    நபிகள் நாயகம் (ஸல்) அவர்கள் உட்பட யாராக இருந்தாலும் அவர்கள் நினைத்ததைச் செய்து விட முடியாது. ஏகத்துவக் கொள்கையின் இரத்தினச் சுருக்கமான சான்றாக இது அமைகின்றது.

    திருக்குர்ஆனைப் பற்றியோ நபிகள் நாயகம் (ஸல்) அவர்களின் அறிவுரைகள் பற்றியோ எந்த அறிவும் இல்லாத ஒரு முஸ்லிம் இந்தச் சொற்றொடரை மட்டும் அறிந்திருந்தால் கூட அல்லாஹ்வுக்கு இணைகற்பிப்பதிலிருந்து தப்பித்துக் கொள்வார்.

    அல்லாஹ் நாடினால் தான் எதையும் செய்ய முடியும் என்பதை ஒவ்வொரு சந்தர்ப்பத்திலும் நபிகள் நாயகம் (ஸல்) கூற வேண்டுமென்று கட்டளையிடப்பட்டு அவ்வாறு அவர்கள் கூறியும் இருக்கிறார்கள் என்றால் அவர்களின் கால் தூசுக்குச் சமமாகாத மகான்கள் மற்றும் பெரியவர்களுக்கு எள்ளளவும் எந்த அதிகாரமும் இல்லை என்பதை அறிந்து கொள்ளலாம்.

    இது முதலில் அறிந்து கொள்ள வேண்டிய விஷயமாகும்.

    இது நபிகள் நாயகம் (ஸல்) அவர்களுக்கு மட்டுமின்றி முந்தைய நபிமார்களுக்கும் வழிமுறையாக்கப்பட்டிருந்தது என்பதை இந்த அத்தியாயத்திலிருந்து அறிந்து கொள்ளலாம்.

    மூஸா நபியவர்களின் சம்பவம் பற்றி இந்த அத்தியாயத்தில் கூறும் போது அல்லாஹ் நாடினால் என்னைப் பொறுமையாளனாகக் காண்பீர்கள் (18:69) என்று மூஸா நபி கூறியதாக அல்லாஹ் கூறுகிறான். முந்தைய நபிமார்களிடம் இந்த வழிமுறை இருந்தது என்பதை இதிலிருந்து அறிந்து கொள்ளலாம்.

    நபிகள் நாயகம் (ஸல்) அவர்களுக்குக் கூறப்பட்ட கட்டளையாக இது இருந்தாலும் இதை நாமும் கடைபிடித்தாக வேண்டும். நபிகள் நாயகம் (ஸல்) அவர்களே அல்லாஹ்வின் நாட்டமின்றி எதையும் செய்ய முடியாது எனும் போது மற்றவர்கள் நிச்சயமாக செய்ய முடியாது என்பதிலிருந்து இதை அறியலாம்.

    இதை முஸ்லிம்கள் அனைவரும் அறிந்து வைத்திருந்தாலும் இது பற்றி அவர்களிடம் சில அறியாமைகளும் நிலவுகின்றன.

    ‘இன்ஷா அல்லாஹ் நீங்கள் இதைச் செய்யுங்கள்! இன்ஷா அல்லாஹ் சாப்பிடுங்கள்’ என்பது போல் சிலர் இன்ஷா அல்லாஹ் என்பதைப் பயன்படுத்துகின்றனர். இது தவறாகும். ஏனெனில் ‘நான் செய்வேன்’ என்று தன்னைப் பற்றிக் கூறும் போது தான் இன்ஷா அல்லாஹ் கூறுமாறு இறைவன் கட்டளையிடுகிறான். கட்டளையிடும் போதோ பிறர் குறித்துப் பேசும் போதோ இன்ஷா அல்லாஹ் எனக் கூறுவது பொருளற்றதாகும்.

    இன்ஷா அல்லாஹ் பார்க்கலாம். இன்ஷா அல்லாஹ் வர முயல்கிறேன். இன்ஷா அல்லாஹ் செய்தாலும் செய்வேன் என்பன போன்ற சொற்களையும் தமிழக முஸ்லிம்கள் பரவலாகப் பயன்படுத்துகின்றனர். இது போன்ற சந்தர்ப்பங்களில் இன்ஷா அல்லாஹ் கூறுமாறு கட்டளையிடவில்லை என்பதை அவர்கள் புரிந்து கொள்ள வேண்டும்.

    நான் செய்வேன். நான் செய்பவன். நான் செய்தே தீருவேன் என்றெல்லாம் அடித்துப் பேசும் இடங்களில் தான் இன்ஷா அல்லாஹ் பயன்படுத்துமாறு அல்லாஹ் நமக்குக் கட்டளையிடுகிறான்.

    ‘பார்க்கலாம்’ என்று நாம் கூறும் போது செய்தாலும் செய்வேன். செய்யாமலும் போவேன் என்ற கருத்து உள்ளடங்கியுள்ளது. இதற்குள்ளேயே அல்லாஹ் நாடினால் என்பதும் மறைந்து நிற்கிறது.

    வந்தாலும் வருவேன் என்று நாம் கூறினால், நாம் அடித்துச் சொல்லவில்லை. நான் வரவும் கூடும். வராமல் இருக்கவும் கூடும் என்பது தான் இதன் கருத்து. எனவே இது போன்ற சொற்களைப் பயன்படுத்தும் போது அல்லாஹ் நாடினால் என்று கூறத் தேவையில்லை. கூறுமாறு கட்டளை ஏதும் இல்லை.

    இது அறிந்து கொள்ள வேண்டிய இரண்டாவது செய்தியாகும்.

    இன்னும் சிலர் உள்ளனர். இவர்கள் மிகப் பெரிய காரியங்களுக்கு மட்டும் இன்ஷா அல்லாஹ் கூறுவார்கள். சிறிய காரியங்களுக்குக் கூற மாட்டார்கள். ‘நாளை பத்தாயிரம் தருகிறேன்’ என்று கூறும் போது இன்ஷா அல்லாஹ் எனக் கூறும் இவர்கள் ‘நாளை பத்து ரூபாய் தருகிறேன்’ எனக் கூறும் போது இன்ஷா அல்லாஹ் எனக் கூறுவதில்லை.

    இது அடிப்படைக் கொள்கையைப் பாதிக்கின்ற மிகவும் மோசமான போக்காகும். பத்தாயிரம் தருவதற்குத் தான் அல்லாஹ்வின் நாட்டம் தேவை. பத்து ரூபாய் தருவதற்கு அவன் நாட்டம் தேவையில்லை. அவன் நாட்டமின்றியே என்னால் தந்து விட முடியும் என்ற எண்ணம் ஊடுறுவி இருப்பதால் தான் இவ்வாறு நடக்கின்றனர்.

    இவ்வசனத்தில் இந்தப் போக்கு தடுக்கப்பட்டுள்ளது. ‘லிஷையின்’ ‘எந்த காரியம் பற்றியும்’ நாளை செய்வேன் எனக் கூறாதே என்ற கட்டளையில் பெரிய காரியம் மட்டுமின்றி சிறிய காரியமும் அடங்கும். அற்பமான காரியங்களும் இதனுள் அடங்க வேண்டும் என்பதற்காகவே இச்செயல் பயன்படுத்தப்பட்டுள்ளது.

    இது மூன்றாவதாக அறிந்து கொள்ள வேண்டியதாகும்.

    எவ்வளவு தான் கவனமாக இருந்தாலும் சில நேரங்களில் இவ்வாறு கூற நாம் மறந்து விடலாம். பொதுவாகவே மறதிக்காக இறைவன் குற்றம் பிடிக்க மாட்டான். ஆயினும் நாம் மறதியாக இன்ஷா அல்லாஹ்வைக் கூறாதிருந்து விட்டோமே என்று நினைவுக்கு வந்தால் அப்போது என்ன செய்ய வேண்டும் என்பதற்காக வழிமுறையையும் இவ்வசனங்கள் கூறுகின்றன.

    ஆனால் நமக்குத் தெரிந்து உலகில் பெரும்பாலான முஸ்லிம்கள் இந்த வழிமுறையைக் கடைப் பிடிப்பதில்லை.

    ‘ஒரு வாரத்தில் கடனைத் திருப்பித் தருகிறேன்’ என்று நாம் கூறும் போது இன்ஷா அல்லாஹ் கூற நாம் மறந்து விட்டோம் என்று வைத்துக் கொள்வோம். சற்று நேரத்திலோ மறுநாளோ இது நமக்கு நினைவுக்கு வருகிறது. உடனே இறைவனை நினைவு கூர்ந்து இறைவன் ஒரு வாரத்தை விடக் குறைவான காலத்திலேயே கொடுக்கச் செய்யக் கூடும் என்று கூற வேண்டும்.

    ஒரு நாளில் தருவதாகக் கூறும் போது இன்ஷா அல்லாஹ் கூறத் தவறிவிட்டு சற்று நேரத்தில் நினைவுக்கு வந்தால் உடனே அல்லாஹ்வை மனதில் நினைத்து ‘என் இறைவன் ஒருநாளை விடவும் குறைவாகவே இதை நிறைவேற்றித் தரக் கூடும்’ என்று கூற வேண்டும்.

    இதை 24 வது வசனத்திலிருந்து அறிந்து கொள்ளலாம். இவ்வாறு கூற வேண்டும் என்று இறைவன் கட்டளையே பிறப்பித்திருந்தாலும் குர்ஆன், ஹதீஸை பின்பற்றுபவர்கள் கூட இதை நடைமுறைப் படுத்தாமல் இருக்கிறார்கள்.

    இது நான்காவதாக அறிந்து கொள்ள வேண்டிய விஷயமாகும்.

    மறதிக்குப் பரிகாரமாக அல்லாஹ் நமக்குக் கற்றுத் தரும் வார்த்தையில் கூட அவன் நம்மீது கருணை மழை பொழிந்திருப்பது ஐந்தாவதாக நாம் அறிந்து கொள்ள வேண்டிய விஷயமாகும்.

    ஒரு வாரத்தில் செய்வதாக ஒரு காரியத்தைப் பற்றி நாம் பேசி விட்டோம். இன்ஷா அல்லாஹ் கூறவில்லை என்று வைத்துக் கொள்வோம்.

    நாம் வாக்களித்த அந்த நேரத்துக்குள் கொடுக்கலாம்.

    அல்லது அந்த நேரம் கடந்த பின் கொடுக்கலாம்.

    அல்லது அறவே கொடுக்க முடியாமல் போகலாம்.

    அல்லது வாக்களித்ததை விடக் குறைவான நேரத்திலேயே அதைக் கொடுக்கலாம்.

    இந்த நான்கில் ஒவ்வொருவரும் நான்காவதையே விரும்புவோம். தேர்வு செய்வோம். மறதியின் காரணமாக இன்ஷா அல்லாஹ் கூறாதவரை மற்ற மூன்று விஷயங்களைக் கூறுமாறு கட்டளையிடாமல் ‘நான் வாக்களித்ததை விட குறைவான காலத்திலேயே என் இறைவனால் முடிக்க முடியும்’ என்று கூறச் செய்கிறான். இதன் மூலம் அடியார்கள் மீது அவன் காட்டும் அளப்பரிய கருணையை அறியலாம்.