இப்னுமாஜா பக்கம் – 45

பக்கம் – 45 (ஹதீஸ்கள் 441 முதல் 450 வரை)

அத்தியாயம் 1. தூய்மை செய்தலும் அதன் ஒழுங்கு முறைகளும்  

ஹதீஸ் எண்: 441

ஏறத்தாழ முந்தைய ஹதீஸின் கருத்தே இங்கும் இடம் பெறுகின்றது.

(குறிப்பு: இதன் இரண்டாவது அறிவிப்பாளர் அப்துல்லாஹ் இப்னு அகீல் என்பார் குறை கூறப்பட்டுள்ளார்.)

ஹதீஸ் எண்: 442

இங்கே 439 வது ஹதீஸின் கருத்தே இடம் பெறுகின்றது, மிக்தாம் இப்னு மஃதீ யகரிப் (ரலி) அறிவிக்கிறார்கள்.

(குறிப்பு: இந்த ஹதீஸ் அபூதாவூதிலும் இடம் பெற்றுள்ளது.)

பாடம் 53. இருகாதுகளும் தலையில் ஒரு பகுதியாகும்

ஹதீஸ் எண்: 443

‘இருகாதுகளும் தலையின் ஒரு பகுதியாகும்’ என்று நபி (ஸல்) அவர்கள் கூறியதாக அப்துல்லாஹ் இப்னு ஸைத் (ரலி) அவர்கள் அறிவிக்கிறார்கள்.

ஹதீஸ் எண்: 444

நபி (ஸல்) அவர்கள், இரு காதுகளும் தலையைச் சேர்ந்ததாகும் என்று சொன்னார்கள். மேலும் அவர்கள் தம் தலைக்கு ஒரு தடவை மஸஹ் செய்வார்கள், மூக்கை ஒட்டிய கண் ஓரங்களையும் மஸஹ் செய்வார்கள் என்று அபூஉமாமா (ரலி) அறிவிக்கிறார்கள்.

ஹதீஸ் எண்: 445

443 வது ஹதீஸ் அபூஹுரைரா (ரலி) அறிவிப்பதாக இங்கே இடம் பெற்றுள்ளது.

(குறிப்பு: இதன் நான்காவது அறிவிப்பாளரான முஹம்மத் இப்னு அப்துல்லாஹ்வும் ஐந்தாம் அறிவிப்பாளரான அம்ரு இப்னு ஹுஸைன் என்பவரும் பலவீனமானவர்களாவர்.)

பாடம் 54. விரல்களைக் கோதிக்கழுவுதல்

ஹதீஸ் எண்: 446

நபி (ஸல்) அவர்கள் ஒளூ செய்யும் போது தமது கால்விரல்களை சுண்டு விரலால் கோதியதை நான் பார்த்திருக்கிறேன் என்று முஸ்தவ்ரித் இப்னு ஷத்தாத் (ரலி) அறிவிக்கிறார்கள்.

(குறிப்பு: அஹ்மத், அபூதாவூத், திர்மிதி ஆகிய நூல்களிலும் இந்த ஹதீஸ் இடம் பெற்றுள்ளது. இதன் அறிவிப்பாளர்களில் இப்னு லஹ்யஆ என்ற பலவீனமானவர் இடம் பெறுகிறார். எனினும் இவர் இடம் பெறாமலும் வேறு நூல்களில் இந்த ஹதீஸ் இடம் பெறுவதால் இது ஹஸன் எனும் நிலைக்கு உயர்கிறது.)

ஹதீஸ் எண்: 447

தொழுகைக்கு நீ தயாராகும் போது ஒளூவை பூரணமாகச் செய்! உன் கால் விரல்கள், கை விரல்களுக்கிடையே தண்ணீரைச் செலுத்து! என்று நபி (ஸல்) அவர்கள் கூறியதாக இப்னு அப்பாஸ் (ரலி) அறிவிக்கிறார்கள்.

(குறிப்பு: இது திர்மிதியிலும் இடம் பெற்றுள்ளது.)

ஹதீஸ் எண்: 448

ஒளூவைப் பூரணமாகச் செய்! விரல்களைக் கோதிக்கழுவு! என்று நபி (ஸல்) அவர்கள் கூறியதாக லகீத் இப்னு ஸபிரா (ரலி) அறிவிக்கிறார்கள்.

(குறிப்பு: திர்மிதி, அபூதாவூத் ஆகிய நூல்களிலும் இந்த ஹதீஸ் இடம் பெற்றுள்ளது.)

ஹதீஸ் எண்: 449

‘நபி (ஸல்) அவர்கள் ஒளூ செய்யும் போது தமது மோதிரத்தை அசைத்து விடுவார்கள்’ என்று அபூராபிவு (ரலி) அறிவிக்கிறார்கள்.

(குறிப்பு: இதன் மூன்றாவது அறிவிப்பாளராகிய முஹம்மத் இப்னு உபைதுல்லாஹ்வும், நான்காவது அறிவிப்பாளராகிய மஃமர் என்பவரும் பலவீனமானவர்கள்.)  

பாடம் 55. குதிகால்களைக் கழுவுதல்

ஹதீஸ் எண்: 450

ஒரு கூட்டத்தினர் ஒளூ செய்த போது அவர்களின் குதி கால்களில் தண்ணீர் படாமலிருப்பதை நபி (ஸல்) அவர்கள் கண்டார்கள் அப்போது, ‘ஒளுவைப் பூரணமாகச் செய்யுங்கள்! இத்தகைய குதிகால்களை நரக நெருப்பு தீண்டும்’ என்று கூறியதாக இப்னு உமர் (ரலி) அறிவிக்கிறார்கள்.

(குறிப்பு: புகாரி, முஸ்லிம், அபூதாவூத், நஸயீ ஆகிய நூல்களிலும் இந்த ஹதீஸ் இடம் பெற்றுள்ளது.)