இப்னுமாஜா பக்கம் – 42

பக்கம் – 42 (ஹதீஸ்கள் 411 முதல் 420 வரை)

அத்தியாயம் 1. தூய்மை செய்தலும் அதன் ஒழுங்கு முறைகளும்  

ஹதீஸ் எண்: 411

‘நபி (ஸல்) அவர்கள் ஒவ்வொரு தடவை ஒளூ செய்ததை நான் பார்த்திருக்கிறேன்’ என்று இப்னு அப்பாஸ் (ரலி) அறிவிக்கிறார்கள்.

(குறிப்பு: இக்கருத்து புகாரி, முஸ்லிம், திர்மிதி, நஸயீ ஆகிய நூல்களில் இடம் பெற்றுள்ளது.)

ஹதீஸ் எண்: 412

‘தபூக்’ போரின் போது நபி (ஸல்) அவர்கள் ஒவ்வொரு தடவை ஒளூ செய்ததை நான் பார்த்திருக்கின்றேன்’ என்று உமர் (ரலி) அவர்கள் அறிவிக்கிறார்கள்.

(குறிப்பு: இதன் ஐந்தாவது அறிவிப்பாளர் ரிஷ்தீன் இப்னு ஸஃது என்பவர் பலவீனமானவர்.)

பாடம் 46. முன்மூன்று தடவை உறுப்புக்களைக் கழுவுதல்

ஹதீஸ் எண்: 413

உஸ்மான் (ரலி), அலி (ரலி) இருவரும் மும்மூன்று தடவை உறுப்புக்களைக் கழுவி விட்டு நபி (ஸல்) அவர்கள் இவ்வாறே ஒளூ செய்துள்ளனர் எனவும் குறிப்பிட்டார்கள் என்று ஷகீக் இப்னு ஸலமா (ரலி) அறிவிக்கிறார்கள்.

(குறிப்பு: புகாரி, முஸ்லிம் ஆகிய நூல்களிலும் இந்த ஹதீஸ் இடம் பெற்றுள்ளது.)

ஹதீஸ் எண்: 414

இப்னு உமர் (ரலி) அவர்கள் மும்மூன்று தடவை உறுப்புக்களைக் கழுவி விட்டு நபி (ஸல்) அவர்கள் இவ்வாறு செய்ததாகவும் குறிப்பிட்டார்கள் என்று முத்தலிப் இப்னு அப்துல்லாஹ் என்பார் அறிவிக்கிறார்கள்.

ஹதீஸ் எண்: 415

நபி (ஸல்) அவர்கள் மும்மூன்று தடவை உறுப்புக்களைக் கழுவியதாக அபூஹுரைரா (ரலி), ஆயிஷா (ரலி) ஆகிய இருவரும் அறிவித்ததாக மைமூன் இப்னு மிஹ்ரான் என்பார் அறிவிக்கிறார்கள்.

ஹதீஸ் எண்: 416

நபி (ஸல்) அவர்கள் உறுப்புக்களை மும்மூன்று தடவை கழுவி விட்டு தலைக்கு (மட்டும்) ஒரு தடவை மஸஹ் செய்ததை நான் பார்த்திருக்கின்றேன்’ என்று அப்துல்லாஹ் இப்னு அபீஅவ்பா (ரலி) அறிவிக்கிறார்கள்.

(குறிப்பு: இதன் மூன்றாவது அறிவிப்பாளராகிய ஃபாயித் இப்னு அப்துர்ரஹ்மான் நம்பகமானவர் அல்ல.)

ஹதீஸ் எண்: 417

‘நபி (ஸல்) அவர்கள் மும்மூன்று தடவை கழுவி ஒளூ செய்பவர்களாக இருந்தனர்’ என்று அபூமாலிக் அல்அஷ்அரீ (ரலி) அறிவிக்கிறார்கள்.

(குறிப்பு: இதன் மூன்றாவது அறிவிப்பாளரான லைஸ் இப்னு அபீஸைஃப் என்பவர் பலவீனமானவர்.)

ஹதீஸ் எண்: 418

நபி (ஸல்) அவர்கள் மும்மூன்று தடவை கழுவி ஒளூ செய்ததாக ருபைய்யிஃ பின்து அஃப்ரா (ரலி) அறிவிக்கிறார்கள்.

பாடம் 47. இரண்டிரண்டு தடவை கழுவி ஒளூ செய்தல்

ஹதீஸ் எண்: 419

நபி (ஸல்) அவர்கள் ஒவ்வொரு தடவை கழுவி ஒளூ செய்து விட்டு ‘இதுவே இறைவன் தொழுகையை ஒப்புக் கொள்ள அவசியமான அளவாகும்’ என்றார்கள். இரண்டிரண்டு தடவை கழுவி ஒளூ செய்து விட்டு, ‘இது ஒளூவின் சரியான – போதுமான – அளவாகும்’ என்றார்கள். மும்மூன்று தடவை ஒளூ செய்து விட்டு ‘இதுவே ஒளூவின் முழுமையான அளவாகும். இதுவே இப்ராஹீம் (அலை) அவர்கள் செய்த ஒளூவாகும். யார் இவ்வாறு ஒளூ செய்து விட்டு முடிவில், ‘அஷ்ஹது அல்லாயிலாஹ இல்லல்லாஹு வ அஷ்ஹது அன்னமுஹம்மதன் அப்துஹுவரஸுலுஹு என்று கூறுகிறாரோ அவருக்கு சுவர்க்கத்தின் எட்டு வாசல்களும் திறக்கப்படுகின்றன அவர் விரும்பிய வாசல் வழியாக பிரவேசிக்கலாம்’ என்று நபி (ஸல்) கூறியதாக இப்னு உமர் (ரலி) அறிவிக்கிறார்கள்.

(குறிப்பு: இதன் மூன்றாவது அறிவிப்பாளராகிய ஸைத் அல் அம்மீ என்பவரும் நான்காவது அறிவிப்பாளரான அவரது மகன் அப்துர்ரஹீம் என்பவரும் பலவீனமானவர்கள். இதன் இரண்டாவது அறிவிப்பாளர் முஆவியா இப்னு குர்ரா என்பவர் தனக்கு முந்தைய அறிவிப்பாளர் இப்னு உமரைச் சந்தித்தது கிடையாது.)  

ஹதீஸ் எண்: 420

நபி (ஸல்) அவர்கள் ஒவ்வொரு தடவை கழுவி ஒளூ செய்து விட்டு ‘இது ஒளூவின் போதிய அளவாகும்’ என்றோ ‘இந்த அளவு கூட செய்யாவிட்டால் இறைவன் தொழுகையை ஏற்கமாட்டான் என்றோ கூறினார்கள். பிறகு இரண்டிரண்டு தடவைகள் ஒளூ செய்து விட்டு ‘இவ்வாறு ஒளூ செய்பவருக்கு இரு மடங்கு கூலிகளை இறைவன் அளிக்கிறான்’ என்றார்கள். பிறகு மும்மூன்று தடவை ஒளூ செய்து விட்டு, ‘இதுவே எனக்கு முன் சென்ற நபிமார்களின் ஒளூவாகும்’ என்றார்கள். இதை உபை இப்னு கஃபு (ரலி) அறிவிக்கிறார்கள்.

(குறிப்பு: இங்கேயும் ஸைத் அல் அம்மீ என்பார் இடம் பெறுகிறார். அவர் வழியாக அறிவிக்கும் அப்துல்லாஹ் இப்னு அராதா என்பவரும் பலவீனமானவர்.)